ក្រសួងបច្ចេកវិទ្យារបស់ប្រទេសវៀតណាមបានបញ្ជាឲ្យសេវាទូរគមនាគមន៍ឱ្យបិទ Telegram ដោយសារតែក្រុមហ៊ុន Telegram មិនសហការក្នុងការប្រយុទ្ធប្រឆាំងនឹងឧក្រិដ្ឋកម្មដែលបានកើតឡើង។ នេះបើយោងតាមឯកសាររបស់រដ្ឋាភិបាលដែលទីភ្នាក់ងារ Reuters ទទួលបាន។
ឯកសារដែលចុះថ្ងៃទី២១ ខែឧសភា ដែលចុះហត្ថលេខាដោយអនុប្រធាននាយកដ្ឋានទូរគមនាគមន៍នៅក្រសួងបច្ចេកវិទ្យា បានបញ្ជាឱ្យក្រុមហ៊ុនទូរគមនាគមន៍ចាត់វិធានការទប់ស្កាត់ Telegram ហើយរាយការណ៍មកក្រសួងត្រឹមថ្ងៃទី២ ខែមិថុនា។
ក្រសួងបានស្នើសុំឱ្យក្រុមហ៊ុនផ្តល់សេវាទូរគមនាគមន៍៖ «អនុវត្តវិធានការដំណោះស្រាយ និងវិធានការដើម្បីទប់ស្កាត់សកម្មភាពរបស់ Telegram នៅក្នុងប្រទេសវៀតណាម»។
ឯកសារនេះបានបង្ហាញថា ក្រសួងកំពុងធ្វើសកម្មភាពក្នុងនាមនាយកដ្ឋានសន្តិសុខអ៊ីនធឺណិតរបស់វៀតណាម បន្ទាប់ពីប៉ូលិសបានរាយការណ៍ថា ៦៨ភាគរយនៃបណ្តាញ Telegram និងក្រុមឆាណែលចំនួន ៩៦០០ នៅក្នុងប្រទេសបានបំពានច្បាប់ ពាក់ព័ន្ធនឹងការក្លែងបន្លំ ការជួញដូរគ្រឿងញៀន និង ករណីដែលសង្ស័យថាពាក់ព័ន្ធនឹងអំពើភេរវកម្ម ក្នុងចំណោមសកម្មភាពខុសច្បាប់ដែលធ្វើឡើងតាមរយៈកម្មវិធីមួយនេះ។
មន្ត្រីក្រសួងបច្ចេកវិទ្យាម្នាក់បានបញ្ជាក់ប្រាប់ Reuters ថា ឯកសារនោះជាឯកសារពិត ពីព្រោះការចាត់វិធាននោះកើតឡើងបន្ទាប់ពី Telegram បានបរាជ័យក្នុងការចែករំលែកទិន្នន័យអ្នកប្រើប្រាស់ជាមួយរដ្ឋាភិបាល នៅពេលដែលមានសំណើក្នុងសំណុំរឿងស៊ើបអង្កេតឧក្រិដ្ឋកម្ម។
ក្រុមហ៊ុនគ្រប់គ្រង Telegram និងក្រសួងបច្ចេកវិទ្យាវៀតណាមមិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។
ប៉ូលិសនិងសារព័ត៌មានរដ្ឋវៀតណាមបានព្រមានម្តងហើយម្តងទៀតអំពីឧក្រិដ្ឋកម្មដែលអាចកើតមានដូចជា ការក្លែងបន្លំ និងការបំពានទិន្នន័យនៅលើបណ្តាញ Telegram ៕
