សហរដ្ឋអាមេរិកបានយល់ព្រមកាត់បន្ថយពន្ធនាំចូលលើរថយន្តអង់គ្លេសមួយចំនួន និងអនុញ្ញាតឱ្យដែកថែប និងអាលុយមីញ៉ូមមួយចំនួនចូលទៅក្នុងសហរដ្ឋអាមេរិកដោយមិនជាប់ពន្ធ ដែលជាផ្នែកមួយនៃកិច្ចព្រមព្រៀងថ្មីរវាងសហរដ្ឋអាមេរិក និងចក្រភពអង់គ្លេស។
ការប្រកាសនេះផ្តល់នូវការធូរស្បើយសម្រាប់ឧស្សាហកម្មសំខាន់ៗរបស់ចក្រភពអង់គ្លេសពីពន្ធថ្មីមួយចំនួនដែលបានប្រកាសដោយប្រធានាធិបតី ដូណាល់ ត្រាំ ចាប់តាំងពីចូលកាន់តំណែងក្នុងខែមករា។ ប៉ុន្តែ អាមេរិកនៅតែរក្សាពន្ធ ១០ភាគរយ លើទំនិញភាគច្រើនមកពីចក្រភពអង់គ្លេស។
លោក Keir Starmer នាយករដ្ឋមន្ត្រីចក្រភពអង់គ្លេសថ្លែងថា៖ «កិច្ចព្រមព្រៀងប្រវត្តិសាស្ត្រនេះផ្តល់ផលប្រយោជន៍ដល់អាជីវកម្មអង់គ្លេស និងកម្មករអង់គ្លេស ដោយការពារការងាររាប់ពាន់នៅក្នុងវិស័យសំខាន់ៗ រួមទាំងការផលិតរថយន្ត និងដែកថែប»។
លោកបន្ថែមថា៖ «ចក្រភពអង់គ្លេសគ្មានសម្ព័ន្ធមិត្តណាធំជាងសហរដ្ឋអាមេរិកនោះទេ»។
ពីសេតវិមាន លោក ត្រាំ បានហៅកិច្ចព្រមព្រៀងនេះថាជា «កិច្ចព្រមព្រៀងដ៏អស្ចារ្យ» ហើយបានជំទាស់នឹងការរិះគន់ថាលោកបាននិយាយបំផ្លើសពីសារៈសំខាន់របស់វា។
លោក ត្រាំ៖ «នេះជាកិច្ចព្រមព្រៀងដ៏អស្ចារ្យបំផុតដែលយើងនឹងធ្វើឱ្យកាន់តែធំ»។
តាមរយៈកិច្ចព្រមព្រៀងនេះ សហរដ្ឋអាមេរិកបានយល់ព្រមកាត់បន្ថយពន្ធនាំចូលរថយន្ត - ដែលលោកត្រាំបានដំឡើង ២៥ភាគរយ កាលពីខែមុន មកនៅត្រឹម ១០ភាគរយសម្រាប់រថយន្ត ១០ម៉ឺនគ្រឿងក្នុងមួយឆ្នាំ។
ការបន្ថយពន្ធនេះនឹងជួយដល់ក្រុមហ៊ុនផលិតរថយន្តប្រណីតៗដូចជា Jaguar Land Rover និង Rolls Royce ប៉ុន្តែកម្រិតពន្ធនេះអាចនឹងធ្វើឲ្យក្រុមហ៊ុនទាំងនោះជួននូវអត្រាពន្ធខ្ពស់ជាងនេះ ពីព្រោះថា ចំនួនកំណត់១០ម៉ឺនគ្រឿងនេះវាស្មើនឹងបរិមាណដែលចក្រភពអង់គ្លេសបាននាំរថយន្តចេញទៅសហរដ្ឋអាមេរិកកាលពីឆ្នាំមុន។
ភាគីទាំងពីរក៏បានយល់ព្រមលើការអនុញ្ញាតឲ្យនាំចូលសាច់គោអង់គ្លេសក្នុងកូតា ១៣,០០០ តោនទៅអាមេរិក ដែលកូតាបដិការនឹងទំនិញអាមេរិក។
ទោះបីជាមេដឹកនាំនៃប្រទេសទាំងពីរបានសរសើរថាជាកិច្ចព្រមព្រៀងសំខាន់ក៏ដោយ អ្នកវិភាគបាននិយាយថា កិច្ចព្រមព្រៀងនេះហាក់ដូចជាមិនបានផ្លាស់ប្តូរលក្ខខណ្ឌនៃពាណិជ្ជកម្មរវាងប្រទេសទាំងពីរឱ្យមានន័យគួរឱ្យកត់សម្គាល់នោះទេ បើធៀបនឹងស្ថានភាពមុនពេលលោក ត្រាំ បានធ្វើការកែប្រែនៅឆ្នាំនេះ៕
