អាជ្ញាធរបាននិយាយថា មនុស្សជាច្រើននាក់បានរងរបួស បន្ទាប់ពីបុរសម្នាក់បានស្រែកថា «ដោះលែងប៉ាឡេស្ទីន» រួចធ្វើការបោះស្រាក្រឡុក Molotov និងបាញ់ភ្លើងដុតឲ្យឆេះ ទៅក្នុងព្រឹត្តិការណ៍ជួបជុំអ្នកគាំទ្រចំណាប់ខ្មាំងអ៊ីស្រាអែលក្នុងរដ្ឋ Colorado ។
ប៉ូលិសបាននិយាយថា មានមនុស្ស ៨ នាក់ អាយុចន្លោះពី៥២ ដល់៨៨ ឆ្នាំ បានរងរបួសក្នុងការវាយប្រហារនៅ Pearl Street Mall ដែលជាតំបន់កម្សាន្តដ៏ពេញនិយមមួយនៅទីក្រុង Boulder មានចំងាយប្រហែល ៤៨ គីឡូម៉ែត្រ ពីទីក្រុង Denver។
ប៉ូលិស FBI បានហៅការវាយប្រហារនេះថា ជាអំពើភេរវកម្ម ដោយជនសង្ស័យបានប្រើឧបករណ៍បាញ់ភ្លើង (flamethrower) ស្រាក្រឡុក Molotov និងឧបករណ៍ដុតផ្សេងៗទៀត។
វីដេអូនៃការវាយប្រហារបានបង្ហាញថា ជនសង្ស័យដែលមិនមានពាក់អាវបានស្រែកដាក់ក្រុមអ្នកជួបជុំគាំទ្រអ៊ីស្រាអែល ដោយក្នុងដៃមានកាន់ស្រាក្រឡុក Molotov និងឧបករណ៍បាញ់ភ្លើង មុនពេលត្រូវបានចាប់ខ្លួន។
ការវាយប្រហារនេះបានកើតឡើងក្នុងអំឡុងពេលបាតុកម្មប្រចាំសប្តាហ៍ ដែលរៀបចំដោយក្រុម Run for Their Lives ដែលជាក្រុមគាំទ្រអ៊ីស្រាអែល។ ក្រុមនេះរៀបចំឡើងដើម្បីដើរផ្សព្វផ្សាយនៅតំបន់ Pearl Street Mall បង្ហាញពីសាមគ្គីភាពជាមួយចំណាប់ខ្មាំងអ៊ីស្រាអែលនៅតំបន់ Gaza។
ប៉ូលិសបានទទួលការហៅទូរសព្ទ បន្ទាប់ពីបុរសម្នាក់មានអាវុធ និងមនុស្សជាច្រើននាក់ត្រូវបានដុត។ មន្ត្រីបានឃើញអ្នករងរបួសដោយការរលាកភ្លើងជាច្រើនអ្នក។
យោងតាមលោក Rabbi Israel Wilhelm នាយក Chabad នៃសាកលវិទ្យាល័យ Colorado Boulder បាននិយាយថា ម្នាក់ក្នុងចំណោមអ្នករងរបួសនៅក្នុងការវាយប្រហារគឺជាអ្នករស់រានមានជីវិតរួចផុតពីការសម្លាប់រង្គាល Holocaust។
អត្តសញ្ញាណជនសង្ស័យត្រូវបានស្គាល់ឈ្មោះថា Mohamed Sabry Soliman អាយុ ៤៥ឆ្នាំ ដែលត្រូវបានបញ្ជូនទៅកាន់មន្ទីរពេទ្យបន្ទាប់ពីត្រូវបានចាប់ខ្លួន ហើយក្រោយមកត្រូវបញ្ជូនទៅពន្ធនាគារក្នុងស្រុក លើបទចោទប្រកាន់មួយចំនួន។
មន្ត្រីរដ្ឋាភិបាលបានប្រាប់ថា ជនសង្ស័យ Soliman គឺជាជនជាតិអេហ្ស៊ីប ដែលបានមកដល់រដ្ឋកាលីហ្វ័រញ៉ានៅក្នុងឆ្នាំ២០២២ តាមទិដ្ឋាការមិនមែនអន្តោប្រវេសន៍ដែលផុតកំណត់ក្នុងខែកុម្ភៈ ឆ្នាំ២០២៣។
អគ្គសេនាធិការរងសេតវិមាន លោក Stephen Miller បាននិយាយថា លោក Soliman ត្រូវបានផ្តល់លិខិតអនុញ្ញាតការងារ បន្ទាប់ពីទិដ្ឋាការរបស់គាត់បានផុតកំណត់ក្រោមការគ្រប់គ្រងរបស់លោក Biden ។
តាមរបាយការណ៍ចុងក្រោយរបស់ FBI បានបង្ហាញថា បុរសម្នាក់នេះបានរៀបចំគម្រោងមួយឆ្នាំ មុនធ្វើការវាយប្រហារនេះ។
ការវាយប្រហារនេះគឺជាអំពើហិង្សាដែលលេចធ្លោជាលើកទី២ នៅសហរដ្ឋអាមេរិកក្នុងរយៈពេល២សប្ដាហ៍ចុងក្រោយនេះ បន្ទាប់ពីហេតុការណ៍បាញ់ប្រហារទៅលើបុគ្គលិកស្ថានទូតអ៊ីស្រាអែល២នាក់បណ្តាលឲ្យស្លាប់ នៅខាងក្រៅសារមន្ទីរជនជាតិជ្វីហ្វក្នុងក្រុងវ៉ាស៊ីនតោន កាលពីថ្ងៃទី២២ ខែឧសភា ដោយបុរសម្នាក់នោះក៏បានស្រែកថា «ដោះលែងប៉ាឡេស្ទីន»៕
