ប្រភពរូបភាព៖ euronews
អ៊ីស្រាអែលបានសម្លាប់បុគ្គលិកសេវាសុខាភិបាលចំនួនបីនាក់ និងអ្នកសារព័ត៌មានម្នាក់ នៅក្នុងអំឡុងការវាយប្រហារលើសង្កាត់ Tuffah ក្នុងទីក្រុង Gaza។ នេះបើតាមសារព័ត៌មានប៉ាឡេស្ទីន រួមទាំងទីភ្នាក់ងារ Shehab ដែលមានទំនាក់ទំនងជាមួយក្រុមហាម៉ាស់ បានរាយការណ៍កាលពីថ្ងៃចន្ទ។
ភ្នាក់ងារ Shehab បាននិយាយថា បុគ្គលិកជួយសង្គ្រោះចំនួបីនាក់ត្រូវបានសម្លាប់ ខណៈពេលដែលពួកគេកំពុងធ្វើការជួយសង្គ្រោះអ្នករបួស និងយកសាកសពចេញពីតំបន់នោះ។
កងកម្លាំងអ៊ីស្រាអែលមិនបានឆ្លើយតបភ្លាមៗចំពោះសំណើរសុំការអត្ថាធិប្បាយលើបញ្ហានោះទេ។ កងកម្លាំងអ៊ីស្រាអែលធ្លាប់បាននិយាយកាលពីមុនថា កងកម្លាំងរបស់ខ្លួនបានបន្តប្រតិបត្តិការប្រឆាំងទៅនឹងអ្វីដែលខ្លួនចាត់ទុកថាជា «ក្រុមភេរវករ» នៅទូទាំងតំបន់ Gaza។
គួរឲ្យដឹងផងដែរថាសង្គ្រាមនេះបានចាប់ផ្តើមឡើងបន្ទាប់ពីក្រុមសកម្មប្រយុទ្ធដឹកនាំដោយក្រុមហាម៉ាស់បានចាប់ចំណាប់ខ្មាំងចំនួន ២៥១នាក់ និងបានសម្លាប់មនុស្សជាង ១២០០នាក់ ដែលភាគច្រើនជាជនស៊ីវិលនៅក្នុងការវាយប្រហារលើប្រទេសអ៊ីស្រាអែលកាលពីថ្ងៃទី៧ ខតុលា ឆ្នាំ២០២៣។
ជាការឆ្លើយតប ចាប់តាំងពីពេលនោះមក ការវាយលុករបស់អ៊ីស្រាអែលបានសម្លាប់ជនជាតិប៉ាឡេស្ទីនជាង ៥៥០០០នាក់ ដែលភាគច្រើនគឺជាជនស៊ីវិល។ ការវាយប្រហាររបស់អ៊ីស្រាអែលបានបំផ្លាញសំណង់ និងហេដ្ឋារចនាសម្ព័ន្ធអស់ជាច្រើន។នេះបើយោងតាមអាជ្ញាធរសុខាភិបាលនៅក្នុងតំបន់ Gaza។
យោងតាមអង្គការអ្នករាយការណ៍គ្មានព្រំដែន Reporters Without Borders, យ៉ាងហោចណាស់អ្នកកាសែតប៉ាឡេស្ទីន ២០០នាក់ត្រូវបានសម្លាប់ ហើយក្នុងនោះ យ៉ាងហោចណាស់ ៤៥នា់ គឺត្រូវបានសម្លាប់ក្នុងពេលបំពេញការងារ៕
