ទាក់ទងនឹងប្រធានបទនៃការរួមភេទ និងទោសទណ្ឌនៃការបង្ខំឱ្យនរណាម្នាក់រួមភេទ ឬបង្ខំក្មេងមិនទាន់គ្រប់អាយុឱ្យរួមភេទនេះ លោកមេធាវី ផុន ធារិន នៃការិយាល័យមេធាវី ផុន ធារិន ដែលមានអាសយដ្ឋាននៅបុរីឌឺមេគង្គរ៉ូយ៉ាល់ផ្ទះលេខ ៧១ ផ្លូវ M08 ស្ថិតក្នុងភូមិខ្ទរ សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញបានចូលមកធ្វើការពន្យល់ពីខ្លឹមសារច្បាប់ ដែលមានខ្លឹមសារដូចតទៅ៖
ឧទាហរណ៍ បើបុរសណាម្នាក់បានរួមភេទជាមួយស្ត្រីគ្រប់អាយុដោយមានការព្រមព្រៀងគ្នា ប៉ុន្តែក្រោយមកភាគីស្ត្រីប្តឹងបុរសម្នាក់នោះ។ បើមានការប្តឹងបែបនេះ តើភាគីបុរសនឹងត្រូវមានទោសទេ ខណៈដែលការរួមភេទនោះ កើតឡើងដោយសារការព្រមព្រៀងគ្នា?
នៅក្នុងករណីខាងលើនេះ ប្រសិនបើបុរសម្នាក់បានរួមភេទជាមួយស្រី្តគ្រប់អាយុម្នាក់ ដោយកើតចេញពីការព្រមព្រៀងគ្នា នោះមិនមែនជាបទល្មើសឡើយ។ ផ្ទុយមកវិញក្នុងករណីពេលណាមួយ មិនមានការព្រមព្រៀងគ្នាក្នុងការរួមភេទកើតឡើងដោយការបង្ខិតបង្ខំ ឬការប្រើប្រាស់ហិង្សា គឺជាបទល្មើសរំលោភសេពសន្ថវៈ។
តើការរួមភេទប្រព្រឹត្តទៅលើក្មេងមិនទាន់គ្រប់អាយុ និងការរួមភេទប្រព្រឹត្តទៅលើស្ត្រីគ្រប់អាយុ ឬជាមនុស្សពេញវ័យ តើច្បាប់មានការដាក់ទោសទណ្ឌខុសគ្នាបែបណា?
ផ្អែកតាមមាត្រា ២៣៩ នៃក្រមព្រហ្មទណ្ឌ ព្រះរាជាណាចក្រកម្ពុជាចែងថា នីតិភាពនៃការរួមភេទត្រូវបានកំណត់ចាប់ពីអាយុ ១៥ ឆ្នាំឡើង។ ផ្ទុយមកវិញ ផ្អែកតាមមាត្រា ៤២ នៃច្បាប់ស្ដីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទចែងថា ជនណារួមភេទជាមួយជនដទៃ ដែលមានអាយុតិចជាង ១៥ ឆ្នាំត្រូវផ្តន្ទាទោសដាក់ពន្ធនាគារពី ៥ ឆ្នាំដល់ ១០ ឆ្នាំ។
យោងតាមការចង្អុលបង្ហាញខាងលើភាពពេញវ័យតាមផ្លូវច្បាប់ ចំពោះការរួមភេទត្រូវបានកំណត់ចាប់ពីអាយុ ១៥ ឆ្នាំឡើង។ ដោយឡែក ការរួមភេទទាំងឡាយដែលកើតចេញពីការប្រើប្រាស់អំពើហិង្សា ការបង្ខិតបង្ខំ ការគំរាមកំហែង ឬការប្រើល្បិចកលណាមួយលើដៃគូ ដើម្បីបានរួមភេទជាអំពើរំលោភសេពសន្ថវៈដែលច្បាប់ត្រូវផ្តន្ទាទោសជនល្មើស ដាក់ពន្ធនាគារចន្លោះពី ៥ ឆ្នាំ ទៅ ១០ ឆ្នាំ។
ករណីរួមភេទប្រសិនបើកើតឡើងលើក្មេងស្រីមិនទាន់គ្រប់អាយុ តើនាងអាចប្តឹងទៅនគរបាលដោយខ្លួននាងផ្ទាល់បានទេ? ប្រសិនបើមិនបាន តើនរណាអាចធ្វើជាតំណាងប្តឹងជំនួសបាន?
ក្នុងករណីនេះ ក្មេងខ្លួនឯង ឪពុកម្តាយ អាណាព្យាបាល សាច់ញាតិ ឬអ្នកជិតខាង សុទ្ធតែអាចប្តឹងដោយផ្ទាល់មាត់ ឬលាយលក្ខណ៍អក្សរទៅមេឃុំ កិច្ចការនារីឃុំ មេប៉ុស្តិ៍រដ្ឋបាលឃុំ មន្ត្រីនគរបាលយុត្តិធម៌មូលដ្ឋាន ឬតុលាការ ដើម្បីកសាងសំណុំរឿង និងចំណាត់ការតាមនីតិវិធីច្បាប់លើជនល្មើសបាន។
ចុះបើក្មេងបានព្រមព្រៀងរួមភេទជាមួយដៃគូ តើបុរសនោះមានទោសទេ?
ក្នុងករណីក្មេងមានអាយុចាប់ពី ១៥ ឆ្នាំឡើង បានព្រមព្រៀងដោយស្ម័គ្រចិត្ត នោះបុរសជាដៃគូមិនមានពិរុទ្ធភាពទេ ដោយយោងតាមមាត្រា ២៣៩ នៃក្រមព្រហ្មទណ្ឌ។ ផ្ទុយមកវិញ ទោះបីមានការយល់ព្រមដោយប្រការណាមួយពីកុមារដែលមានអាយុក្រោម ១៥ ឆ្នាំនោះត្រូវបានចាត់ទុកថា បានប្រព្រឹត្តអំពើព្រហ្មទណ្ឌ ដោយយោងតាមត្រា ៤២ នៃច្បាប់ស្ដីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ៕