.jpg)
តារាចម្រៀងស្រីកញ្ញា ស៊ូ ស៊ីរីកា កាន់តែមានរាងស្អាត។ រូបថត អុីនស្តាក្រាម, តារាចម្រៀងស្រីកំពុងឡើងកូដនៅលើទ្រនំថោនកញ្ញា ស៊ូ ស៊ីរីកា។ រូបថត ហេង ជីវ័ន
ភ្នំពេញ៖ ប្រិយមិត្តគាំទ្រភ្ញាក់ផ្អើលទៅនឹងភាពប្រែប្រួលរបស់តារាចម្រៀងស្រីកំពុងឡើងកូដនៅលើទ្រនំថោន ដែលនាពេលថ្មីៗនេះ កញ្ញា ស៊ូ ស៊ីរីកា បង្ហាញនៅតាមបណ្តាញសង្គមអ៊ីនស្តាក្រាម និងហ្វេសប៊ុក។
ជាមួយនឹងរូបរាងស្គមជាងមុន ក្នុងឈុតរ៉ូបខ្មៅរឹបចេញរូបរាង ហើយរូបសម្រស់វិញ ក៏កាន់តែស្រស់ស្អាត តារាចម្រៀងស្រីរូបនេះ ស៊ូ ស៊ីរីកា ក៏បង្ហើរសារយ៉ាងខ្លីជាភាសាអង់គ្លេស ដែលប្រែសម្រួលជាភាសាខ្មែរថា៖ «រីករាយនឹងជីវិតខ្លួនឯង គ្មានពេលទំនេរ Drama ទេ!»។ រំពេចនោះ មានអ្នកគាំទ្រជាច្រើនបានលាន់មាត់សរសើរគ្រប់ៗគ្នា សឹងតែប្រើនូវពាក្យពេចន៍តែមួយថា៖ «អីយ៉ា! ពិតជាស្អាតមែនទែន កញ្ញា ស៊ីរីកា!» ខណៈម្ចាស់សាមីខ្លួនវិញ ក៏គ្មានពាក្យច្រើនក្រៅពីពាក្យថា៖ «អរគុណ»។
គួររំឭកដែរថា កាលពីឆ្នាំ ២០២០ គ្រាន់តែបានចេញបទចម្រៀងថ្មីមានចំណងជើងថា «ជំនូន» ដែលជាការបកស្រាយដោយតារាចម្រៀងនៅទ្រនំថោន កញ្ញា ស៊ូ ស៊ីរីកា និងលោក ប៊ូអូប៊ី ស្ថិតនៅក្នុងសមិទ្ធផលរួមគ្នារវាងកិច្ចសហការផលិតកម្មថោន និង GMM ទទួលបាននូវការចាប់អារម្មណ៍ពីមហាជនទាំងការសរសើរ និងការបង្អាប់ ក្រោយពីបានប្រកាសពីកិច្ចព្រមព្រៀងគ្នានោះមក។
គ្រាន់តែតារាចម្រៀងស្រីសំឡេងផ្អែមពីរោះ កញ្ញា ស៊ូ ស៊ីរីកា បង្ហោះបទ «ជំនូន» នៅតាមហ្វេសប៊ុកខ្លួន ដោយមានសារបានបញ្ជាក់ថា៖ «សូមស្វាគមន៍បទចម្រៀងដំបូង ដែលជាកិច្ចសហការរវាងផលិតកម្ម Town និង GMM Grammy បទ «ជំនូន-The Gifts»។ សម្រាប់បងប្អូនមានចម្ងល់រឿងបទថ្មីនាងខ្ញុំ ដែលសហការជាមួយផលិតកម្ម GMM របស់ប្រទេសថៃ អាចសួរបានដោយរីករាយឆ្លើយ»។
ក្រៅពីមានការចូលចុច Likes បង្ហាញពីការពេញចិត្តយ៉ាងច្រើនចំពោះបទ «ជំនូន» ដែលជាទម្រង់បទចម្រៀងមានការសហការគ្នារវាងផលិតកម្មនៃប្រទេស ២ ផ្សេងគ្នានោះ ក៏បញ្ចេញជាមតិទាំងសរសើរផង និងបែបបង្អាប់ផង តាមហ្វេសប៊ុក។
ភាគច្រើនគេឃើញមានមតិសរសើរ និងបង្ហាញពីទឹកចិត្តគាំទ្របទចម្រៀងរបស់តារាផលិតកម្មថោន ដោយការលើកឡើងថា៖ «ពិតជាប្លែកមែន! ធ្លាប់តែឃើញបែបកម្សត់ និងសំឡេងបែបខ្ពស់ម្តងនេះ ប្លែកពិតជាទាក់ទាញពីរោះណាស់អត្ថន័យជ្រាលជ្រៅសម្រាប់អ្នកមានប្ដីប្រពន្ធ។ ពីរោះខ្លាំងណាស់ បង ស៊ីរីកា ស្រឡាញ់ពេញបេះដូង ហើយកាយវិការទាំងការស្លៀកពាក់ ស័ក្តិសម ហើយស៊ីជាមួយនឹងបទ (ជំនូន) ណាស់ ហើយនៅខាងក្រៅក៏ស្អាតទៀត។ ខ្ញុំសូមគាំទ្រគ្រប់ទម្រង់សិល្បៈចម្រៀង និងក្បាច់រាំ ដែលបង្ហាញពីវប្បធម៌របស់ជាតិយើង»។
យ៉ាងណាក៏មានអ្នករិះគន់បែបបង្អាប់ផងដែរ ចំពោះការចេញចម្រៀងបទ «ជំនូន» នេះដោយមានអ្នកលើកឡើងចំៗថា៖ «បើអត់មានសហការទេ ប្រហែលគ្មានបទចេញទៀតទេ មើលទៅ town ហ្នឹង។»៕
