តាមច្បាប់ការស៊ីឈ្នួលសម្លាប់មនុស្សគឺជាបទល្មើសឧក្រិដ្ឋដែលត្រូវជាប់ទោស ដោយមិនអាចគេចផុតឡើយ។ ក៏ប៉ុន្តែក្នុងករណីជននោះមិនព្រមធ្វើតាមការជួលវិញ តើអាចប្រឈមនឹងការជាប់ទោសដែរឬទេ? ជុំវិញករណីបែបនេះ ភ្នំពេញ ប៉ុស្ដិ៍ បានសុំការពន្យល់ពីលោកមេធាវី ផុន ធារិន ដែលបម្រើការនៅការិយាល័យមេធាវី ផុន ធារិន ស្ថិតនៅបុរីឌឺមេគ្គងរ៉ូយ៉ាល់ ផ្ទះលេខ ៧១ ផ្លូវ M08 ភូមិខ្ទរ សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញមានខ្លឹមសារដូចខាងក្រោម ៖
ឧបមាថា លោក (ក) បានជួលលោក (ខ) ឱ្យទៅសម្លាប់បុរសម្នាក់ ប៉ុន្តែក្រោយមកលោក (ខ) ប្រកែកមិនទៅ តែបែរជាគាត់ទៅប្រាប់នគរបាលវិញ។ តើករណីនេះលោក (ខ) ត្រូវជាប់ពាក់ពន្ធនឹងបទល្មើសដែរទេ ព្រោះលោក (ខ) មិនបានធ្វើសកម្មភាពផងនោះ?
ក្នុងករណីខាងលើនេះលោក (ខ) មិនជាប់ពាក់ព័ន្ធនឹងបទល្មើសឃាតកម្មនោះទេ ដោយហេតុថា លោក (ខ) គ្មានចេតនាប្រព្រឹត្តអំពើឃាតកម្មលើបុរសម្នាក់ដែលលោក (ក) បានជួលឱ្យគាត់សម្លាប់។ លោក (ខ) គ្មានចេតនាប្រព្រឹត្តអំពើឃាតកម្ម ឬប៉ុនប៉ងឃាតកម្មនៅក្នុងអង្គហេតុនេះឡើយ ដោយសំអាងលើលោក (ខ) មិនទាន់បានប្រព្រឹត្តសកម្មភាពព្រមទាំងបានរាយការណ៍ជូនសមត្ថកិច្ចនគរបាលអំពីទង្វើរបស់លោក (ក) មានចេតនាចង់សម្លាប់ជនដទៃ។
ប្រសិនបើលោក (ខ) សម្លាប់បុរសទី៣ តាមការបញ្ជារបស់លោក (ក) បានសម្រេច តែត្រូវនគរបាលចាប់បាន ប៉ុន្តែលោក (ខ) នាំនគរបាលទៅចាប់លោក (ក)។ តើករណីនេះលោក (ខ) ត្រូវរួចពីការជាប់ទោសដែរឬទេ? ចុះប្រសិនបើមានទោស តើអ្នកទាំង ២ ត្រូវមានទោសស្មើគ្នា ឬមួយយ៉ាងណា?
សកម្មភាពរបស់លោក (ក) និងលោក (ខ) ក្នុងករណីខាងលើនេះ គឺជាអំពើឃាតកម្មគិតទុកជាមុន ដែលមានចែងក្នុងមាត្រា ២០០ នៃក្រមព្រហ្មទណ្ឌ ព្រះរាជាណាចក្រកម្ពុជា ដែលត្រូវផ្តន្ទាទោសដាក់ពន្ធនាគារអស់មួយជីវិត។ ដោយឡែក លោក (ខ) បានចូលរួមសហការជាមួយសមត្ថកិច្ចក្នុងការចង្អុលបង្ហាញមុខសញ្ញាជនល្មើស ព្រមទាំងចាប់លោក (ក) បានអាចត្រូវបានតុលាការពិចារណានូវការទទួលបានស្ថានសម្រាលដែលមានចែងក្នុងមាត្រា ៩៣ និង ៩៥ នៃក្រមព្រហ្មទណ្ឌ ព្រះរាជាណាចក្រកម្ពុជា ដែលអាចចៅក្រមប្រកាសដាក់ទោសឱ្យជាប់ពន្ធនាគារក្នុងចន្លោះរវាង ១៥ ទៅ ៣០ ឆ្នាំ។
ករណីបុរសទី៣ ដឹងខ្លួនមុនពីគម្រោងការនេះ ហើយបានទៅវាយលោក (ក) បំណងសងសឹកវិញ តែត្រូវនគរបាលចាប់ខ្លួនបាន តើករណីនេះបុរសដែលវាយលោក (ក) នោះត្រូវប្រឈមនឹងផ្លូវច្បាប់យ៉ាងម៉េចដែរ? បើគាត់គ្រាន់តែវាយលោក (ក) នេះ ដើម្បីទប់ស្កាត់ពីការសម្លាប់រូបគាត់ប៉ុណ្ណោះនោះ ?
ក្នុងអង្គហេតុនេះ បុរសទី៣ បានប្រព្រឹត្តអំពើហិង្សាដោយចេតនាលើលោក (ក) ដែលមានចែងក្នុងមាត្រា ២១៧ និងមាត្រា ២១៨ នៃក្រមព្រហ្មទណ្ឌព្រះរាជាណាចក្រកម្ពុជាត្រូវផ្តន្ទាទោសដាក់ពន្ធនាគារពី ២ ទៅ ៥ ឆ្នាំ និងពិន័យជាប្រាក់ពី ៤ លាន ទៅ ១០ លានរៀល។ ជាអនុសាសន៍ ដើម្បីទប់ស្កាត់បទល្មើសមិនឱ្យលោក (ក) ប្រព្រឹត្តលើខ្លួន បុរសទី ៣ ត្រូវដាក់ពាក្យបណ្តឹងទៅសមត្ថកិច្ច ឬស្ថាប័នតុលាការ ដើម្បីចំណាត់ការលើលោក (ក)៕