លោក ដូណាល់ ត្រាំ កាន់បន្ទាត់ពន្ធនាំចូល កាលពីខែមេសា។
ប្រធានាធិបតីសហរដ្ឋអាមេរិក លោក ដូណាល់ ត្រាំ អាចបន្តការយកពន្ធគយលើការនាំចូលទំនិញដូចអ្វីដែលលោកបានសម្រេចកាលពីដើមខែមេសា។ នេះបើយោងតាមសេចក្តីសម្រេចរបស់តុលាការឧទ្ធរណ៍ មួយថ្ងៃបន្ទាប់ពីតុលាការពាណិជ្ជកម្មបានរកឃើញថា ពន្ធដែលលោកត្រាំបានដាក់ខុសច្បាប់។
តុលាការឧទ្ធរណ៍សហព័ន្ធបានអនុញ្ញាតឱ្យសេតវិមានបន្តអនុវត្តបន្ទាត់ពន្ធរបស់លោកត្រាំ ហើយផ្អាកជាបណ្តោះអាសន្ននូវបទបញ្ជារបស់តុលាការជាន់ទាប ដែលបានសម្រេចថា លោក ត្រាំ បានដើរហួសសិទ្ធិអំណាចរបស់ខ្លួនពាក់ព័ន្ធនឹ ពន្ធអន្តរជាតិ។
សេចក្តីសម្រេចនៅថ្ងៃពុធដោយតុលាការពាណិជ្ជកម្មអន្តរជាតិរបស់សហរដ្ឋអាមេរិកបានធ្វើឱ្យមន្ត្រីរបស់លោក ត្រាំ ខឹងសម្បា។
នៅក្នុងពាក្យបណ្តឹងទៅសាលាឧទ្ធរណ៍ រដ្ឋបាលលោក ត្រាំ បាននិយាយថា សេចក្តីសម្រេចរបស់តុលាការពាណិជ្ជកម្មកាលពីមួយថ្ងៃមុនបានធ្វើឲ្យមានការវាយតម្លៃមិនត្រឹមត្រូវលើប្រធានាធិបតី និងបានគំរាមកំហែងដល់ការចរចាពាណិជ្ជកម្មដ៏លំបាកជាច្រើនខែរបស់រដ្ឋបាលថ្មីនេះ។
ពាក្យបណ្ដឹងរបស់រដ្ឋបាល ត្រាំ បានចោទតុលាការពាណិជ្ជកម្មថាជាស្ថាប័ននយោបាយ ហើយមិនមែនតុលាការ ហើយថាស្ថាប័ននេះធ្វើគោលនយោបាយការបរទេស និងកំណត់គោលនយោបាយសេដ្ឋកិច្ច។
មុនពេលមានការសម្រេចនៅថ្ងៃព្រហស្បតិ៍របស់តុលាការឧទ្ធរណ៍ អ្នកនាំពាក្យសេតវិមាន លោកស្រី Karoline Leavitt បានថ្លែងនៅក្នុងសន្និសីទសារព័ត៌មានថា៖ «សហរដ្ឋអាមេរិកមិនអាចដំណើរការបានទេ ប្រសិនបើប្រធានាធិបតី ត្រាំ ឬប្រធានាធិបតីណាមួយផ្សេងទៀត ត្រូវបានរារាំងមិនឲ្យមានការចរចាការទូត ឬពាណិជ្ជកម្មដ៏សំខាន់ដោយចៅក្រមដែលជាសកម្មជន»។
ការតស៊ូផ្នែកច្បាប់នេះបានដាក់សំណួរលើជោគវាសនានៃពន្ធនាំចូល ដែលបានធ្វើឱ្យសេដ្ឋកិច្ចសកលមានភាពចលាចលចាប់តាំងពីសេតវិមានចាប់ផ្តើមព្រមានអំពីវិធានការទាំងនេះតាំងតែពីដើមឆ្នាំមក៕
