ភ្នំពេញ៖ បីដូចជាត្បូងតំណក់ទឹកដ៏ភ្លឺរលើបរលោងផុសត្រដែតពីស្រទាប់ផ្កាច័ន្ទក្រឡាក្បាច់រចនាខ្មែរតាក់តែងលើកាយតួអង្គដ៏រស់រវើក ស្នាដៃគំនូរវិចិត្រករក្រៅសាលា លោក ណាក ណយ បានធ្វើឱ្យមហាជនចម្រុះជាតិសាសន៍សម្គាល់បានយ៉ាងច្បាស់ ជាមួយអត្តសញ្ញាណពណ៌ខៀវបៃតងតំណាងធម្មជាតិ និងការច្របាច់បញ្ចូលក្បាច់បុរាណជាសិល្បៈសហសម័យផុសលើផ្ទៃគំនូរទាំងបង្កប់អត្ថន័យ ទាំងស្អាតទាក់ភ្នែក។
តាំងពីកុមារភាព វិចិត្រករមានកំណើតនៅខេត្តសៀមរាប ណាក ណយ តែងតែចូលចិត្តគូសវាសលើសៀវភៅនូវរូបភាពផ្សេងៗ រួចសម្រាំងទុកនូវស្នាដៃល្អឯកផ្ទាល់ខ្លួន។
វិចិត្រករស្វ័យដុសខាត់ឧបនិស្ស័យសិល្បៈខ្លួនឯងរូបនេះ បានរំឭកប្រាប់ ភ្នំពេញ ប៉ុស្តិ៍ ពីចំណុចចាប់ផ្ដើមខ្លួនថា៖ «តាំងពីរៀនថ្នាក់មត្តេយ្យខ្ញុំតែងតែចូលចិត្តកាន់ខ្មៅដៃគូរនេះគូរនោះពេញសៀវភៅ។ ខ្ញុំដឹងមករហូតថា ខ្ញុំចូលចិត្តគំនូរ តែមិនជឿជាក់ថា ខ្ញុំអាចធ្វើបានទេ»។
លោក ណាក ណយ បានរៀបរាប់ទៀតថា៖ «បញ្ចប់បាក់ឌុបនៅឆ្នាំ ២០១៦ ខ្ញុំនៅតែវិលវល់មិនដឹងខ្លួនថា ចង់ធ្វើអីឬស្រឡាញ់អីឱ្យប្រាកដ។ ពេលខ្ញុំស្រាវជ្រាវនៅសាលាភូមិន្ទវិចិត្រសិល្បៈភ្នំពេញ គេផ្ដោតលើគំនូរដូច និងជាគំនូរបុរាណ អ៊ីចឹងខ្ញុំក៏មិនសូវស្រឡាញ់ទៀត ព្រោះខ្ញុំចូលចិត្តបែបគំនូរសហសម័យ»។
លោកក៏សម្រេចចិត្តធ្វើការជំនួសឱ្យការរៀនបន្ត ហើយឆ្លៀតគូរគំនូរបណ្ដើរដោយសន្សំចិត្តធ្វើឱ្យក្ដីស្រមៃក្លាយជាការពិត។
ចាប់តាំងពីឆ្នាំ ២០១៦ ណាក ណយ ចាប់ផ្ដើមសន្សំស្នាដៃឆ្នើមរបស់ខ្លួន។ បើទោះជាកាលណោះមិនមានអ្នកទិញស្នាដៃរបស់លោកក៏ដោយ ក៏លោកតែងរំពឹងថា ទឹកដៃទាំងនេះជាភ័ស្តុតាងបង្ហាញដល់អ្នកស្នេហាគំនូរសិល្បៈដែលអាចទំនុកបម្រុងរូបលោកឱ្យបោះជំហានជាសិល្បករសហសម័យ ១ រូប។
យុវជនវ័យ ២១ ឆ្នាំរូបនេះបានបន្តថា៖ «រហូតដល់ឆ្នាំ ២០១៨ ខ្ញុំសន្សំបាន ១០ ផ្ទាំង ហើយក៏ដើរពីហាង ១ ទៅ ១ ដើម្បីសុំគេដាក់តាំងស្នាដៃក៏បានព្យាយាមទាក់ទងទៅភ្នំពេញដែរ។ ពេលនោះមិនមានអ្នកទទួលខ្ញុំទេរហូតដល់ជួបហាងកាហ្វេ Red Fox Espresso cafe ដែលគេអនុញ្ញាតឱ្យខ្ញុំតាំងនៅហាងរបស់គេ ៣ ខែ ខ្ញុំសប្បាយចិត្តណាស់»។
ដូចពាក្យស្លោកថា «ព្យាយាមគង់បានសម្រេច»។ ការតាំងពិព័រណ៍លើកនោះ យុវជន ណាក ណយ ទទួលបានជោគជ័យ រហូតវិវឌ្ឍខ្លួនជាសិល្បករម្នាក់ក្នុងចំណោមវិចិត្រករចម្រុះជាតិសាសន៍នៅវិចិត្រសាល Tribe Cambodia ទឹកដីសៀមរាបអង្គរក្នុងឆ្នាំ ២០១៨។
ស្នាដៃគំនូរសហសម័យរបស់ ណាក ណយ មានភាពប្លែកពីរូបគំនូរដទៃដោយការគូរភាពស្រមើស្រមៃជាសណ្ឋានស្លឹក ផ្កា ស្រកា ត្បូង ដូចប៉ាក់ឌិន ក្រោមឥទ្ធិពលពណ៌ធម្មជាតិចម្បងគឺ បៃតង និងខៀវ។
រយៈពេលជាង ៣ ឆ្នាំហើយ ដែលយុវជន ណាក ណយ ធ្វើការនៅ Tribe Cambodia ជាមួយបទពិសោធធ្លាប់បានតាំងពិព័រណ៍ស្នាដៃទាំងនៅរាជធានីភ្នំពេញ និងសៀមរាបប្រមាណជា ៨-៩ ដងរួចមក។
គំនូររបស់លោកទទួលបានការគាំទ្រ និងជាវដោយអតិថិជនដែលភាគច្រើនជាភ្ញៀវបរទេស។ លោកបានឱ្យដឹងថា គំនូរសហសម័យដ៏គួរឱ្យពេញចិត្តជាងគេ គឺស្នាដៃថ្មីបំផុតរបស់លោក ដែលស្ដែងពីការវិវឌ្ឍនៃទឹកដៃចុងក្រោយបង្អស់។ គំនូរនោះមានឈ្មោះថា មាតាផែនដី «Mother Earth» មានទំហំ ២ ម៉ែត្រ ៤ ជ្រុង និងតម្លៃជាង ៥ ០០០ ដុល្លារ។
ណាក ណយ ធ្លាប់គូរទាំងលើក្រដាស ជញ្ជាំង និងក្រណាត់ ដោយស្នាដៃនីមួយៗបង្កប់នូវអត្ថន័យស្ដីពីបញ្ហាសង្គមគ្រួសារ រឿងរ៉ាវរបស់ស្រ្តី ការលើកទឹកចិត្តនារី និងក្រសែភ្នែកមនុស្សក្នុងសង្គមសម្លឹងមើលមកកាន់ស្ត្រីបច្ចុប្បន្ន។
សិល្បករសហសម័យដែលធ្លាប់បានចូលរៀនសាលាហ្វារពន្លឺសិល្បៈបាន ១ ខែកន្លះ ក៏ត្រូវផ្អាកវិញ រូបនេះបានពន្យល់ថា៖ «ទី១ ដោយសារក្បាច់ខ្ញុំមានផ្កាមានលក្ខណៈទន់ភ្លន់គូរជាមួយស្រ្តីសមជាង។ ទី២ គឺដោយសារខ្ញុំបានកម្លាំងចិត្តពីម្ដាយខ្ញុំដែលគាត់ខិតខំចិញ្ចឹមកូន និងដើម្បីគ្រួសារខ្លាំង។ ពេលមើលឃើញរឿងរ៉ាវជីវិតគាត់ ខ្ញុំចាប់ផ្ដើមគូររឿងគាត់ព្រោះគាត់ជាស្ត្រីដែលតស៊ូគ្រប់រឿងដែលគាត់ធ្វើ»។
ក្នុងអាជីពជាអ្នកសិល្បៈ វិចិត្រករវ័យក្មេង ណាក ណយ ធ្លាប់លក់រូបបានជាង ១០០ ផ្ទាំង គិតទាំងគំនូរបោះពុម្ពមានកំណត់។
យុវជនរូបនេះរំឭកប្រាប់ថា៖ «រឿងដែលល្អបំផុតនៅពេលបានក្លាយជាវិចិត្រករ គឺខ្ញុំបានរស់នៅជាមួយក្ដីស្រឡាញ់ ក្ដីស្រមៃដែលមានតាំងពីតូចគឺអាជីពជាអ្នកសិល្បៈ និងបានបញ្ចេញមតិយោបល់របស់ខ្លួនឯងទៅកាន់សង្គមតាមរយៈគំនូរ»។
នៅថ្ងៃអនាគត ណាក ណយ រំពឹងថា ខ្លួននឹងអាចមានឈ្មោះបោះសំឡេងទៅក្រៅប្រទេសក៏ដូចជាពង្រីកមហិច្ឆតាប្រឡូកនៅក្នុងវិស័យហ្វេស្សិន ដោយសារលោកប្រាថ្នាចង់ឃើញស្នាដៃរបស់ខ្លួនមានជីវិតរស់រវើកនៅក្រៅផ្ទាំងគំនូរ។
ជាអ្នកសិល្បៈក្រៅសាលា តស៊ូរហូតដល់មានការទទួលស្គាល់ស្នាដៃគំនូរ ណាក ណយ ក៏ចង់ផ្ដាំទៅអ្នកមានឧបនិស្ស័យដូចជារូបលោកថា៖ «បើគាត់ស្រឡាញ់ហើយកុំឆាប់បោះបង់ ត្រូវតែមានភាពអត់ធ្មត់ ព្រោះខ្ញុំឃើញក្មេងក្រោយៗ អ្នកដែលទើបប្រឡូកថ្មីគាត់មិនសូវមានភាពអត់ធ្មត់ប៉ុន្មានទេ។ ពេលគូរបានគាត់ចង់តែលក់ឱ្យបាន តែវាមិនអាចទៅរួចទេ ព្រោះការងារនេះចំណាយពេលរាប់ឆ្នាំទម្រាំគេមើលឃើញយើង ឃើញបំណិនយើង»។
ព័ត៌មានបន្ថែមអាចទំនាក់ទំនង វិចិត្រករ ណាក ណយតាមគេហទំព័រហ្វេសប៊ុក @naknoy.art៕