រដ្ឋមន្ត្រីការបរទេសសហរដ្ឋអាមេរិក Marco Rubio។ AP
រដ្ឋបាលរបស់ប្រធានាធិបតីសហរដ្ឋអាមេរិក ដូណាល់ ត្រាំ បានបញ្ជាឱ្យស្ថានទូតរបស់ខ្លួនផ្អាកណាត់សម្ភាសនិស្សិតបរទេសសម្រាប់ទិដ្ឋាការសិក្សា ខណៈដែលអាមេរិកកំពុងរៀបចំរឹតបន្តឹងទៅលើការត្រួតពិនិត្យប្រវត្តិនៅលើបណ្ដាញសង្គមរបស់សិស្សនិស្សិតដែលដាក់ពាក្យស្នើសុំ។
នៅក្នុងច្បាប់ចម្លងនៃកំណត់សម្គាល់ដែលបានផ្ញើទៅកាន់ស្ថានទូតនានា រដ្ឋមន្ត្រីការបរទេស Marco Rubio បាននិយាយថា ការផ្អាកនេះនឹងបន្ត «រហូតដល់មានការណែនាំបន្ថែមជាថ្មី»។
កំណត់សម្គាល់នេះបាននិយាយថា ការត្រួតពិនិត្យប្រព័ន្ធផ្សព្វផ្សាយសង្គមនឹងត្រូវបានពង្រឹងកាន់តែខ្លាំងសម្រាប់ទិដ្ឋាការសិស្ស និងទិដ្ឋាការសម្រាប់ការផ្លាស់ប្តូរនិស្សិតបរទេស។
ការផ្អាកនេះកើតឡើងចំពេលជម្លោះរបស់លោក ត្រាំ ជាមួយសាកលវិទ្យាល័យល្បីៗមួយចំនួននៅអាមេរិក ដែលលោក ត្រាំ ជឿថាមាននិន្នាការឆ្វេងនិយមខ្លាំងជ្រុល។ លោកនិយាយថា សាកលវិទ្យាល័យទាំងនោះមួយចំនួនបានអនុញ្ញាតឱ្យមានការរើសអើងជនជាតិជ្វីហ្វនៅក្នុងបរិវេណសាលា និងរក្សាគោលនយោបាយទទួលសិស្សដែលមាននិន្នាការរើសអើង។
សាររបស់ក្រសួងការបរទេស ដែលត្រូវបានសារព័ត៌មាន CBS News ទទួលបាន បានណែនាំស្ថានទូតអាមេរិកឱ្យលុបចោលការណាត់ជួបដែលមិនទាន់បានធ្វើចេញពីប្រតិទិនរបស់ពួកគេសម្រាប់និស្សិតដែលស្វែងរកទិដ្ឋាការ ប៉ុន្តែបានបញ្ជាក់ថា អ្នកដែលបានកំណត់ពេលណាត់ជួបរួចហើយអាចបន្តទៅមុខបាន។
សារទូតនេះក៏បាននិយាយផងដែរថា ក្រសួងការបរទេសកំពុងរៀបចំត្រៀម«ពង្រឹងការត្រួតពិនិត្យ និងវាយតម្លៃប្រព័ន្ធផ្សព្វផ្សាយសង្គម» ដែលអនុវត្តចំពោះការដាក់ពាក្យសុំទិដ្ឋាការសិស្សទាំងអស់។ ប៉ុន្តែ មិនបានបញ្ជាក់ច្បាស់ថា ការវាយតម្លៃលើបណ្ដាញសង្គមរបស់អ្នកដាក់ពាក្យសុំ ផ្ដោតលើអ្វីខ្លះនោះទេ។
រដ្ឋបាលរបស់លោក ត្រាំ បានពង្រឹងការវាយតម្លៃប្រព័ន្ធផ្សព្វផ្សាយសង្គមរបស់និស្សិតរួចហើយ ដោយផ្តោតលើអ្វីដែលរដ្ឋបាលនេះមើលឃើញថាជា «សកម្មភាពភេរវកម្ម»។ ការរឹតបន្តឹងរបស់លោក ត្រាំ លើនិស្សិតបរទេស កើតមានដោយសារលោកថ្លែងថា មានការតវ៉ាគាំទ្រប៉ាឡេស្ទីននៅតាមបរិវេណសាកលវិទ្យាល័យនៅសហរដ្ឋអាមេរិក និងអត្រានិស្សិតបរទេសខ្ពស់៕
