អ៊ីស្រាអែលបាននិយាយថា ខ្លួនបានកំណត់គោលដៅលើទីតាំងនុយក្លេអ៊ែរ រោងចក្រមីស៊ីលផ្លោង និងបញ្ជាការដ្ឋានយោធារបស់អ៊ីរ៉ង់ ដែលជាការព្រមានដើម្បីរារាំងទីក្រុងតេអេរ៉ង់មិនឲ្យផលិតអាវុធបរមាណូ។
ប្រព័ន្ធផ្សព្វផ្សាយ និងសាក្សីអ៊ីរ៉ង់បានរាយការណ៍អំពីការផ្ទុះជាច្រើន រួមទាំងនៅរោងចក្រចម្រាញ់សារធាតុអ៊ុយរ៉ាញ៉ូមដ៏សំខាន់មួយរបស់ប្រទេសនេះនៅទីក្រុង Natanz ខណៈដែលអ៊ីស្រាអែលបានប្រកាសដាក់ប្រទេសក្នុងស្ថានភាពអាសន្នដើម្បីបង្ការការវាយប្រហារសងសឹកដោយមីស៊ីល និងយន្តហោះគ្មានមនុស្សបើក។
ទូរទស្សន៍រដ្ឋអ៊ីរ៉ង់បានរាយការណ៍ថា លោក Hossein Salami ដែលជាមេបញ្ជាការអង្គភាពឆ្មាំបដិវត្តន៍អ៊ីរ៉ង់ត្រូវបានសម្លាប់ ទីស្នាក់ការកណ្តាលរបស់អង្គភាពក្នុងទីក្រុងតេហេរ៉ង ត្រូវបានវាយប្រហារ ហើយកុមារជាច្រើននាក់ត្រូវបានសម្លាប់នៅក្នុងការវាយប្រហារលើតំបន់លំនៅដ្ឋានមួយក្នុងរដ្ឋធានី។
នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយនៅក្នុងសារជាវីដេអូដែលបានថតជាពិសេសមួយថា៖ «ពេលនេះយើងកំពុងស្ថិតក្នុងដំណាក់កាលសម្រេចចិត្តមួយនៅក្នុងប្រវត្តិសាស្ត្ររបស់អ៊ីស្រាអែល»។
មុននេះបន្តិច អ៊ីស្រាអែលបានចាប់ផ្តើមប្រតិបត្តិការ Rising Lion ដែលជាប្រតិបត្តិការយោធាដែលមានគោលដៅដើម្បីទប់ស្កាត់ការគំរាមកំហែងពីអ៊ីរ៉ង់ ដែលរំខានដល់ការរស់រានមានជីវិតរបស់អ៊ីស្រាអែល ហើយប្រតិបត្តិការនេះនឹងបន្តរហូតការការគំរាមកំហែងត្រូវបានលុបបំបាត់។
នាយករដ្ឋមន្ត្រីអ៊ីស្រាអែលបានបន្ថែមថា អ៊ីស្រាអែលបានកំណត់គោលដៅវាយប្រហារទៅលើអ្នកវិទ្យាសាស្ត្រអ៊ីរ៉ង់ដែលកំពុងធ្វើការលើគម្រោងបង្កើតគ្រាប់បែកនុយក្លេអ៊ែរ កម្មវិធីមីស៊ីលផ្លោង និងកន្លែងចម្រាញ់សារធាតុអ៊ុយរ៉ាញ៉ូម នៅ Natanz ដោយនៅក្នុងប្រតិបត្តិការមួយនេះនឹងបន្តជាច្រើនថ្ងៃ។
មន្ត្រីយោធាអ៊ីស្រាអែលម្នាក់បាននិយាយថា អ៊ីស្រាអែលកំពុងវាយប្រហារ លើគោលដៅនុយក្លេអ៊ែរ និងយោធា ជាច្រើនកន្លែង រួមទាំងគ្រឿងចម្រាញ់នៅទីក្រុង Natanz ភាគណ្តាលអ៊ីរ៉ង់។ មន្ត្រីរូបនេះបានបន្តថា អ៊ីរ៉ង់មានសម្ភារៈគ្រប់គ្រាន់ដើម្បីផលិតគ្រាប់បែកនុយក្លេអ៊ែរ ១៥គ្រាប់ ក្នុងរយៈពេលតែប៉ុន្មានថ្ងៃប៉ុននោះ។
ទន្ទឹមនឹងការវាយប្រហារតាមអាកាសយ៉ាងទូលំទូលាយ ទីភ្នាក់ងារចារកម្ម Mossad របស់អ៊ីស្រាអែលបានដឹកនាំប្រតិបត្តិការបំផ្លិចបំផ្លាញជាបន្តបន្ទាប់នៅខាងក្នុងប្រទេសអ៊ីរ៉ង់
ទន្ទឹមនឹងការវាយប្រហារតាមអាកាសយ៉ាងទូលំទូលាយ ទីភ្នាក់ងារចារកម្ម Mossad របស់អ៊ីស្រាអែលបានដឹកនាំប្រតិបត្តិការបំផ្លិចបំផ្លាញជាបន្តបន្ទាប់ជាច្រើនកន្លែងនៅខាងក្នុងប្រទេសអ៊ីរ៉ង់ ដោយប្រតិបត្តិការនេះមានគោលបំណងបំផ្លាញទីតាំងយុទ្ធសាស្ត្រមីស៊ីល និងសមត្ថភាពការពារដែនអាកាសរបស់អ៊ីរ៉ង់។
ព្រលានយន្តហោះអ៊ីស្រាអែល Ben Gurion ក្នុងទីក្រុង Tel Aviv ត្រូវបានបិទរហូតទាល់តែមានការជូនដំណឹងជាថ្មី ហើយអង្គភាពការពារដែនអាកាសរបស់អ៊ីស្រាអែលកំពុងត្រៀមខ្លួនប្រុងប្រយ័ត្នក្នុងកម្រិតខ្ពស់ចំពោះការវាយប្រហារសងសឹកដែលអាចកើតមានពីអ៊ីរ៉ង់៕
