កាលពីសប្ដាហ៍មុនភ្នំពេញប៉ុស្ដិ៍បានផ្សព្វផ្សាយ ១ វគ្គរួចហើយ ពីភាពមានទោស ឬគ្មានទោសនៃបើកបរបង្កឱ្យអ្នកដទៃគ្រោះថ្នាក់ចរាចរណ៍ដោយចៃដន្យដូចជា បើកសុខៗខូចយានយន្តតាមផ្លូវធ្វើឱ្យអ្នកបើកតាមក្រោយបុកស្លាប់ខ្លួនឯង តាមរយៈការពន្យល់ពីលោកមេធាវី ផុន ធារិន បម្រើការនៅការិយាល័យមេធាវី ផុន ធារិន នៅបុរីដឹមេគង្គរ៉ូយ៉ាល់ ផ្ទះលេខ ៧១ ផ្លូវ M08ភូមិខ្ទរ សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ។ ឥឡូវនេះយើងសូមផ្សព្វផ្សាយនូវវគ្គបញ្ចប់ដែលមានខ្លឹមសារតាមរយៈសំណួរដូចខាងក្រោម៖
ឧបមាថា បើភាគីដែលជិះបុកឡានលោក (ក) ពីក្រោយត្រឹមតែរបួស ពេលនោះភាគីទាំង ២ ព្រមស្រុះស្រួលគ្នាបញ្ចប់រឿងហើយ។ តើលោក (ក) មានពាក់ព័ន្ធទោសព្រហ្មទណ្ឌទេឬយ៉ាងណា?
ផ្អែកតាមមាត្រា ៣៦ នៃច្បាប់ស្តីពីចរាចរណ៍ផ្លូវគោកបានចែងថា បើគ្រោះថ្នាក់កើតឡើងបណ្តាលឱ្យខូចខាតតែទ្រព្យសម្បត្តិ ភាគីទាំង ២ អាចសម្របសម្រួលគ្នាបាន ដោយមិនចាំបាច់សុំអន្តរាគមន៍ពីមន្ត្រីនគរបាលចរាចរណ៍ផ្លូវគោក។
ម្យ៉ាងទៀត តាមការចង្អុលបង្ហាញក្នុងមាត្រា ៦៤ នៃច្បាប់ស្តីពីចរាចរណ៍ផ្លូវគោកក៏បានបញ្ជាក់ថា មន្ត្រីនគរបាលចរាចរណ៍ផ្លូវគោកអាចសម្រុះសម្រួលក្នុងករណីមានគ្រោះថ្នាក់ ដែលបណ្តាលឱ្យសងតែសំណងខូចខាត។ ផ្អែកតាមមាត្រាខាងលើ ភាគីទាំង ២ អាចធ្វើការសម្រុះសម្រួល បញ្ចប់រឿងបាន ចំពោះករណីលើសំណងដែលបានខូចខាតរបស់ភាគី។
ផ្ទុយមកវិញ ក្នុងករណីដែលសមត្ថកិច្ចឃើញថា គ្រោះថ្នាក់ចរាចរណ៍នោះជាបទល្មើសចរាចរណ៍ផ្លូវគោក ដែលត្រូវផ្តន្ទាទោសដាក់ពន្ធនាគារ និងត្រូវផ្តន្ទាទោសពិន័យជាប្រាក់ជាសមត្ថកិច្ចតុលាការ។ ក្នុងករណីនេះ មន្ត្រីនគរបាលចរាចរណ៍ ដែលមានសមត្ថកិច្ចត្រួតពិនិត្យបទល្មើសចរាចរណ៍ផ្លូវគោក ត្រូវបញ្ជូនកំណត់ហេតុស្តីពីបទល្មើសចរាចរណ៍ផ្លូវគោក ទៅអយ្យការអមសាលាដំបូង។
ករណីគ្រោះថ្នាក់ចរាចរណ៍នេះដែរគឺជនរងគ្រោះត្រឹមតែរបួសទេ ហើយកាលពីគ្រោះថ្នាក់ដំបូង ភាគីជនរងគ្រោះបានទទួលប្រាក់សំណងពីលោក (ក) រួចហើយ ប៉ុន្តែ ១ ឆ្នាំក្រោយមក ភាគីជនរងគ្រោះក៏ធ្លាក់ខ្លួនពិការ។ ករណីបែបនេះ តើភាគីរងគ្រោះអាចសើរើប្តឹងឡើងវិញបានទេ?
ករណីគ្រោះថ្នាក់ចរាចរណ៍ដែលភាគីបានសម្របសម្រួលដោះស្រាយសំណងរួចរាល់ មិនមែនមានន័យថា ជនល្មើសរួចផុតពីការទទួលខុសត្រូវព្រហ្មទណ្ឌចំពោះអំពើរបស់ខ្លួនឡើយ។ តាមមាត្រា ៧២ នៃច្បាប់ស្តីពីចរាចរណ៍ផ្លូវគោក អ្នកបើកបរត្រូវទទួលខុសត្រូវព្រហ្មទណ្ឌចំពោះបទល្មើសដែលខ្លួនបានប្រព្រឹត្តក្នុងការបើកបរយានជំនិះ។
ក្នុងករណីនេះ ភាគីជនរងគ្រោះនៅតែអាចដាក់ពាក្យបណ្តឹងទៅសមត្ថកិច្ច ដើម្បីចំណាត់ការតាមនីតិវិធី ដោយផ្អែកតាមអាជ្ញាយុកាលនៃបទល្មើស ឬនៅតែបន្តនីតិវិធីរបស់សមត្ថកិច្ចនគរបាលចរាចរណ៍ផ្លូវគោក ឬតុលាការដដែល៕