ក្រុងសាន់ហ្វ្រាន់ស៊ីស្កូ៖ កម្មវិធីណាត់ជួបស្នេហ៍តាមទូរស័ព្ទ Tinder កាលពីថ្ងៃអង្គារ បានបន្ថែមជម្រើសពីរទៀតសម្រាប់អ្នកស្គាល់គ្នាពីចម្ងាយមុនពេលឈានដល់ការណាត់ជួបក្នុងសម័យកាលកូវីដនេះ។
នាយកប្រតិបត្ដិ Jim Lanzone បានឱ្យដឹងអំឡុងពេលរៀបរាប់ត្រួសៗពីជម្រើសថ្មីនេះថា៖ «មនុស្សសម័យឥឡូវចង់ចំណាយពេលស្គាល់គ្នាពីចម្ងាយសិនមុនពេលសម្រេចចិត្ដថា ពួកគេគួរជួបគ្នាដោយផ្ទាល់ឬយ៉ាងណា»។
កម្មវិធីទូរស័ព្ទស្វែងរកគូស្រករ មិនថា វាគ្រាន់តែជាស្នេហាមួយគ្រា ឬគូគាប់ប្រចាំជីវិត បានបង្ហាញមុខងារថ្មីៗជាច្រើន រួមមាន «Hot Takes» ជាសំណួរចម្លើយជ្រើសរើសដើម្បីឱ្យប្រាកដថា តើ «សារញ៉ែគ្នា» របស់អ្នកប្រើប្រាស់វាស៊ីមេទ្រីគ្នាកម្រិតណា។
Tinder ក៏កំពុងផ្ដល់ជម្រើសបន្ថែមឃ្លីបវីដេអូដើម្បីអនុញ្ញាតឱ្យអ្នកប្រើប្រាស់បង្ហាញពីដំណើរជីវិតត្រួសៗ ចំណុចគួរឱ្យចាប់អារម្មណ៍ ឬការផ្សងព្រេងរបស់ខ្លួន។
យោងតាម Lanzone បានឱ្យដឹងថា ពេលវិបត្ដិកូវីដបង្ខំឱ្យមនុស្សរក្សាគម្លាតសុវត្ថិភាពពីគ្នា រួមទាំងការរៀនសូត្រ និងទំនាក់ទំនងក្នុងសង្គម កម្មវិធីទូរស័ព្ទនេះបានផ្ដល់នូវឱកាសបង្កើតទំនាក់ទំនងកាន់តែស៊ីជម្រៅលើអនឡាញមុនពេលសម្រេចជួបមុខគ្នាផ្ទាល់។
លោកបានបន្ដថា៖ «យុវជនសម័យបច្ចុប្បន្នប្រាថ្នាធ្វើអ្វីៗខុសប្លែកពីមុនបន្ដិច ដែលមានសារសំខាន់ និងមិនសូវជួបមុខគ្នាផ្ទាល់ឡើយ។ ទំនោរសម្រាប់តែយុវវ័យនេះ កើតឡើងតាំងពីមុនកូវីដម្លេះ ហើយដល់ពេលកូវីដចូលមក វាពេញនិយមគ្រប់វ័យទាំងអស់»។
សម័យក្មេងជំនាន់ថ្មី (Gen Z) ដែលសំដៅលើមនុស្សអាយុខ្ទង់ ២០ ឆ្នាំ មានចំនួនអ្នកប្រើប្រាស់ Tinder ជាងពាក់កណ្ដាល។ នេះបើយោងតាមក្រុមហ៊ុនបានឱ្យដឹងដូច្នេះ។
លោក Lanzone បានលើកឡើងថា៖ «តម្រូវការបឋមសម្រាប់មនុស្សគឺជួបមុខគ្នាផ្ទាល់ និងទាក់នងគ្នាក្នុងពិភពដ៏ពិតប្រាកដ។ សំណួរសួរថា តើពួកគេត្រូវឈានដល់ដំណាក់កាលនេះបានយ៉ាងដូចម្ដេច និងឧបករណ៍អ្វីខ្លះដែលពួកគេគួរប្រើដើម្បីមានឱកាសជួបគ្នាផ្ទាល់»។
Tinder រកចំណូលពីការចុចជាវ (subscriptions) ដែលផ្ដល់នូវមុខងារច្រើនជម្រើសជាងកម្មវិធីឥតគិតថ្លៃតាមបែបមូលដ្ឋាន។ កម្មវិធីនេះត្រូវបានដាក់ឱ្យដំណើរការនៅប្រមាណ ១៩០ប្រទេស និងដែនដី។
កម្មវិធីរកគូស្រករត្រូវបានស្គាល់ជាប្រព័ន្ធពាណិជ្ជកម្មពីការស្វែងរកដៃគូ និងទាក់ទងគ្នាតាមអនឡាញ៕ AFP/HR