ប្រធានាធិបតីចិន ស៊ី ជីនពីង (ឆ្វេង) និងរដ្ឋមន្ត្រីការពារជាតិអាមេរិក Pete Hegseth។
ប្រទេសចិនបានថ្កោលទោស និងប្រឆាំងយ៉ាងម៉ឺងម៉ាត់ចំពោះការលើកឡើងរបស់រដ្ឋមន្ត្រីការពារជាតិអាមេរិក លោក Pete Hegseth ដែលបាន «ប្រមាថ»ប្រទេសចិនថាបានគំរាមកំហែង និងបង្កើតភាពតានតឹងដែលបង្កឲ្យមានការប្រឈមមុខដាក់គ្នា។ ចិនថា សហរដ្ឋអាមេរិកជាកត្តាចម្បងដែលបំផ្លាញសន្តិភាព និងស្ថិរភាពនៅអាស៊ីប៉ាស៊ីហ្វិក។
នៅក្នុងសុន្ទរកថានៅឯកិច្ចសន្ទនា Shangri-La កាលពីថ្ងៃសៅរ៍ លោក Hegseth រដ្ឋមន្ត្រីការពារជាតិអាមេរិក បានលើកឡើងម្តងហើយម្តងទៀតអំពីអ្វីដែលគេហៅថា «ការគំរាមកំហែង»ដែលចិនបានបង្កឡើង និងបានបញ្ចេញមតិអវិជ្ជមានលើកោះតៃវ៉ាន់ និងសមុទ្រចិនខាងត្បូង ជាដើម។
អ្នកនាំពាក្យក្រសួងការបរទេសចិនបាននិយាយថា៖ «ការលើកឡើងនោះពោរពេញទៅដោយការញុះញង់ និងមានបំណងសាបព្រោះការបែកបាក់។ ប្រទេសចិនបដិសេធយ៉ាងដាច់អហង្កាប្រឆាំងយ៉ាងម៉ឺងម៉ាត់ និងធ្វើការតវ៉ាយ៉ាងខ្លាំងចំពោះសហរដ្ឋអាមេរិក»។
អ្នកនាំពាក្យដដែលថ្លែងថា៖ «លោក Hegseth មិនបានអើពើចំពោះការអំពាវនាវឲ្យមានសន្តិភាព និងការអភិវឌ្ឍពីបណ្តាប្រទេសក្នុងតំបន់ បែរជាជំនួសមកវិញនូវចិត្តគំនិតសង្រ្គាមត្រជាក់សម្រាប់ការប្រឈមមុខដាក់គ្នា និងបានធ្វើការបង្ខូចកេរ្តិ៍ឈ្មោះប្រទេសចិនជាមួយនឹងការចោទប្រកាន់ ចិនថាជាអ្នកបង្ករការ គំរាមកំហែង»។
អ្នកនាំពាក្យរូបនេះបន្តថា៖ «គ្មានប្រទេសណាក្នុងពិភពលោកស័ក្តិសមនឹងត្រូវបានហៅថាជាមហាអំណាចអនុត្តរភាពក្រៅពីសហរដ្ឋអាមេរិកទេ ដែលនេះក៏ជាកត្តាចម្បងដែលបំផ្លាញសន្តិភាព និងស្ថិរភាពនៅអាស៊ីប៉ាស៊ីហ្វិកដែរ»។
អ្នកនាំពាក្យរូបនេះបានព្រមានថា៖ «អាមេរិកកំពុងប្រែក្លាយតំបន់នេះទៅជាតំបន់មានហានិភ័យខ្ពស់ក្នុងការផ្ទុះជាសង្គ្រាម និងធ្វើឱ្យប្រទេសក្នុងតំបន់មានការព្រួយបារម្ភយ៉ាងខ្លាំង»។
ចំពោះសំណួរពាក់ព័ន្ធនឹងតៃវ៉ាន់ អ្នកនាំពាក្យបានរំលឹកឡើងវិញថា វាជាកិច្ចការផ្ទៃក្នុងរបស់ប្រទសចិនទាំងស្រុង ហើយគ្មានប្រទេសណាមួយអាចជ្រៀតជ្រែកបានឡើយ។ សហរដ្ឋអាមេរិកមិនគួរសួរសំណួរពាក់ព័ន្ធទៅនឹងតៃវ៉ាន់ ដើម្បីជាឥទ្ធិពលប្រឆាំងនឹងចិន ហើយមិនត្រូវលេងសើចនឹងសំណួរនេះឡើយ។
ចិនបានអំពាវនាវឱ្យសហរដ្ឋអាមេរិកគោរពតាមគោលការណ៍ «ចិនតែមួយ» និងសន្ធិសញ្ញរួមចំនួនបីរវាងចិន និងសហរដ្ឋអាមេរិក ដោយពេញលេញ និងបញ្ឈប់ការគាំទ្រការពង្រឹងកងកម្លាំងបំបែកខ្លួន «ឯករាជ្យតៃវ៉ាន់»។
នៅសមុទ្រចិនខាងត្បូង អ្នកនាំពាក្យបានសង្កត់ធ្ងន់ថា មិនដែលមានបញ្ហាណាមួយទាក់ទងទៅនឹងសេរីភាពនៃការធ្វើនាវាចរណ៍ និងការហោះហើរនៅទីនោះទេ។
សេចក្តីថ្លែងការណ៍បន្តថា៖ «តាមពិតគឺសហរដ្ឋអាមេរិកទេដែលជាកត្តាចម្បងដែលកំពុងធ្វើឲ្យប៉ះពាល់ដល់សន្តិភាព និងស្ថិរភាពនៅសមុទ្រចិនខាងត្បូង។
អ្នកនាំពាក្យរូបនេះបានកត់សម្គាល់ថា ប្រទេសចិនតែងតែប្តេជ្ញាចិត្តក្នុងការធ្វើការជាមួយបណ្តាប្រទេសពាក់ព័ន្ធ ដើម្បីដោះស្រាយការខ្វែងគំនិតគ្នាឱ្យបានត្រឹមត្រូវតាមរយៈការសន្ទនា និងការពិគ្រោះយោបល់ ខណៈពេលដែលកិច្ចការពារអធិបតេយ្យភាពដែនដី សិទ្ធិ និងផលប្រយោជន៍ដែនសមុទ្រ ធ្វើឡើងស្របតាមច្បាប់ និងបទប្បញ្ញត្តិ។
ចិនអំពាវនាវឱ្យសហរដ្ឋអាមេរិកគោរពយ៉ាងពេញលេញចំពោះកិច្ចខិតខំប្រឹងប្រែងរបស់បណ្តាប្រទេសក្នុងតំបន់ ដើម្បីរក្សាសន្តិភាព និងស្ថិរភាព បញ្ឈប់ការបំពាន និងចេតនាបំផ្លាញសន្តិភាព និងស្ថិរភាពដែលបណ្តាប្រទេសក្នុងតំបន់ខិតខំថែរក្សារ និងបញ្ឈប់ការញុះញង់បង្កើតជម្លោះ និងការប្រឈមមុខដាក់គ្នាដែលបង្ករឲ្យមានភាពតានតឹងនៅក្នុងតំបន់៕
