កិច្ចចរចាថ្មីមួយក្នុងគោលបំណងដោះស្រាយសង្គ្រាមពាណិជ្ជកម្មរវាងអាមេរិក និងចិនត្រូវបានរៀបចំធ្វើនៅទីក្រុងឡុងដ៍នៅថ្ងៃចន្ទនេះ។ គណៈប្រតិភូជាន់ខ្ពស់អាមេរិកនឹងជួបជាមួយតំណាងចិនដឹកនាំដោយ ឧបនាយករដ្ឋមន្ត្រី He Lifeng។
ជំនួបនេះកើតមានឡើងបន្ទាប់ពីលោក ត្រាំ និងមេដឹកនាំចិន Xi Jinping បានសន្ទនាតាមទូរស័ព្ទកាលពីសប្តាហ៍មុន ដែលប្រធានាធិបតីអាមេរិកបានពណ៌នាថាវាជាការសន្ទនាដ៏ល្អបំផុតមួយ។
កាលពីខែមុន ប្រទេសដែលមានសេដ្ឋកិច្ចធំបំផុតរបស់ពិភពលោកទាំងពីរបានព្រមព្រៀងគ្នាចំពោះសន្ធិសញ្ញាសន្តិភាពបណ្ដោះអាសន្នមួយ ដើម្បីកាត់បន្ថយពន្ធនាំចូលលើទំនិញពីប្រទេសរបស់ពួកគេ ប៉ុន្តែចាប់តាំងពីពេលនោះមក ប្រទេសទាំងពីរបានចោទប្រកាន់គ្នាទៅវិញទៅមកថាបានរំលោភលើកិច្ចព្រមព្រៀងនោះ។
កាលពីថ្ងៃសុក្រសប្តាហ៍មុន លោក Trump បានបង្ហោះនៅលើបណ្តាញសង្គមរបស់ខ្លួនថា រដ្ឋមន្រ្តីក្រសួងសេដ្ឋកិច្ចសហរដ្ឋអាមេរិក លោក Scott Bessent, រដ្ឋមន្រ្តីពាណិជ្ជកម្ម លោក Howard Lutnick និងអ្នកតំណាងពាណិជ្ជកម្ម លោក Jamieson Greer នឹងជួបជាមួយមន្រ្តីចិននៅទីក្រុងឡុងដ៍ នៅថ្ងៃចន្ទនេះ។
កាលពីថ្ងៃសៅរ៍ ក្រសួងការបរទេសចិនក៏បានប្រកាសថា ឧបនាយករដ្ឋមន្ត្រី He Lifeng នឹងស្នាក់នៅចក្រភពអង់គ្លេសចាប់ពីថ្ងៃទី៨ ដល់ថ្ងៃទី១៣ មិថុនា ហើយនឹងមានកិច្ចប្រជុំ «យន្តការសេដ្ឋកិច្ច និងពាណិជ្ជកម្មចិន-អាមេរិក»ធ្វើឡើងនៅទីនោះ៕
