ធូលី និងកម្ទេចកម្ទីស្ថិត​នៅ​ពេញស្ទូឌីយ៉ូទូរទស្សន៍រដ្ឋអ៊ីរ៉ង់ ហើយអ្នកអាន​ព័ត៌មានម្នាក់បានរត់ចេញពីមុខ​កាមេរ៉ា កាលពីថ្ងៃចន្ទនៅ​ទីក្រុង​តេហេរ៉ង់ នៅពេលដែលអ៊ីស្រាអែលបានវាយប្រហារក្នុង​អំឡុងពេលផ្សាយផ្ទាល់ មួយម៉ោងបន្ទាប់ពីអ៊ីស្រាអែលបានចេញសេចក្តីព្រមានសម្រាប់ទីក្រុងតេហេរ៉ង់។

នាង Sahar Emami អ្នកអាន​ព័ត៌មាននៅបណ្តាញព័ត៌មាន​អ៊ីរ៉ង់ ត្រូវបានគេឃើញរត់ចេញពីកាមេរ៉ាយ៉ាងប្រញាប់ ខណៈអេក្រង់នៅពីក្រោយនាងត្រូវ​បានផ្តាច់។ មនុស្សនៅកន្លែងផ្សាយត្រូវបានឮនិយាយថា «Allahu akbar» ដែល​ជាឃ្លាអារ៉ាប់ ​ប្រែ​ថា «ព្រះជាម្ចាស់ដ៏អស្ចារ្យ»។

ការផ្សាយបានប្តូរទៅកម្មវិធីដែលបានថតទុកជាមុនភ្លាមៗ។ មិនយូរប៉ុន្មាន Emami ​បានត្រឡប់មកផ្សាយផ្ទាល់ពីស្ទូឌីយ៉ូមួយផ្សេងទៀត ហើយត្រូវបានគេឃើញនិយាយជាមួយអ្នក​អាន​ព័ត៌មាន​ម្នាក់ទៀត។ រូបភាពបង្ហាញពីផ្សែង និងអណ្តាតភ្លើងត្រូវ​បាន​គេ​ឃើញ​នៅលើមេឃ។ ក្រោយ​មក​ស្ថានីយ៍នេះបាន​ប្រកាស​ថា​ អគារនេះត្រូវបានវាយប្រហារដោយគ្រាប់បែកចំនួនបួនគ្រាប់​។

រដ្ឋមន្ត្រីការពារជាតិអ៊ីស្រាអែល លោក​ Israel Katz បានទទួលខុសត្រូវភ្លាមៗចំពោះការវាយប្រហារនេះ ដោយ​អះអាង​ថា៖ «អាជ្ញាធរផ្សព្វផ្សាយការឃោសនា និងការញុះញង់របស់របបអ៊ីរ៉ង់ត្រូវបានវាយប្រហារដោយកងកម្លាំងការពារអ៊ីស្រាអែល បន្ទាប់ពី​មានការជម្លៀសប្រជាជននៅតំបន់នោះយ៉ាងទូលំទូលាយ»។លោកនិយាយនៅក្នុងសេចក្តីថ្លែងការណ៍មួយ​ថា៖ «យើងនឹងវាយប្រហារមេដឹកនាំអ៊ីរ៉ង់នៅគ្រប់ទីកន្លែង»។

លោក Esmaeil Baqaei អ្នកនាំពាក្យរបស់រដ្ឋមន្ត្រីការបរទេសអ៊ីរ៉ង់ បានថ្កោលទោសការវាយប្រហារនេះ ដោយអំពាវនាវឱ្យសហគមន៍អន្តរជាតិទាមទារយុត្តិធម៌ចំពោះការវាយប្រហារលើប្រព័ន្ធផ្សព្វផ្សាយ។
វីដេអូដែលបានចែកចាយនៅលើបណ្តាញសង្គមបង្ហាញថា អគារ IRINN ដែលគេស្គាល់ថាជា «អគារកញ្ចក់» នៅតែកំពុងឆេះ។ មិនទាន់មានរបាយការណ៍ផ្លូវការណាមួយអំពីចំនួនអ្នករងរបួសពីឧបទ្ទវហេតុនេះទេ។ 

អ្នកអាន​ព័ត៌មានម្នាក់បាននិយាយនៅលើកញ្ចក់ទូរទស្សន៍ថា មានសហសេវិកមួយចំនួនបានរងរបួស ប៉ុន្តែក្រុមគ្រួសាររបស់ពួកគេមិនគួរព្រួយបារម្ភឡើយ។បណ្តាញព័ត៌មាន​ដដែល​និយាយថា កម្មវិធីផ្សាយផ្ទាល់របស់ខ្លួនឥឡូវនេះត្រូវបានផ្ទេរទៅកាន់ស្ទូឌីយ៉ូមួយផ្សេងទៀត ដែលស្រដៀងនឹងស្ទូឌីយ៉ូវិទ្យុ។

មួយម៉ោងមុនព្រឹត្តិការណ៍​កើត​ឡើង​ យោធាអ៊ីស្រាអែលបានចេញសេចក្តីព្រមានឱ្យជម្លៀសប្រជាជនដែលអាច​មាន​មនុស្សរហូតដល់ ៣៣ម៉ឺន​នាក់នៅតំបន់មួយស្ថិត​នៅ​កណ្ដាល​ទីក្រុងតេហេរ៉ង់ ដែលរួមមានទូរទស្សន៍រដ្ឋ និងទីស្នាក់ការប៉ូលិសរបស់ប្រទេសអ៊ីរ៉ង់ ព្រមទាំងមន្ទីរពេទ្យធំៗចំនួនបី។

ទន្ទឹមនឹងនេះ អ៊ីរ៉ង់បានប្រកាសថាខ្លួនបានបាញ់មីស៊ីលចំនួនប្រមាណ ១០០ គ្រាប់ និងបានសន្យាថានឹងសងសឹកបន្ថែមទៀតចំពោះការវាយប្រហារទ្រង់ទ្រាយធំលើហេដ្ឋារចនាសម្ព័ន្ធយោធា និងនុយក្លេអ៊ែររបស់ខ្លួន ដែលបានសម្លាប់មនុស្សយ៉ាងហោចណាស់ ២២៤ នាក់នៅក្នុងប្រទេសនេះចាប់តាំងពីថ្ងៃសុក្រ។

រហូតមកដល់ពេលនេះ មនុស្ស ២៤ នាក់ត្រូវបានសម្លាប់នៅក្នុងប្រទេសអ៊ីស្រាអែល និងជាង ៥០០ នាក់ទៀតរងរបួស បន្ទាប់ពីអ៊ីរ៉ង់បានបាញ់មីស៊ីលជាង ៣៧០ គ្រាប់ និងយន្តហោះគ្មានមនុស្សបើករាប់រយគ្រឿង។ នេះបើតាមមន្ត្រីអ៊ីស្រាអែល។

អង្គការ​គណៈកម្មាធិការការពារអ្នកសារព័ត៌មាន (CPJ) បាននិយាយថា ខ្លួន «មានការរន្ធត់ចំពោះការទម្លាក់គ្រាប់បែករបស់អ៊ីស្រាអែលលើប៉ុស្តិ៍ទូរទស្សន៍រដ្ឋអ៊ីរ៉ង់អំឡុងពេលផ្សាយផ្ទាល់»។

CPJ ថ្លែង​ថា៖ «ការសម្លាប់អ្នកសារព័ត៌មានជិត ២០០ នាក់នៅហ្គាហ្សាដោយគ្មានទោសពៃរ៍របស់អ៊ីស្រាអែល បានជំរុញឱ្យអ៊ីស្រាអែលកំណត់គោលដៅលើប្រព័ន្ធផ្សព្វផ្សាយនៅកន្លែងផ្សេងទៀតក្នុងតំបន់» 
យោងតាមកំណត់ត្រារបស់អង្គការសហប្រជាជាតិ និង CPJ យុទ្ធនាការរបស់អ៊ីស្រាអែលនៅហ្គាហ្សាបានសម្លាប់អ្នកសារព័ត៌មាន និងបុគ្គលិកប្រព័ន្ធផ្សព្វផ្សាយយ៉ាងហោចណាស់ ១៧៣ នាក់ចាប់តាំងពីខែតុលា ឆ្នាំ២០២៣៕