.jpg)
ភ្នំពេញ៖ ក្រៅពីអាជីពសិល្បៈតារាចម្រៀងយុវវ័យដែលប្រឡូកលើវិថីសិល្បៈ ១០ ឆ្នាំហើយនោះ កញ្ញា អ៊ីវ៉ា នៅសង្វាតរកចំណូលបន្ថែមពីហាងអាហារ សម្លៀកបំពាក់ គ្រឿងសម្អាងក្រោមស្លាកយីហោ អ៊ីវ៉ា សប ដែលស្ថិតនៅផ្លូវជាតិលេខ ៤ ក្រុងច្បារមនទឹកដីខេត្តកំពង់ស្ពឺ។
ភាពសកម្មនឹងការផ្សព្វផ្សាយម្ហូបអាហាររបស់នាង បែរជាធ្វើឱ្យជនអគតិមួយចំនួនកើតគំនិតរិះគន់ថា តារាចម្រៀងកេរ្តិ៍ឈ្មោះល្បីគួរសមរូបនេះបែរជាមកបង្ហោះលក់បុកល្ហុងរាល់ថ្ងៃអ៊ីចឹង?
ឆ្លើយតបនឹងចម្ងល់នេះ តារាចម្រៀងរូបស្រស់កញ្ញា ឃិន ស្រីនាថ ហៅ អ៊ីវ៉ា បានបរិយាយតបវិញថា៖ «មានអ្នកនិយាយថាផុសលក់បុកល្ហុងដដែលៗរាល់ថ្ងៃអត់ខ្មាស់គេទេ? មានអ្នកខ្លះទៀតនិយាយថា ធ្លាក់ខ្លួនហើយមើលទៅបានមកលក់អ៊ីចឹង»។
តារាចម្រៀងសាច់សខ្ចីមានកំណើតនៅទឹកដីខេត្តកំពង់ស្ពឺរូបនេះបានបកស្រាយថា៖ «ចាស រកស៊ីអត់មានអីត្រូវខ្មាស់គេផង ឱ្យតែសច្ចៈទៀងត្រង់ ហើយផុសរាល់ថ្ងៃហ្នឹងដោយសារតែធ្វើហាងហើយបើកលក់មិនទាន់កើតព្រោះកូវីដ មិនទាន់ស្ងាត់ក៏នៅតែបន្តផុសលក់ដោយការវេចខ្ចប់។ បើមិនឱ្យខ្ញុំផុសម៉េចមានអ្នកដឹងថាខ្ញុំលក់ទៅ? សម័យនេះ សម័យអនឡាញណាចាស!»។
តបទៅនឹងការដៀមដាមថា អាជីពសិល្បៈរបស់តារាស្រីរូបនេះទំនងជាអាប់រស្មីបានជា អ៊ីវ៉ា មកចាប់ត្រឹមរបរលក់បុកល្ហុងនៅទឹកដីខេត្តកំពង់ស្ពឺនោះ ស្រីស្រស់និយមតែងខ្លួនបែបឃ្យូតៗរូបនេះបានលើកឡើងថា៖ «មិនមែនទាល់តែលក់ពេជ្រលក់ឡាន ឬលក់របស់ថ្លៃៗទើបឡូយមិនធ្លាក់ខ្លួនធ្លាក់កូដនោះទេ។ ខ្ញុំរកតាមសមត្ថភាពខ្ញុំ។ មុខរបរអីក៏មានតម្លៃដែរឱ្យតែត្រឹមត្រូវ មិនបោកប្រាស់គេ»។
តារាចម្រៀង អ៊ីវ៉ា បានលើកហេតុផលថា៖ «យើងសាកក្រលេកមើលទៅអ្នកមានៗផង គេមានហើយគេនៅតែខំ។ ចុះបើខ្ញុំមិនមានផងមិនឱ្យខ្ញុំខំយ៉ាងម៉េចទៅ? បានលុយណាចាយ? ច្រៀងក៏នៅតែច្រៀង រកស៊ីក៏រកស៊ី ធ្វើការងារក៏ធ្វើ អាធំផ្គុំដោយអាតូចណា»។
តារាចម្រៀងស្រីស៊ូរស់នៅទឹកដីកំពង់ស្ពឺមិនរើមករស់នៅហ៊ឺហារឯទីក្រុងភ្នំពេញរូបនេះ បានបញ្ចប់សេចក្ដីថា៖ «ណ្ហើយខ្ជិលរៀបរាប់ច្រើន ចម្លើយមានតែប៉ុណ្ណឹងទេណាបងចែៗខាងចេចចូចអូចអេច តិចទៀតដល់ម៉ោងផុសលក់បុកល្ហុងទៀតលូវហើយ ហាហា អាជីណូម៉ូតុ»៕
