The Phnom Penh Post Search

Search form




Logo of Phnom Penh Post newspaper Phnom Penh Post - តើ​ម្ចាស់​ទទួល​ខុសត្រូវ​ឬទេ​ បើ​ឱ្យ​ផ្ទះ​គេ​នៅ តែ​បង្ក​ការខូចខាត​ទ្រព្យ​អ្នកជិតខាង?

តើ​ម្ចាស់​ទទួល​ខុសត្រូវ​ឬទេ​ បើ​ឱ្យ​ផ្ទះ​គេ​នៅ តែ​បង្ក​ការខូចខាត​ទ្រព្យ​អ្នកជិតខាង?

Content image - Phnom Penh Post
លោក​មេធាវី ផុន ធារិន កាលពីពេល​កន្លងមក​។ រូបថត សហការី

តើ​ម្ចាស់​ទទួល​ខុសត្រូវ​ឬទេ​ បើ​ឱ្យ​ផ្ទះ​គេ​នៅ តែ​បង្ក​ការខូចខាត​ទ្រព្យ​អ្នកជិតខាង?

ជាធម្មតា​បើ​ម្ចាស់ផ្ទះ​ណា​ម្នាក់​ធ្វើឱ្យ​​ខូច​ទ្រព្យសម្បតិ្ត​អ្នក​នៅ​ជិតខាង​ខ្លួន គឺ​តែង​ប្រឈមមុខ​នឹង​ផ្លូវច្បាប់​។ ចុះបើ​ម្ចាស់ផ្ទះ​នោះ​ជួល​ ឬក៏​ឱ្យ​កូន​ស្នាក់នៅ​​ហើយ​ត្រូវ​អ្នកស្នាក់នៅ​នោះ​ធ្វើ​ខូចខាត​​សម្បតិ្ត​អ្នកដទៃ តើ​ម្ចាស់ផ្ទះ​ទទួលខុស​ត្រូវ​ឬទេ​? ជុំវិញ​ករណីនេះ​ភ្នំពេញ​ប៉ុស្ដិ៍​​បាន​សុំ​ការពន្យល់​ពី​លោក​មេធាវី ផុន ធារិន ដែល​បម្រើការ​នៅ​ការិយាល័យ​មេធាវី ផុន ធារិន ស្ថិតនៅ​បុរី​ឌឺ​មេគង្គរ៉ូយ៉ាល់​ផ្ទះ លេខ​៧១ ផ្លូវ M08 ភូមិ​ខ្ទរ សង្កាត់​ព្រែកលៀប ខណ្ឌ​ជ្រោយចង្វារ រាជធានី​ភ្នំពេញ​ដែលមាន​ខ្លឹមសារ​ដូចខាងក្រោម ៖

ឧបមាថា លោក​ (​ក​) ​បាន​ប្រគល់​ផ្ទះ​ជា​កម្មសិទ្ធិ​របស់គាត់​ឱ្យ​កូន​ស្នាក់នៅ​បណ្តោះអាសន្ន តែ​គាត់​មិនបាន​រស់នៅ​ជាមួយ​ទេ​។ ​ចៃដន្យ​កូន​គាត់​បង្កឱ្យ​មាន​អគ្គិភ័យ​ឆេះ​ផ្ទះ​នោះ និង​រាលដាល​ឆេះ​ដល់ផ្ទះ​អ្នកជិតខាង​។ ​រឿងនេះ​អ្នក​រងគ្រោះ​បាន​ប្តឹង​លោក​ (​ក​) ​ទារ​សំណង​ព្រោះ​យល់ថា​ផ្ទះ​នោះ​ជា​កម្មសិទ្ធិ​របស់លោក​ (​ក​)​។ ​តើ​លោក​ (​ក​) ​មាន​ចំណែក​ក្នុង​ការទទួល​ខុសត្រូវ​ឬទេ​?

ក្នុងករណីនេះ​យើង​សន្មត​ថា កូន​របស់លោក​ (​ក​) ​ជា​នីតិជន​ (​បុគ្គល​មាន​អាយុ​ចាប់ពី​ ១៨ ​ឆ្នាំ​ឡើង​) ​មាន​កំហុស​ដែល​កើតឡើង​ ដោយសារ​ការខ្ជីខ្ជា និង​ការធ្វេសប្រហែស​ដែល​បណ្ដាលឱ្យមាន​ការខូចខាត​ទ្រព្យសម្បត្តិ​អ្នកដទៃ​។

យោងតាម​មាត្រា​ ៧៤៣ ​នៃ​ក្រម​រដ្ឋប្បវេណី​ព្រះរាជាណាចក្រ​កម្ពុជា​បាន​ចែងថា បុគ្គល​ដែល​បំពាន​ដោយ​ខុសច្បាប់​នូវ​សិទ្ធិ​ ឬ​ផលប្រយោជន៍​របស់​អ្នកដទៃ​ដោយ​កំហុស​ចេតនា​ ឬ​ដោយ​កំហុស​អចេតនា​ត្រូវ​ទទួលខុសត្រូវ​ក្នុង​ការសង​ការខូចខាត​ដែល​កើតឡើង​ដោយ​អំពើ​នោះ​។ ​ផ្អែក​តាម​មាត្រា​ខាងលើនេះ កូន​របស់លោក​ (​ក​) ​ត្រូវ​ទទួលខុស​ត្រូវចំ​ពោះ​អំពើ​របស់ខ្លួន និង​ទទួល​ខុសត្រូវ​សំណង​ដល់​ជនរងគ្រោះ​ដោយ​មិន​ពាក់ព័ន្ធ​ជាមួយ​លោក​ (​ក​) ​ឡើយ​។ ក្នុងករណី​ដែល​កូន​របស់លោក​ (​ក​) ​សមត្ថកិច្ច​បាន​រកឃើញ​ថា​មាន​ចេតនា​បង្កឱ្យមាន​អគ្គិភ័យ​ដែល​បណ្ដាលឱ្យ​ខូចខាត​ទ្រព្យសម្បត្តិ​អ្នកដទៃ កូន​របស់លោក​ (​ក​) ​អាច​នឹង​ទទួល​ខុសត្រូវ​ផ្នែក​ព្រហ្មទណ្ឌ​ផងដែរ​។

ចុះបើ​នគរបាល​ចាប់​កូន​របស់​លោក​ (​ក​) ​ដែលជា​អ្នកបង្ក និង​ត្រូវបាន​តុលាការ​ឃុំខ្លួន​ដាក់ពន្ធនាគារ តើ​ចាត់​ថា​រឿងនេះ​ត្រូវ​បញ្ចប់​ត្រឹមហ្នឹង​ឬ​យ៉ាងណា​?

ក្នុង​ករណីនេះ​កូន​របស់លោក​ (​ក​) ​ត្រូវ​តុលាការ​ផ្ដន្ទាទោស​ដាក់​ពន្ធនាគារ​គឺជា​ការទទួលខុសត្រូវ​ផ្នែក​ព្រហ្មទណ្ឌ​មួយផ្នែក​។ ដោយឡែក​កូនលោក​ (​ក​) ​ត្រូវមាន​កាតព្វកិច្ច​ចំពោះ​ជនរងគ្រោះ​ក្នុង​ការទទួល​ខុសត្រូវ​សំណង​រដ្ឋប្បវេណី​​ផ្សេងៗ ដែល​ខ្លួន​បាន​បង្កឱ្យមាន​ការខូចខាត​។ ​ប្រសិនបើ​កូន​របស់លោក​ (​ក​) ​មិន​អនុវត្ត​កាតព្វកិច្ច​របស់ខ្លួន​នោះ​ជនរងគ្រោះ​នៅតែមាន​សិទ្ធិ​ក្នុង​ការទាមទារ​សំណង​ការខូចខាត​ពី​ជនល្មើស​ (​កូន​របស់លោក ក​) ឬ​អនុវត្តតាម​នីតិវិធី​ដើម្បី​ទាមទារ​សំណង​ការខូចខាត​តាមផ្លូវ​តុលាការ​។

បើទោះជា​កូន​របស់លោក​ (​ក​) ​ជាប់​ពន្ធនាគារ​ក្តី តែ​អ្នករងគ្រោះ​ដោយ​ភ្លើង​ឆេះ​ផ្ទះ​យល់ថា កូន​របស់លោក​ (​ក​) ​រស់នៅ​ជាមួយ​ប្រពន្ធ ដូច្នេះ​តើ​គេ​អាច​ប្តឹង​ទារ​សំណង​ពី​ស្ត្រី​ប្រពន្ធ​ជនបង្ក​បានដែរ​ទេ​?

ក្នុងករណីនេះ​ជនរងគ្រោះ​អាច​ប្តឹង​ទាមទារ​សំណង​រដ្ឋប្បវេណី​ពី​សហព័ទ្ធ​ (​ប្រពន្ធ​) ​របស់​ជនល្មើស​បាន​ដោយ​សំអាង​ទៅលើ​ទ្រព្យសម្បត្តិ ឬ​បំណុល​រួម​របស់លោក​ (​ក​)​។ ​ក្នុង​ករណី​ដែល​ប្រពន្ធ​របស់លោក​ (​ក​) ​មិន​សហការ​ក្នុង​ការដោះស្រាយ​សំណង​ខូចខាត នោះ​ភាគី​ជនរងគ្រោះ​មាន​សិទ្ធិ​អនុវត្ត​សាលក្រម​ ឬ​សាលដីកា​ស្ថាពរ​ ដើម្បី​អនុវត្ត​នីតិវិធី​រឹបអូស​ដោយ​បង្ខំ​លើ​ទ្រព្យ​រួម​របស់លោក​ (​ក​) ​និង​ប្រពន្ធ​បាន​។

ចុះបើ​អ្នកបង្ក​ត្រូវ​ភ្លើង​ឆេះ​ស្លាប់​ទាំង​ ២ ​នាក់​ប្តី​ប្រពន្ធ តើ​រឿងនេះ​ត្រូវ​បញ្ចប់​ត្រឹមនេះ​ឬ​យ៉ាងណា​?

ប្រសិនបើ​ជនបង្ក​ប្ដី និង​ប្រពន្ធ​ស្លាប់​ភាគី​ជនរងគ្រោះ​នៃ​អគ្គិភ័យ​អាចដាក់​ពាក្យស្នើសុំ​ទៅ​តុលាការ​ ដើម្បី​រក្សាទ្រព្យ​ទាំងឡាយ​របស់​ជនបង្ក​ជា​បណ្ដោះអាសន្ន​រហូត​ដរាបណា​សន្តតិ​ជន​ (​អ្នក​​ទទួល​មរតក​) ​របស់​ជនបង្ក​ចេញមុខ​ដោះស្រាយ​ចំពោះ​សំណង់​ទាំងអស់នេះ​។

ក្នុង​ករណី​គ្មាន​សន្តតិជន ឬ​សន្តតិជន​របស់​ជនបង្ក​បដិសេធ​មិន​ទទួលខុស​ត្រូវ​ ឬ​មិន​ទទួលយក​មរតក និង​បំណុល​របស់​ជនបង្ក​នោះ​ជនរងគ្រោះ​អាច​ស្នើសុំ​ទៅ​តុលាការ​ ដើម្បី​អនុវត្ត​ទាមទារ​លើ​សំណង​ចំពោះ​ទ្រព្យសម្បត្តិ​ដែល​បាន​បន្សល់ទុក​ដោយ​ជនបង្ក​ដែល​បាន​បាត់បង់​ជីវិត​៕

អត្ថបទគួរចាប់អារម្មណ៍