នៅក្នុងសង្គមកម្ពុជាបច្ចុប្បន្នមានឪពុកម្ដាយខ្លះបានសម្រេចកាត់កាល់កូនខ្លួនឯងចោលដោយលើកយកមូលហេតុផ្សេងៗមកអះអាងដូចជា កូននោះមិនលុះតាមការទូន្មានរបស់ពួកគាត់ ឬក៏ឈានទៅប្រព្រឹត្តអំពើល្មើសផ្សេងៗផ្ទុយនឹងច្បាប់ ដែលមិនអាចគ្រប់គ្រងបាន។ រីឯមធ្យោបាយដែលឪពុកម្ដាយតែងធ្វើគឺការជូនដំណឹងតាមប្រព័ន្ធផ្សព្វផ្សាយមាន កាសែត ទស្សនាវដ្ដី វិទ្យុ បណ្ដាញសង្គម ឬមានករណីខ្លះបានទៅធ្វើលិខិតលាយលក្ខណ៍អក្សរប្រាប់អាជ្ញាធរមានសមត្ថកិច្ចជួយដឹងឮជាដើម...។
ចង់ដឹងថា តើការកាត់កាល់កូនគឺមានចែងក្នុងច្បាប់ដែរឬទេ? ជុំវិញចម្ងល់នេះភ្នំពេញប៉ុស្ដិ៍បានសុំការពន្យល់ពីលោកមេធាវី លី កុសល ដែលមានការិយាល័យបម្រើការនៅផ្ទះលេខ ៤៥Eo ផ្លូវ លេខ ៩ ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញតាមរយៈសំណួរដូចខាងក្រោម៖
តើបច្ចុប្បន្ន កម្ពុជាយើងមានច្បាប់ចែងស្តីពីការកាត់កាល់កូនចោលដែរឬទេ?
បច្ចុប្បន្នកម្ពុជាយើងមិនមានច្បាប់ចែងស្តីពីការកាត់កាល់រវាងកូនបង្កើត និងឪពុកម្តាយបង្កើតវិញនោះទេ គឺច្បាប់មិនទទួលស្គាល់ចំពោះការកាត់កាល់នេះទេ។
តើឪពុកម្តាយមានសិទ្ធិតាមផ្លូវច្បាប់ក្នុងការកាត់កាល់កូនរបស់ខ្លួនចោលដែរទេ?
ក្នុងករណីនេះ ឪពុកម្តាយអាចធ្វើការកាត់កាល់បានតែនៅក្នុងលក្ខណៈស្មុំកូនពេញលេញ និងស្មុំកូនធម្មតាប៉ុណ្ណោះ ប្រសិនបើកូននៅក្នុងបន្ទុកគ្រួសារមិនបានស្តាប់ដំបូន្មានឪពុកម្តាយដោយផ្អែកតាមខ្លឹមសារច្បាប់មាត្រា ១ ០១៦ និងមាត្រា ១ ០២៨ នៃក្រមរដ្ឋប្បវេណី គឺជាការផ្តាច់ទំនាក់ទំនងញាតិរវាង ស្មុំកូនពេញលេញ ឬស្មុំកូនធម្មតា និងឪពុកម្តាយចិញ្ចឹម ហើយការសម្រេចផ្តាច់ទំនាក់ទំនងញាតិនេះទៀតសោតគឺចាំបាច់ត្រូវធ្វើឡើងតាមសេចក្តីសម្រេចរបស់តុលាការ បន្ទាប់ពីមានសេចក្តីសម្រេចពីតុលាការហើយទំនាក់ទំនងញាតិរបស់ស្មុំកូនពេញលេញ ឬស្មុំកូនធម្មតា និងឪពុកម្តាយបង្កើតរបស់ពួកគេ អាចផ្សារភ្ជាប់ជាមួយគ្នាឡើងវិញបាន។
តើឪពុកម្តាយត្រូវធ្វើដូចម្តេចដើម្បីកាត់កាល់កូនរបស់ខ្លួនចោល?
ឪពុកម្តាយមិនអាចធ្វើការកាត់កាល់កូនរបស់ខ្លួនចោលដោយហេតុថា ច្បាប់មិនទទួលស្គាល់ ដោយទំនាក់ទំនងញាតិរវាងកូនបង្កើត និងឪពុកម្តាយបង្កើត នៅតែមានដដែល ហើយនៅសង្គមបច្ចុប្បន្ននេះគេសង្កេតឃើញមានឪពុកម្តាយមួយចំនួនបានធ្វើការកាត់កាល់កូនរបស់ខ្លួន តាមរយ:ការចុះកាសែត វិទ្យុ ទូរទស្សន៍ ឬតាមបណ្តាញទំនាក់ទំនងសង្គមផ្សេងៗគឺគោលបំណងធំបំផុតរបស់ឪពុកម្តាយបង្កើត មិនចង់ឱ្យមានការពាក់ព័ន្ធនឹងទទួលខុសត្រូវនូវអំពើអនីត្យានុកូលរបស់កូន, មិនចង់ឱ្យកូនទទួលមរតកជាដើម តែការកាត់កាល់បែបនេះគឺមិនមានលក្ខណ:ត្រឹមត្រូវ ឬមានអនុភាពតាមផ្លូវច្បាប់នោះទេ។
ចំពោះអំពើរបស់កូនដែលបានប្រព្រឹត្តនូវអំពើអ្វីមួយដែលផ្ទុយនឹងផ្លូវច្បាប់នោះ ប្រសិនបើកូននោះជាអនីតិជនមានអាយុក្រោម ១៨ ឆ្នាំ គឺកូននោះគឺត្រូវស្ថិតនៅក្រោមអំណាចមេបារបស់ឪពុកម្តាយនៅឡើយ ដូច្នេះឪពុកម្តាយត្រូវទទួលខុសត្រូវចំពោះអំពើរបស់កូនខ្លួនដែលបានធ្វើឱ្យមានការខូចខាត ឬបាត់បង់ផលប្រយោជន៍ដល់អ្នកដទៃ។ តែផ្ទុយមកវិញបើកូននោះជានីតិជនដែលមានអាយុលើសពី ១៨ ឆ្នាំឡើងទៅ គឺកូនរបស់គាត់ត្រូវបានច្បាប់ចាត់ទុកថាមានសមត្ថភាពយល់ដឹងហើយត្រូវទទួលខុសនូវអំពើរបស់ខ្លួន ទាំងសំណងរដ្ឋប្បវេណី និងរឿងព្រហ្មទណ្ឌ ព្រោះថា ឪពុកម្តាយ លែងមានករណីយកិច្ចទទួលខុសត្រូវនូវអំពើខុសច្បាប់របស់កូនខ្លួនទៀតហើយ។
តើកូនមានសិទ្ធិប្តឹងតវ៉ាបានដែរទេ នៅពេលដែលឪពុកម្តាយរបស់ខ្លួនប្រកាសកាត់កាល់ខ្លួនចោល?
កូនបង្កើតមិនចាំបាច់ធ្វើការប្តឹងតវ៉ាអ្វីនោះទេ នៅពេលដែលឪពុកម្តាយរបស់ខ្លួនប្រកាសកាត់កាល់ខ្លួនចោលដោយហេតុថា ច្បាប់នៅតែទទួលស្គាល់ដោយទំនាក់ទំនងញាតិរវាងកូនបង្កើត និងឪពុកម្តាយបង្កើតដដែល៕