.jpg)
លោក មេធាវី ផុន ធារិន កាលពីពេលកន្លងមក។ រូបថត សហការី
កាលពីថ្ងៃចន្ទសប្ដាហ៍មុន ភ្នំពេញ-ប៉ុស្ដិ៍បានផ្សព្វផ្សាយ ១ វគ្គរួចមកហើយជុំវិញការជាប់ពាក់ព័ន្ធរបស់ម្ចាស់ផ្ទះក្នុងករណីមានមនុស្សស្លាប់ក្នុងបរិវេណលំនៅឋានរបស់គាត់ តាមរយៈការបកស្រាយពីលោកមេធាវី ផុន ធារិន ដែលបម្រើការនៅការិយាល័យមេធាវី ផុន ធារិន នៅបុរីដឹមេគង្គរ៉ូយ៉ាល់ ផ្ទះលេខ ៧១ ផ្លូវ M08 ភូមិខ្ទរ សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ។ រីឯនៅថ្ងៃចន្ទនេះ យើងសូមផ្សព្វផ្សាយនូវវគ្គបញ្ចប់តាមរយៈសំណួរដូចខាងក្រោម៖
ឧបមាថា លោក (ខ) ត្រូវគេវាយឱ្យរបួសធ្ងន់ ប៉ុន្តែលោក (ក) មិនបានដឹកជនរងគ្រោះទៅមន្ទីរពេទ្យទេ បណ្តោយឱ្យជនរងគ្រោះដាច់ខ្យល់ស្លាប់នៅក្នុងបរិវេណផ្ទះគាត់។ តើនេះអាចចាត់ទុកជាការរួមចំណែកទទួលខុសរបស់លោក (ក) ឬយ៉ាងណា?
ក្នុងហេតុខាងលើ ករណីដែលលោក (ក) មិនបានដឹកជនរងគ្រោះទៅមន្ទីរពេទ្យ យើងមិនទាន់អាចចាត់ទុកថាលោក (ក) រួមចំណែកក្នុងការទទួលខុសត្រូវផ្នែកព្រហ្មទណ្ឌនៅឡើយនោះទេ ដោយហេតុថា លោក (ក) មិនមានសមត្ថកិច្ចក៏ដូចជា ជំនាញក្នុងការដឹកជញ្ជូនជនរងគ្រោះទៅមន្ទីរពេទ្យនៅឡើយ។ តែអ្វីដែលយើងត្រូវពិនិត្យមើលនោះ ថា តើលោក (ក) បានរាយការណ៍ជូនដល់អាជ្ញាធរមូលដ្ឋានអំពីហេតុការណ៍ ឬអ្នកដែលអាចជួយសង្គ្រោះ (រួមមានពេទ្យសង្គ្រោះ ឬមន្ទីរពេទ្យបង្អែកជាដើម) ដែរឬទេ? ក្នុងករណីដែលលោក (ក) មិនបានរាយការណ៍អំពីហេតុការណ៍ជូនអាជ្ញាធរមូលដ្ឋាន ឬសមត្ថកិច្ចនគរបាលលោក (ក) ត្រូវទទួលខុសត្រូវផ្នែកព្រហ្មទណ្ឌពីបទមិនប្ដឹងបរិហារបទឧក្រិដ្ឋដែលមានចែងក្នុងមាត្រា ៥២៩ នៃក្រមព្រហ្មទណ្ឌដែលត្រូវផ្ដន្ទាទោសដាក់ពន្ធនាគារពី ១ ខែទៅ ១ ឆ្នាំ និងពិន័យជាប្រាក់ពី ១០០ ០០០ រៀលទៅ ២ ០០០ ០០០ រៀល។
លោក (ក) ដឹងថា ជនដៃដល់សម្លាប់លោក (ខ) ហើយ តែមិនចាប់ខ្លួនប្រគល់ឱ្យនគរបាល ហើយបណ្តោយឱ្យជនដៃដល់មានឱកាសរត់រួច។ តើករណីនេះចាត់ទុកថា លោក (ក) រួមចំណែកជាមួយជនដៃដល់ឬ?
ក្នុងករណីដែលលោក (ក) មិនបានចាប់ខ្លួនប្រគល់ឱ្យទៅនគរបាល ឬមិនបានរាយការណ៍អំពីហេតុការណ៍ជូនសមត្ថកិច្ច អាជ្ញាធរមូលដ្ឋានត្រូវបានលើកលែងការទទួលខុសត្រូវព្រហ្មទណ្ឌដោយផ្អែកលើមាត្រា ៥២៩ នៃក្រមព្រហ្មទណ្ឌក្នុងករណីមួយចំនួន: បុព្វញាតិ និងបច្ឆាញាតិ បងប្អូនប្រុសស្រីរបស់ចារី សហចារី អ្នកផ្ដើមគំនិត ឬ អ្នកសមគំនិតនៃបទឧក្រិដ្ឋ។ សហព័ទ្ធរបស់ចារី សហចារី អ្នកផ្ដើមគំនិត ឬ អ្នកសមគំនិតនៃបទឧក្រិដ្ឋ។
ដោយឡែក ប្រសិនបើសមត្ថកិច្ចរកឃើញថា លោក (ក) មានចេតនាបិទបាំង មិនផ្ដល់ព័ត៌មានជូនអាជ្ញាធរមូលដ្ឋានមានសមត្ថកិច្ច និងបង្កឱ្យជនល្មើសគេចខ្លួន ដូច្នេះលោកក៏ត្រូវទទួលខុសត្រូវផ្នែកព្រហ្មទណ្ឌពាក់ព័ន្ធនឹងបទសមគំនិតនឹងអំពើឃាតកម្ម ឬមនុស្សឃាតដោយអចេតនា៕
