The Phnom Penh Post Search

Search form




Logo of Phnom Penh Post newspaper Phnom Penh Post - ស្វែងយល់​ពី​នីតិវិធី​នៃ​ការដាក់ឱ្យ​ស្ថិតក្រោម​ការត្រួតពិនិត្យ​របស់​តុលាការ

ស្វែងយល់​ពី​នីតិវិធី​នៃ​ការដាក់ឱ្យ​ស្ថិតក្រោម​ការត្រួតពិនិត្យ​របស់​តុលាការ

Content image - Phnom Penh Post
លោក​មេធាវី លី កុសល កាលពី​ពេល​កន្លងមក​។ រូបថត សហការី

ស្វែងយល់​ពី​នីតិវិធី​នៃ​ការដាក់ឱ្យ​ស្ថិតក្រោម​ការត្រួតពិនិត្យ​របស់​តុលាការ

ជាទូទៅ​យើង​តែង​សង្កេតឃើញ​​ថា ការអនុវត្ត​ច្បាប់​មាន​ករណីខ្លះ តុលាការ​បានដាក់​ជន​ត្រូវចោទ​ឱ្យ​ស្ថិតក្រោម​ការត្រួតពិនិត្យ​របស់​តុលាការ​មានដូចជា ការប្ដូរ​លំនៅ​ ឬ​ចេញទៅ​ក្រៅ​ប្រទេស​ត្រូវ​ជូនដំណឹង​ដល់​តុលាការ​ជាដើម​។ ជុំវិញ​ការអនុវត្ត​នីតិវិធី​នេះ ​ភ្នំពេញ​ ប៉ុស្ដិ៍​ បាន​សុំ​ការពន្យល់​ពី​លោក​មេធាវី លី កុសល ដែលមាន​ការិយាល័យ​​បម្រើការ​នៅផ្ទះ​លេខ​ ៤៥Eo ផ្លូវ​លេខ​ ៩ ​ភូមិ ត្រពាំង​ថ្លឹង សង្កាត់​ចោមចៅ ខណ្ឌ​ពោធិ៍សែនជ័យ​ រាជធានី​ភ្នំពេញ​តាមរយៈ​សំណួរ​ដូចខាងក្រោម​៖

តើ​ពាក្យ​ថា ការដាក់​ឱ្យ​ស្ថិតក្រោម​​ការត្រួតពិនិត្យ​តាម​ផ្លូវ​តុលាការ​មានន័យ​យ៉ាង​ដូចម្តេច​?

-​ការដាក់ឱ្យ​ស្ថិតនៅក្រោម​ការត្រួតពិនិត្យ​តាមផ្លូវ​តុលាការ​គឺជា​ផ្នែក​មួយ​នៃ​វិធានការ​និរន្តរាយ​របស់​ចៅក្រម​ស៊ើបសួរ ដែល​ដាក់​បុគ្គល​ដែលជា​កម្មវត្ថុ​នៃ​វិធានការ​នេះ​ឱ្យនៅ​ក្រោម​​ការត្រួតពិនិត្យ​តាមផ្លូវ​តុលាការ​ (​នៅក្រៅ​ឃុំ​)​ ឬ​សម្រេច​ឃុំខ្លួន​បណ្តោះអាសន្ន​ (​នៅក្នុង​ឃុំ​) ​ដែល​មានចែង​ចាប់ពី​មាត្រា​ ១៨៥ ​ដល់​មាត្រា​ ២៣០ ​នៃ​ក្រមនីតិវិធី​ព្រហ្មទណ្ឌ​។ ​ផ្អែក​តាម​នីតិវិធី​ព្រហ្មទណ្ឌ​នៃ​ព្រះរាជាណាចក្រ​កម្ពុជា ការត្រួតពិនិត្យ​តាមផ្លូវ​តុលាការ​មាន​អានុភាព​បង្គាប់​ជន​ត្រូវ​ចោទ​ដែល​បាន​នៅក្រៅ​ឃុំ​ឱ្យ​គោរព​នូវ​កាតព្វកិច្ច​មួយចំនួន​ ឬ​ច្រើន​មាន​ដូចខាងក្រោម​៖

-​បុគ្គល​ដែល​ស្ថិតក្រោម​ការត្រួតពិនិត្យ​តាមផ្លូវ​តុលាការ​អាច​ត្រូវបាន​បង្ខំ​មិនឱ្យ​ចេញពី​ព្រំប្រទល់​ដែនដី​ដែល​កំណត់ដោយ​ចៅក្រម​ស៊ើបសួរ​។

-​មិនត្រូវ​ប្តូរ​លំនៅឋាន ដោយ​គ្មាន​ការអនុញ្ញាត​ពី​ចៅក្រម​ស៊ើបសួរ​។

-​មិនត្រូវ​ទៅកាន់​ទីកន្លែង​ខ្លះ ដែល​កំណត់ដោយ​ចៅក្រម​ស៊ើបសួរ​។

-​ត្រូវ​ចូលមក​បង្ហាញខ្លួន​តាម​កាលកំណត់​នៅ​ចំពោះមុខ​អង្គភាព​នគរបាល​ ឬ​កងរាជ​អាវុធហត្ថ​ដែល​ចាត់តាំង​ដោយ​ចៅក្រម​ស៊ើបសួរ​។

-​ត្រូវឱ្យ​ឆ្លើយតប​នឹង​គ្រប់​ការកោះហៅ​ពី​បុគ្គល​គ្រប់រូប ដែល​​ចាត់តាំង​ដោយ​ចៅក្រម​ស៊ើបសួរ​។

-​ត្រូវ​ប្រគល់ជូន​ដល់​ការិយាល័យ​ក្រឡាបញ្ជី គ្រប់​ឯកសារ​បញ្ជាក់​ពី​អត្តសញ្ញាណ​។

-​មិនត្រូវ​បើកបរ​រថយន្ត​។

-​មិនឱ្យ​ទទួល ឬ​ជួប​ជាមួយ​បុគ្គល​មួយចំនួន​ដែល​កំណត់​ចង្អុលបង្ហាញ​ដោយ​ចៅក្រម​ស៊ើបសួរ​។

-​ដាក់​ប្រាក់​ធានា​ដែល​ចំនួន​ប្រាក់​ធានា និង​ថិរវេលា​បង់ប្រាក់​​នេះ​ត្រូវ​កំណត់ដោយ​ចៅក្រម​​ស៊ើបសួរ​ដោយ​ផ្អែកលើ​ធនធាន​របស់​ជន​ត្រូវ​ចោទ​។

-​មិនត្រូវ​កាន់កាប់​ ឬ​យកតាម​ខ្លួន​នូវ​អាវុធ​។ ​ត្រូវ​ប្រគល់​ជូន​ដល់​ការិយាល័យ​ក្រឡាបញ្ជី​នូវ​អាវុធ​ដែល​ជន​ត្រូវ​ចោទ​កាន់កាប់​។

-​ត្រូវប្រគល់​ខ្លួន​ឱ្យ​ពេទ្យ​ពិនិត្យ​ព្យាបាល និង​ជាយថាហេតុ​ដាក់ឱ្យ​ស្ថិតក្នុង​របប​ព្យាបាល​រោគ​ក្នុង​មន្ទីរពេទ្យ​។

-​ហាមឃាត់​ធ្វើ​សកម្មភាព​ខាង​វិជ្ជាជីវៈ​មួយចំនួន​។

ផ្ទុយទៅវិញ​នៅក្នុង​ករណី​ជនត្រូវ​ចោទ​គេចវេះ​ពី​កាតព្វកិច្ច​របស់ខ្លួន​ដោយ​ចេតនា​នៃ​ការត្រួតពិនិត្យ​តាមផ្លូវ​តុលាការ​ចៅក្រម​ស៊ើបសួរ​អាច​សម្រេច​ឱ្យ​ឃុំខ្លួន​ជន​ត្រូវ​ចោទ​ជា​បណ្តោះអាសន្ន​បាន​ទោះបីជា​ទោស​ពន្ធនាគារ ដែល​ត្រូវ​​រង​នោះ​មាន​ថិរវេលា​ប៉ុន្មាន​ក៏ដោយ និង​ទោះបីជា​ជន​ត្រូវចោទ​ត្រូវបាន​ឃុំខ្លួន​បណ្តោះអាសន្ន​មាន​រយៈពេល​ច្រើន​ក៏ដោយ​។ ​(​សូម​រង់ចាំ​អាន​វគ្គ​បន្ត នៅ​សប្ដាហ៍​ក្រោយ​)

អត្ថបទគួរចាប់អារម្មណ៍