បន្ទាប់ពីការហៅទូរស័ព្ទអស់រយៈពេល ៩០នាទីដ៏យូរជាមួយមេដឹកនាំចិន ស៊ី ជីនពីង លោកប្រធានាធិបតីអាមេរិក ដូណាល់ ត្រាំ បានចេញមកបង្ហាញពីអារម្មណ៍ធូរស្រាល ដែលភាពតានតឹងពាណិជ្ជកម្មអាចនឹងត្រូវបានគេដោះស្រាយក្នុងពេលឆាប់ៗនេះ។
លោក ត្រាំ បានហៅការសន្ទនានេះថា «ល្អណាស់» និងបានធ្វើការបង្ហោះនៅក្នុងបណ្តាញសង្គមបន្ទាប់ពីការហៅទូរស័ព្ទថា កិច្ចពិភាក្សបន្ទាប់នឹងត្រូវរៀបចំក្នុងពេលឆាប់ៗជាមួយក្រុមសេដ្ឋកិច្ចរបស់លោក។ ក្នុងនោះដែរ លោក និងលោក ស៊ី បានអញ្ជើញគ្នាឲ្យទៅបំពេញទស្សនកិច្ចនៅក្នុងប្រទេសរបស់ខ្លួនរៀងៗខ្លួនទៀតផង។
ការហៅទូរស័ព្ទនេះផ្ដោតស្ទើរតែទាំងស្រុងលើបញ្ហាពាណិជ្ជកម្ម ដោយមិនបានប៉ះពាល់ដល់បញ្ហាភូមិសាស្ត្រនយោបាយផ្សេងទៀតដូចជាអ៊ីរ៉ង់ និងអ៊ុយក្រែននោះទេ។ សមិទ្ធផលបន្ទាប់ពីការហៅទូរស័ព្ទនេះបានបង្ហាញពីភាពវិជ្ជមានសម្រាប់ប្រទេសទាំងពីរយ៉ាងខ្លាំង។
អំឡុងពេលនៃការពិភាក្សាតាមទូរស័ព្ទ លោក ស៊ី បានអំពាវនាវឱ្យសហរដ្ឋអាមេរិក និងចិន ស្វែងរកលទ្ធផល ឈ្នះ-ឈ្នះ ក្នុងស្មារតីសមភាព និងធ្វើការគោរពនូវបញ្ហារបស់គ្នាទៅវិញទៅមក ខណៈដែលជំរុញឱ្យទីក្រុងវ៉ាស៊ីនតោនដកចេញនូវវិធានការអវិជ្ជមានដែលធ្វើឡើងដើម្បីប្រឆាំងនឹងប្រទេសចិន នេះបើយោងតាមការចុះផ្សាយរបស់ក្រសួងការបរទេសចិន។
ក្រសួងបានស្រង់សម្ដីលោក ស៊ី ដែលប្រាប់ទៅសមភាគីអាមេរិកថា៖ «ការកែតម្រូវឡើងវិញនូវទិសដៅថ្មីសម្រាប់ទំនាក់ទំនងចិន និង អាមេរិក គឺទាមទារឱ្យយើងដឹកនាំ និងកំណត់ផ្លូវត្រូវ»។
នៅក្នុងការសន្ទនានោះដែរ លោក ត្រាំ បានលើកឡើងពីបញ្ហារ៉ែកម្រ ដែលប្រទេសចិនបានដាក់កម្រិត ដែលជាកន្លែងដែលត្រូវធ្វើឲ្យរីកចម្រើនជាមួយគ្នា ដោយលោកបានលើកឡើងថា វាមិនគួរមានសំណួរស្មុកស្មាញណាមួយទាក់ទងនិងផលិតផលរ៉ែកម្រនោះទៀតទេ។
ការជួបពិភាក្សាគ្នារវាងក្រុមការងារផ្នែកសេដ្ឋកិច្ច និងកើតឡើងក្នុងពេលឆាប់ៗនេះ ក្នុងទីតាំងដែលបានកំណត់ ហើយមេដឹកនាំទាំងពីររំពឹងថានឹងមានការបំពេញទស្សនកិច្ចទៅវិញទៅមក៕
