ប៉ូលិសឥណ្ឌាបានចាប់ខ្លួនអ្នកធ្វើមាតិកាទេសចរណ៍នៅលើបណ្ដាញ Youtube ម្នាក់ឈ្មោះ Jyoti Malhotra ដោយសង្ស័យថាជាអ្នកស៊ើបការណ៍សម្ងាត់សម្រាប់ប៉ាគីស្ថាន ខណៈដែលភាព តានតឹងរវាងប្រទេសទាំងពីរកំពុងតែកើនឡើង បន្ទាប់ពីជម្លោះនិងការបាញ់ដាក់គ្នាកាលពីកន្លងទៅ។
អ្នកស្រី Malhotra អ្នកស្រីគឺជាអ្នកមានឥទ្ធិពលនៅលើបណ្ដាញសង្គមមកពីរដ្ឋ Haryana ស្ថិតនៅភាគខាងជើងប្រទេសឥណ្ឌា ហើយត្រូវបានចោទប្រកាន់ដោយអាជ្ញាធរឥណ្ឌាថាបានចែករំលែកព័ត៌មានរសើបជាមួយប៉ាគីស្ថាន។ នេះបើយោងតាមមន្ត្រីប៉ូលិសជាន់ខ្ពស់ម្នាក់ដែលបានប្រាប់អ្នកសារព័ត៌មានកាលពីថ្ងៃអាទិត្យ។
ការចាប់ខ្លួនដោយចោទប្រកាន់បែបនេះតែងកើតឡើងញឹកញាប់ទាំងនៅក្នុងប្រទេសឥណ្ឌា និងប៉ាគីស្ថាន ប៉ុន្តែករណីរបស់អ្នកស្រី Malhotra បានទាក់ទាញចំណាប់អារម្មណ៍ ព្រោះវាកើតឡើងតែប៉ុន្មានថ្ងៃប៉ុណ្ណោះ បន្ទាប់ពីប្រទេសទាំងពីរបានប្រយុទ្ធគ្នាយ៉ាងខ្លាំងក្លាបំផុតដែលមិនធ្លាប់មានក្នុងរយៈពេលជាច្រើនទសវត្សរ៍ ដែលបង្កឱ្យមានការព្រួយបារម្ភអំពីសង្គ្រាមទាំងស្រុង។
ប៉ូលិសឥណ្ឌាចោទអ្នកស្រី Malhotra ថាបានទាក់ទងជាមួយភ្នាក់ងារស៊ើបការណ៍ប៉ាគីស្ថានម្នាក់ ដែលបានរៀបចំនាងឱ្យក្លាយជា «ទ្រព្យសម្បត្តិ» សម្រាប់ទីក្រុងអ៊ីស្លាម៉ាបាដ ហើយសូម្បីតែពេលប្រទេសទាំងពីរប្រឈមមុខដាក់គ្នា ក៏្នកស្រី Malhotra នៅតែបន្តទាក់ទងជាមួយភ្នាក់ងារប៉ាគីស្ថាននោះដដែល។
យោងតាមសមត្ថកិច្ចឥណ្ឌា Youtuber រូបនេះធ្លាប់បានធ្វើដំណើរទៅប្រទេសឥណ្ឌា ក្រោមការឧបត្ថម្ភ ហើយនាងបានទាក់ទងជាមួយអ្នកមានឥទ្ធិពលនៅលើ YouTube ផ្សេងទៀត ដែលធ្លាប់ទាក់ទងជាមួយភ្នាក់ងារស៊ើបការណ៍ប៉ាគីស្ថានផងដែរ។
អ្នកស្រី Malhotra បានបង្ហោះវីដេអូទេសចរណ៍នៅលើឆែណល YouTube របស់នាងដែលមានអ្នកតាមដាន ៤០០,០០០ នាក់។ វីដេអូជាច្រើនដែលបានបង្ហោះក្នុងខែមីនា បង្ហាញពីការធ្វើដំណើររបស់នាងទៅកាន់ប៉ាគីស្ថាន ដែលនាងប្រើប្រាស់ការដឹកជញ្ជូនសាធារណៈ ការដើរផ្សារក្នុងស្រុក និងការទស្សនាប្រាសាទហិណ្ឌូដ៏ធំបំផុតរបស់ប៉ាគីស្ថាន។
សារព័ត៌មាន India Today បានចុះផ្សាយថា អ្នកស្រី Malhotra មិនសហការជាមួយសមត្ថកិច្ចឥណ្ឌាទេ ដោយបដិសេធមិនឆ្លើយសំណួររបស់ប៉ូលិស៕ CNN, India Today
