ពលរដ្ធប៉ាឡេស្ទីនរាប់សិបនាក់ត្រូវបានបាញ់សម្លាប់នៅជិតកន្លែងចែកជំនួយមនុស្សធម៌ក្នុងតំបន់ហ្គាហ្សាកាលពីថ្ងៃអាទិត្យ ខណៈដែលកងទ័ពអ៊ីស្រាអែលបានបដិសេធរបាយការណ៍នេះថាជាវារឿងមិនពិត។
ឧបទ្ទវហេតុនេះគឺជាអ្វីដែលកើតឡើងចុងក្រោយបំផុតដែលជនជាតិប៉ាឡេស្ទីនត្រូវបានសម្លាប់ ខណៈពេលដែលព្យាយាមទទួលជំនួយពីមូលនិធិមនុស្សធម៌ Gaza (GHF) ដែលជាយន្តការដ៏ចម្រូងចម្រាសគាំទ្រដោយសហរដ្ឋអាមេរិកដើម្បីចែកចាយជំនួយមនុស្សធម៌ដល់ក្រុមដែលកំពុងស្រេកឃ្លានបន្ទាប់ពីការបិទផ្លូវរបស់អ៊ីស្រាអែលអស់រយៈពេលជាច្រើនខែ។
GHF បានទទួលការរិះគន់ពីអង្គការសហប្រជាជាតិ និងភាគីផ្សេងទៀត ដែលបានព្រមានថា វាអាចនាំឲ្យប្រជាជនប៉ាលេស្ទីនត្រូវផ្លាស់ទីបន្ថែម ហើយបង្កគ្រោះថ្នាក់ដល់ពលរដ្ឋ ដោយកាលពីសប្តាហ៍មុន ការចែកជំនួយនៅតំបន់ Gaza បានបង្កឲ្យមានភាពវឹកវរ និងអំពើហិង្សា។
សាក្សីជាច្រើននាក់បាននិយាយថា ពួកគេត្រូវបានបាញ់ប្រហារ នៅតំបន់ដែលគេស្គាល់ថា ជា «Al-Alam» ដែលស្ថិតនៅប្រហែល ៨០០ម៉ែត្រ ពីទីតាំងដែលដំណើរការដោយ GHF នៅភាគខាងត្បូង Gaza ។
ក្រសួងសុខាភិបាលប៉ាឡេស្ទីន មន្ត្រីពេទ្យ និងសាក្សីជាច្រើននាក់បាននិយាយថា កងទ័ពអ៊ីស្រាអែលជាអ្នកទទួលខុសត្រូវចំពោះការបាញ់ប្រហារនេះ។ មន្ត្រីប៉ាឡេស្ទីនបាននិយាយថា ជនជាតិប៉ាឡេស្ទីន ៣១ នាក់ត្រូវបានបាញ់សម្លាប់ ខណៈដែលកងទ័ពអ៊ីស្រាអែលបានប្រកាសថា កងកម្លាំងរបស់ខ្លួន មិនបានបាញ់ទៅលើពលរដ្ឋដែលនៅជិត ឬនៅក្នុងតំបន់ចែកជំនួយនោះឡើយ ប៉ុន្តែប្រភពមួយពីកងទ័ពអ៊ីស្រាអែលបានទទួលស្គាល់ថា កងទ័ពបានបាញ់ទៅលើបុគ្គលខ្លះប្រហែល ១ គីឡូម៉ែត្រ ពីទីតាំងនោះ មុនពេលទីតាំងចែកជំនួយដំណើរការ។
ក្រសួងសុខាភិបាលប៉ាឡេស្ទីនបាននិយាយថា អ្នកស្លាប់និងរបួសជាង ២០០ នាក់ត្រូវបានបញ្ចូនទៅមន្ទីរពេទ្យដោយក្នុងនោះរាប់សិបនាក់រងរបួសធ្ងន់ធ្ងរ។ អ្នកដែលស្លាប់ទាំងអស់ត្រូវបានគេបាញ់ចំក្បាល និងទ្រូង៕ CNN
