ប្រទេសអ៊ុយក្រែនកំពុងពិចារណាផ្លាស់ប្តូរការប្រើប្រាស់ប្រាក់ដុល្លារអាមេរិក ហើយភ្ជាប់រូបិយប័ណ្ណរបស់ខ្លួនកាន់តែជិតស្និទ្ធទៅនឹងប្រាក់អឺរ៉ូ ចំពេលដែលមានការបែកខ្ញែកនៃពាណិជ្ជកម្មសកល និងទំនាក់ទំនងរបស់ខ្លួនកាន់តែជិតស្និតជាមួយអឺរ៉ុប។ នេះបើយោងតាមទេសាភិបាលធនាគារកណ្តាលអ៊ុយក្រែន Andriy Pyshnyi។
លោក Andriy Pyshnyi បាននិយាយកាលពីថ្ងៃពុធថា លទ្ធភាពនៃការចូលជាសមាជិកសហភាពអឺរ៉ុប គឺជាការពង្រឹងតួនាទីរបស់ EU នៅក្នុងការធានានូវសមត្ថភាពការពារជាតិរបស់អ៊ុយក្រែន ភាពប្រែប្រួលកាន់តែខ្លាំងនៅក្នុងទីផ្សារពិភពលោក និងលទ្ធភាពនៃការបែកបាក់នៃពាណិជ្ជកម្មសកល។
លោកថា កត្តាទាំងអស់នេះកំពុងបង្ខំឱ្យធនាគារកណ្តាលអ៊ុយក្រែនពិនិត្យមើលថាតើប្រាក់អឺរ៉ូគួរតែជារូបិយប័ណ្ណស្នូលរបស់ប្រាក់ hryvnia របស់អ៊ុយក្រែន ដើម្បីជំនួសឱ្យប្រាក់ដុល្លារឬយ៉ាងណា?
លោក Pyshnyi បានបន្ថែមថា៖ «ការងារនេះគឺស្មុគស្មាញ និងទាមទារឱ្យមានការរៀបចំប្រកបដោយគុណភាពខ្ពស់»។
ប្រាក់ដុល្លារគ្រប់គ្រងពាណិជ្ជកម្មអន្តរជាតិ ហើយគណនីភាគច្រើននៃទុនបម្រុងពិភពលោកក្នុងសេដ្ឋកិច្ចសំខាន់ៗ រួមទាំងអារ៉ាប៊ីសាអូឌីត និងហុងកុង បានដាក់រូបិយប័ណ្ណរបស់ពួកគេទៅជាប្រាក់ដុល្លារក្នុងអត្រាប្ដូរប្រាក់មួយថេរ។
ប៉ុន្តែក្រោមការដឹកនាំរបស់ប្រធានាធិបតី ដូណាល់ ត្រាំ សហរដ្ឋអាមេរិកបានបញ្ចេញសង្រ្គាមពាណិជ្ជកម្មដោយដាក់ចេញនូវពន្ធខ្ពស់បំផុតមិនធ្លាប់មានក្នុងមួយសតវត្សរ៍ ដែលជាវិធានការមួយជំរុញឱ្យអ្នកសង្កេតការណ៍មួយចំនួនចោទសួរពីតួនាទីនាពេលអនាគតរបស់ប្រាក់ដុល្លារដែលជារូបិយប័ណ្ណបម្រុងសកល។
បច្ចុប្បន្ននេះនៅក្នុងឆ្នាំទី៤ នៃការប្រយុទ្ធប្រឆាំងនឹងការឈ្លានពានដោយរុស្ស៊ី ប្រទេសអ៊ុយក្រែនក៏ត្រូវបានលោក ត្រាំ កាត់ផ្តាច់ជំនួយយោធាមួយចំនួនជាបណ្តោះអាសន្ន។
មេដឹកនាំអឺរ៉ុប រួមទាំងមេដឹកនាំមកពីសហភាពអឺរ៉ុប បានប្តេជ្ញាពង្រឹងកងទ័ពរបស់ទីក្រុង Kyiv ដើម្បីធានាថា វាអាចជាមូលដ្ឋានគ្រឹះនៃសន្តិសុខនាពេលអនាគតក្នុងប្រទេសអ៊ុយក្រែន ប៉ុន្តែវឌ្ឍនភាពនេះមានការលំបាក។
ទន្ទឹមនឹងនេះ អ៊ុយក្រែនបានចុះកិច្ចព្រមព្រៀងមួយ ដែលជាកិច្ចព្រមព្រៀងផ្តល់សិទ្ធិអាទិភាពដល់សហរដ្ឋអាមេរិកក្នុងការចូលរួមក្នុងកិច្ចសន្យារកស៊ីរុករករ៉ែក្នុងប្រទេសអ៊ុយក្រែន និងផ្តល់មូលនិធិវិនិយោគសម្រាប់ការស្ដារឡើងវិញប្រទេស។
ចាប់តាំងពីលោក ត្រាំ ត្រឡប់មកកាន់សេតវិមានវិញ សាច់ប្រាក់ដុល្លារអាមេរិកបានធ្លាក់ចុះជាង ៩ ភាគរយ បើប្រៀបធៀបទៅនឹងបណ្ដុំរូបិយបណ្ណសំខាន់ៗ ដោយសារវិនិយោគិនបានដកខ្លួនចេញពីការកាន់កាប់ទ្រព្យសម្បត្តិអាមេរិក។
អ្នកជំនាញមួយចំនួនបានព្រមានកុំឲ្យភ្ជាប់ប្រាក់ដុល្លារជាមួយនឹងស្ថានភាពរូបិយប័ណ្ណបម្រុងរបស់វា។ ប៉ុន្តែតាមប្រវត្តិសាស្ត្រ ការកាន់កាប់ប្រាក់ដុល្លារត្រូវបានផ្សារភ្ជាប់ទៅនឹងសម្ព័ន្ធភាពសន្តិសុខ និងទំនាក់ទំនងយោធាជាមួយទីក្រុងវ៉ាស៊ីនតោន។
លោក Pyshnyi បាននិយាយថា ការប្រតិបត្តិការដោយប្រើប្រាស់ប្រាក់ដុល្លារអាមេរិកនៅតែដើរតួនាទីគ្រប់ផ្នែកនៃទីផ្សារប្តូរប្រាក់បរទេស (FX market) ប៉ុន្តែភាគរយនៃការប្រតិបត្តិការដែលប្រើរូបិយប័ណ្ណអឺរ៉ូកំពុងមានការកើនឡើងនៅក្នុងផ្នែកនានាភាគច្រើន បើទោះបីជាពេលនេះនៅមានលក្ខណៈមធ្យមក៏ដោយ។
អ៊ុយក្រែនបានប្រើប្រាស់រូបិយប័ណ្ណ hryvnia ជាផ្លូវការនៅឆ្នាំ ១៩៩៦ ហើយក្នុងរយៈពេលជាច្រើនទសវត្សរ៍ក្រោយមក ប្រទេសនេះបានប្រើប្រាស់ប្រាក់ដុល្លារជារូបិយប័ណ្ណស្នូលរបស់ខ្លួន៕
