ប្រធានាធិបតីសហរដ្ឋអាមេរិក ដូណាល់ ត្រាំ បាននិយាយតាមទូរស័ព្ទជាមួយប្រធានាធិបតីរុស្ស៊ីរយៈពេល ២ ម៉ោង និងបាននិយាយជាមួយមេដឹកនាំអ៊ុយក្រែន និងអឺរ៉ុប ដើម្បីរកផ្លូវបញ្ចប់សង្គ្រាមនៅអ៊ុយក្រែន ប៉ុន្តែហាក់គ្មានលទ្ធផលជាក់ស្ដែង ក្រៅពីថា «ការចរចាពីបទឈប់បាញ់គ្នានឹងមានឆាប់ៗនេះ»។
លោកសរសេរនៅលើទំព័រ Truth Social របស់លោកថា៖ «រុស្ស៊ី និងអ៊ុយក្រែននឹងចាប់ផ្តើមការចរចាភ្លាមៗឆ្ពោះទៅរកការឈប់បាញ់ ហើយអ្វីដែលសំខាន់ជាងនេះ គឺការបញ្ចប់សង្គ្រាម»។ លោកថា លោកបានជូនដំណឹងនេះទៅលោក Zelensky (ហ្សេឡែនស្គី) អំពីរឿងនេះនៅក្នុងការហៅទូរស័ព្ទលើកទីពីរ ដែលមានមេដឹកនាំពិភពលោកផ្សេងទៀតផងដែរ។
លោកបន្តថា លក្ខខណ្ឌសម្រាប់ការចរចានឹងត្រូវបានពិភាក្សារវាងភាគីទាំងពីរ ពីព្រោះពួកគេដឹងពីព័ត៌មានលម្អិតនៃការចរចាដែលគ្មាននរណាផ្សេងទៀតដឹងជាងពួកគេទេ។
លោក ហ្សេឡែនស្គី បានសរសេរនៅលើបណ្ដាញសង្គមថា៖ «វាមានសារៈសំខាន់សម្រាប់យើងទាំងអស់គ្នាដែលសហរដ្ឋអាមេរិកមិនដកខ្លួនឃ្លាតឆ្ងាយពីការចរចា និងការស្វែងរកសន្តិភាព ពីព្រោះអ្នកតែម្នាក់គត់ដែលទទួលបានផលប្រយោជន៍ពីរឿងនោះគឺ លោក Putin»។
លោក ហ្សេឡែនស្គី ថ្លែងថា អ៊ុយក្រែនគ្មានចង់បានអ្វីក្រៅពីបទឈប់បាញ់គ្នាដោយឥតលក្ខខណ្ឌនោះទេ ហើយលោកចង់ឲ្យសហរដ្ឋអាមេរិក និងមេដឹកនាំអឺរ៉ុបធ្វើជាសាក្សីក្នុងកិច្ចចរចានានាលើរឿងនេះ ដើម្បីធានាពីភាពស្មោះត្រង់របស់រុស្ស៊ី។
លោកថ្លែងថា៖ «មិនចាំបាច់ត្រូវបញ្ចុះបញ្ចូល អ៊ុយក្រែន ទេ។ តំណាងរបស់យើងត្រៀមខ្លួនជាស្រេចដើម្បីធ្វើការសម្រេចចិត្តជាក់ស្តែងនៅក្នុងការចរចា។ អ្វីដែលត្រូវការគឺការត្រៀមខ្លួនដូចគ្នាពីសំណាក់ភាគីរុស្ស៊ីដើម្បីចូលរួមក្នុងការពិភាក្សាដែលមានអត្ថន័យ»។
មេដឹកនាំអ៊ុយក្រែក៏បានលើកឡើងដែរថា ប្រសិនបើរុស្ស៊ីបដិសេធការចរចាលើបទឈប់បាញ់ និងការបញ្ចប់សង្គ្រាម មេដឹកនាអឺរ៉ុប និង សហរដ្ឋអាមេរិក ត្រូវដាក់ទណ្ឌកម្មរុស្ស៊ីកាន់តែខ្លាំងដើម្បីរុញឲ្យលោក ពូទីន ព្រមចរចាបញ្ចប់សង្គ្រាម៕
