រដ្ឋមន្ត្រីក្រសួងសន្តិសុខមាតុភូមិ លោកស្រី Kristi Noem។ Getty Images
រដ្ឋបាលលោក ត្រាំ បានសម្រេចបញ្ចប់លទ្ធភាពរបស់សាកលវិទ្យាល័យ Harvard ក្នុងការទទួលនិស្សិតអន្តរជាតិ ដែលការសម្រេចនេះនឹងបង្កើនជម្លោះកាន់តែខ្លាំងជាមួយសាកលវិទ្យាល័យចំណាស់ជាងគេនៅអាមេរិក។
រដ្ឋមន្ត្រីក្រសួងសន្តិសុខមាតុភូមិ លោកស្រី Kristi Noem បានសរសេរនៅលើបណ្ដាញសង្គម X ថា រដ្ឋបាលលោក ត្រាំ បានលុបចោលការផ្ដល់វិញ្ញាបនប័ត្រសម្រាប់ «កម្មវិធីនិស្សិត និងកម្មវិធីផ្លាស់ប្ដូរការសិក្សា» របស់សាកលវិទ្យាល័យ Harvard ដោយសារតែសាកលវិទ្យាល័យនេះខកខានមិនគោរពច្បាប់។
លោកស្រី Noem សរសេរថា៖ «សូមឱ្យរឿងនេះជាការព្រមានដល់សាកលវិទ្យាល័យ និងស្ថាប័នសិក្សាទាំងអស់នៅទូទាំងប្រទេស»។
ប៉ុន្តែ គណៈគ្រប់គ្រងសាកលវិទ្យាល័យ Harvard បានហៅការសម្រេចរបស់រដ្ឋថា «ខុសច្បាប់» ។
សាកលវិទ្យាល័យនេះបានថ្លែងនៅក្នុងសេចក្ដីថ្លែងការណ៍មួយថា៖ «យើងប្តេជ្ញាយ៉ាងពេញទំហឹងក្នុងការរក្សាសមត្ថភាពរបស់សាកលវិទ្យាល័យ Harvard ក្នុងការទទួលនិស្សិត និងអ្នកសិក្សាអន្តរជាតិរបស់យើង ដែលមកពីជាង ១៤០ ប្រទេស និងបានធ្វើឱ្យសាកលវិទ្យាល័យ ក៏ដូចជាបានធ្វើឲ្យប្រទេសនេះ មានភាពសម្បូរបែបឥតគណនា»។
សាកលវិទ្យាល័យបន្តថា៖ «យើងកំពុងធ្វើការយ៉ាងលឿនដើម្បីផ្តល់ការណែនាំ និងការគាំទ្រដល់សមាជិកនៃសហគមន៍របស់យើង។ សកម្មភាពសងសឹកនេះគំរាមកំហែងនាំឲ្យមានគ្រោះថ្នាក់ធ្ងន់ធ្ងរដល់សហគមន៍ Harvard និងប្រទេសរបស់យើង ហើយធ្វើឱ្យប៉ះពាល់ដល់បេសកកម្មសិក្សា និងស្រាវជ្រាវរបស់ Harvard»។
ការសម្រេចចិត្តរបស់រដ្ឋបាលលោក ត្រាំ អាចប៉ះពាល់ដល់និស្សិតអន្តរជាតិរាប់ពាន់នាក់ដែលសិក្សានៅសាកលវិទ្យាល័យនេះ។ ទិន្នន័យសាកលវិទ្យាល័យបង្ហាញថា និស្សិតអន្តរជាតិជាង ៦,៧០០ នាក់បានចុះឈ្មោះនៅស្ថាប័ននេះក្នុងឆ្នាំសិក្សាមុន ដែលស្មើនឹង ២៧ភាគរយនៃចំនួននិស្សិតសរុប។
ព័ត៌មាននេះបានលេចឮយ៉ាងលឿនក្នុងសហគមន៍អន្តរជាតិនៅក្នុងបរិវេណសាកលវិទ្យាល័យនៅថ្ងៃព្រហស្បតិ៍ ដែលបានបង្កឱ្យមានការភ័យខ្លាច ភាន់ច្រឡំ និងការខកចិត្តក្នុងចំណោមនិស្សិតរាប់ពាន់នាក់ដែលអនាគតរបស់ពួកគេស្ថិតក្នុងភាពមិនច្បាស់លាស់៕
