.jpg)
តារាចម្រៀងបទអូរីជីណល អ្នកនាង អេដា ដែលបានដកឃ្លាពីសង្គម និងអាជីពសិល្បៈ ដោយសារជំងឺបាក់ទឹកចិត្ត។
ភ្នំពេញ៖ កំពុងរះលើវិថីបទចម្រៀងអូរីជីណល តារាចម្រៀងចេះទាំងតែងនិពន្ធ លេងឧបករណ៍ភ្លេង និងច្រៀង អ្នកនាង អេដា ស្រាប់តែបាត់ខ្លួនពីពិភពសិល្បៈ ដោយសូម្បីតែគ្រប់បណ្ដាញសង្គមដែលនាងធ្លាប់តែបង្ហោះរូប និងសំណេរក៏ប្រែជាអសកម្មឈឹង។
ទើបតែប៉ុន្មានម៉ោងមុននេះ តារាចម្រៀងអូរីជីណលម្ចាស់បទ «នៅទីនេះមានមនុស្សខូចចិត្ត» បទ «ភ្លើង» និងបទ «ពីរនាក់បានហើយ» និងបទចម្រៀងចុងក្រោយគឺបទ «មានអ្នកថែឬនៅ?» អ្នកនាង គ្រួច សចរិយា ហៅ អេដា បានដាច់ចិត្តលាតត្រដាងថា មូលហេតុដែលនាំឱ្យនាងផ្ដាច់ខ្លួនពីពិភពសិល្បៈ និងសង្គមមនុស្សគឺដោយសារតែជំងឺផ្លូវចិត្តអូសបន្លាយយ៉ាងយូរ។
តារាចម្រៀងបទអូរីជីណល អ្នកនាង អេដា និងតារាចម្រៀង មាស សុខសោភា។
ក្នុងសំណេរជាភាសាអង់គ្លេសទើបបង្ហោះអំបាញ់មិញនេះ តារាចម្រៀង អេដា បានបរិយាយថា៖ «សួស្ដី…ខ្ញុំសង្ឃឹមថាអ្នកទាំងអស់គ្នាសុខសប្បាយណាស់ និងមានសុខភាពល្អទាំងអស់គ្នា! ជាដំបូង ខ្ញុំសូមអភ័យទោសដល់ស្ពុនស័រ (អ្នកឧបត្ថម្ភកម្មវិធី) និងទីភ្នាក់ងារទាំងអស់ សម្រាប់អវត្តមាន និងភាពអសកម្មរបស់ខ្ញុំ ដោយមិនឆ្លើយតបសារ ហើយថែមទាំងលប់ចោលនូវមាតិកាពាណិជ្ជកម្ម ព្រមទាំងការបង្ហោះលក្ខណៈ paid partnership លើបណ្ដាញសង្គម។ ខ្ញុំក៏សូមអភ័យទោសដល់អ្នកគាំទ្រខ្ញុំទាំងអស់ ដែលខ្ញុំបានលប់ចោលនូវរូបថត និងខ្លឹមសារបង្ហោះទាំងអស់ ដែលពួកគេធ្លាប់បានចុច Like និងបញ្ចេញមតិ Comment ដោយសារអ្វីៗទាំងនោះប្រហែលជាធ្លាប់បានជំរុញពួកគេ ហើយក៏ជាទម្លាប់ដែលពួកគេធ្លាប់ផ្សារភ្ជាប់ទំនាក់ទំនងជាមួយខ្ញុំ…»។
អ្នកនាង អេដា បានដាច់ចិត្តទម្លាយមូលហេតុដែលធ្វើឱ្យនាងសម្ងំរស់នៅយ៉ាងស្ងប់ស្ងាត់ ដោយសារតែវិបត្តិជំងឺផ្លូវចិត្ត។
ក្នុងសំណេរដ៏វែងនោះផងដែរ តារាចម្រៀងអូរីជីណល អ្នកនាង អេដា បានរៀបរាប់បន្តទៀតថា៖ «ខ្ញុំបាននឹងកំពុងតស៊ូនឹងបញ្ហាជំងឺបាក់ទឹកចិត្ត និងអារម្មណ៍អន្ទះសារច្របូកច្របល់ជាយូរណាស់មកហើយ រហូតវាក្លាយទៅជាការជម្នះដ៏សាមញ្ញដែលខ្ញុំត្រូវតែប្រឈមនឹងវា។ ខ្ញុំជឿថា អ្នកទាំងអស់គ្នាមួយចំនួនប្រហែលជាធ្លាប់ឆ្លងកាត់ដូចជាខ្ញុំដែរ។ ប៉ុន្តែក្នុងវេលាកន្លងមកផងដែរ មានពេលខ្លះបញ្ហាជំងឺផ្លូវចិត្តបានវាយប្រហារខ្ញុំខ្លាំងពេករហូតដល់ខ្ញុំបាត់បង់ភាពម្ចាស់ការលើខ្លួនឯង ពុំអាចគ្រប់គ្រងខ្លួនឯងដោយងាយស្រួលបាន។ ខ្ញុំពិតជាកំពុងតែតទល់នឹងបញ្ហាជំងឺបាក់ទឹកចិត្ត អារម្មណ៍អន្ទះសារច្របូកច្របល់ និងបញ្ហាសុខភាព ល្វើយល្ហិតល្ហៃ ហើយវាពិតជាពិបាកក្នុងការពិពណ៌នាឱ្យងាយស្ដាប់ណាស់…»។
អ្នកនាង អេដា និងម្ចាស់ស្នេហ៍សញ្ជាតិអាមេរិក លោក អេឡិន។
តារាចម្រៀងធ្លាប់ហែលឆ្លងជីវិតអាពាហ៍ពិពាហ៍កាលជិត ១០ឆ្នាំមុន អ្នកនាង អេដា បានរៀបរាប់បន្តថា៖ «មានពេលខ្លះ ខ្ញុំមិនអាចបើកចិត្តឆ្លើយសំណួរ ទាំងអារម្មណ៍ខ្ញុំក្ដុកក្ដួលទប់ទឹកភ្នែកមិនបាន ហើយខ្ញុំលែងមានអារម្មណ៍ជឿជាក់ បាត់បង់ភាពច្នៃប្រឌិត លែងទ្រាំទ្រនឹងសម្លេងរំខានបាន លែងអាចគិតពីទំនួលខុសត្រូវការងារ លែងអាចចូលចុះក្នុងសង្គម បាត់បង់ចំណង់អាហារ មិនអាចសូម្បីតែបើកមើល IG និង FB ព្រោះតែអារម្មណ៍ច្របូកច្របល់មិននឹងនរបារម្ភខ្លាចមតិ និងទស្សនៈអ្នកដទៃមកលើខ្លួនឯង…»។
តារាស្រីរាងតូចច្រឡឹងវ័យសាមស្ដើងរូបនេះ បានពិពណ៌នាអាការៈរបស់នាងទៀតថា៖ «ខ្ញុំលែងចង់ញ៉ាំអ្វីទាំងអស់ សូម្បីតែរបស់ខ្ញុំចូលចិត្តញ៉ាំបំផុត។ កីឡា និងសកម្មភាពដែលខ្ញុំធ្លាប់ចូលចិត្តធ្វើ ក៏ខ្ញុំល្វើយនឹងធ្វើវា ហើយខ្ញុំមានតែចំណាយពេលពីមួយថ្ងៃទៅមួយថ្ងៃសោកស្ដាយនូវអ្វីដែលបានកើតឡើង ហើយស្ដាយថាខ្ញុំគួរតែអាចកែកុនអតីតកាលឱ្យប្រសើរជាងនេះ ហើយអ្វីដែលសំខាន់បំផុតនោះ គឺខ្ញុំមានបញ្ហាគេងមិនលក់ធ្ងន់ធ្ងរ។ ខ្ញុំពិតជាខ្លាច និងអន្ទះសារក្នុងចិត្ត ភ័យថាប្រសិនបើស្ថានភាពខ្ញុំរឹតតែយ៉ាប់យឺនជាងនេះ ខ្ញុំខ្លាចខ្ញុំបាត់បង់ភាពជាខ្លួនឯងទាំងស្រុង…»។
តារាចម្រៀង អេដា មានទេពកោសល្យនិពន្ធ លេងឧបករណ៍ភ្លេង និងច្រៀង។
ក្នុងស្ថានភាពនេះដែរ អ្នកនាង អេដា ក៏បានបញ្ជាក់ដែរថា នាងបានស្វែងរកជំនួយ និងបានជួបអ្នកជំនាញចិត្តសាស្ត្រ ព្រមទាំងកំពុងប្រើប្រាស់ឱសថតាមវេជ្ជបញ្ជា។
ខណៈពេលកំពុងតែផ្ដាច់ខ្លួនពីសង្គម និងអាជីពសិល្បៈព្រោះតែបញ្ហាផ្លូវចិត្តនេះ អ្នកនាង អេដា ក៏បានប្រាប់ផងដែរថា៖ «ខ្ញុំអាចនិយាយជាមួយដៃគូ និងមនុស្សជិតដិតខ្លាំងតែប៉ុន្មាននាក់ប៉ុណ្ណោះ។ អរគុណពួកគេដែលមិនធ្វើឱ្យខ្ញុំមានអារម្មណ៍ឯការក្នុងការជម្នះជំងឺផ្លូវចិត្តនេះ»។
តារាចម្រៀងបទអូរីជីណល អ្នកនាង អេដា ដែលធ្លាប់តែសកម្មនឹងបញ្ដាញសង្គម និងកម្មវិធីសិល្បៈនានា។
ក្រោពីបរិយាយប្រាប់ស្ថានភាពសុខភាពផ្លូវចិត្ត តារាចម្រៀងអូរីជីណលរូបនេះក៏បានទទូចផងដែរថា៖ «អ្វីដែលខ្ញុំស្នើសុំពេលនេះគឺ សូមមេត្តាទុកឱ្យខ្ញុំបានដកឃ្លាពីអ្វីៗគ្រប់យ៉ាងដែលខ្ញុំបានកំពុងធ្វើ ហើយសូមមេត្តាកុំវាយតម្លៃខ្ញុំ និងមនុស្សមានវិបត្តិផ្លូវចិត្តដទៃទៀត ហើយសូមមេត្តាយកចិត្តទុកដាក់លើមនុស្សជាទីស្រឡាញ់របស់អ្នកប្រសិនបើពួកគេមានជំងឺបាក់ទឹកចិត្តដោយមិនដឹងខ្លួន និងជំរុញឱ្យពួកគេជឿជាក់ស្វែងរកជំនួយពីអ្នកជំនាញផ្លូវចិត្ត។ សម្រាប់រូបខ្ញុំផ្ទាល់ វាពិតជាលំបាកខ្លាំងណាស់ ខ្ញុំពិបាកនឹងបង្ហាញឱ្យឃើញនូវស្ថានភាពនេះណាស់ ហើយខ្ញុំសង្ឃឹមថាខ្ញុំនឹងបានសប្រសើរឡើង និងជម្នះលើជំងឺផ្លូវចិត្តនេះបាន»។
នៅចុងបញ្ចប់នៃសារដ៏វែងអន្លាយនេះ អ្នកនាង អេដា ក៏បានបញ្ជាក់ថា៖ «នេះជាជំហានដំបូងរបស់ខ្ញុំក្នុងការជាសះស្បើយ គឺការបើកចិត្តបរិយាយរឿងរ៉ាវនេះ។ ខ្ញុំសូមទោស និងអរគុណអ្នកទាំងអស់គ្នា។ សូមឱ្យមានសុខសប្បាយទាំងអស់គ្នា»៕
អ្នកនាង អេដា និងម្ចាស់ស្នេហ៍សញ្ជាតិអាមេរិក លោក អេឡិន។
សារបរិយាយពីស្ថានភាពសុខភាពផ្លូវចិត្តរបស់អ្នកនាង អេដា ដែលទើបតែបង្ហោះប៉ុន្មានម៉ោងមុននេះ។
