ក្រុងប៉ារីស៖ ទោះក្លាយជាមនុស្សរុក្ខជាតិ ជាមួយជំងឺប៉ះពាល់ដល់ប្រព័ន្ធខួរក្បាល និងសរសៃប្រសាទ ដូចលោក Stephen Hawking មិនអាចរារ៉ាំងសិល្បករហ៊ីបហបបារាំងពីការផលិតបទចម្រៀង ដោយមិនប្រើអវៈយវៈអ្វីសោះ ក្រៅពីភ្នែកទាំងគូ។
លោក ហ្គីលហេម «ផូន» ហ្គាល់ឡាត ជាសមាជិកសហករណ៍រ៉េបបារាំង Fonky Family បានធ្លាក់ខ្លួនឈឺជំងឺប្រព័ន្ធប្រសាទ និងខួរក្បាលក្នុងឆ្នាំ ២០១៥ ហើយវាបានធ្វើឱ្យលោកដេកនៅលើគ្រែជារៀងរាល់រហូត។
ប៉ុន្ដែដោយមានជំនួយពីសូហ្វវែរ ដែលតាមដានចលនាកែវភ្នែកដើម្បីត្រាប់សកម្មភាពចុចលើ (mouse) លោកអាចនិពន្ធបទភ្លេង និងសរសេរចម្រៀង ក៏ដូចជានិយាយតាមសំឡេងកុំព្យូទ័រ។
លទ្ធផល បានបង្ហាញនៅក្នុងបទភ្លេងអេឡេចត្រូមីនីអាល់ប៊ុម «Listen and Donate» បានចេញផ្សាយកាលពីសប្ដាហ៍មុន និងបានទទួលការគាំទ្រពីវិរបុរសតន្ដ្រីម្នាក់របស់លោកផ្ទាល់ នោះគឺ អ្នកនិពន្ធចម្រៀងចក្រភពអង់គ្លេស Kate Bush។
លោកបានឱ្យដឹងថា៖ «ពេលខ្មោចយមរាជចេញបាត់ទៅ អរគុណធំៗដល់ការវះកាត់បំពង់ខ្យល់ ខ្ញុំបានវិលមកកាន់ការសរសេរចម្រៀងវិញ តែខ្ញុំមិនគិតថា ខ្ញុំអាចប្រើភ្នែកធ្វើវាបាននោះទេ»។
លោកបានចំណាយពេលស្ទើរតែ ៤ ឆ្នាំ ក្នុងការចាប់ផ្ដើមសរសេរចម្រៀងជាថ្មីក្រោយធ្លាក់ខ្លួនឈឺ។ ជំងឺសរសៃប្រសាទ និងខួរក្បាល បានធ្វើឱ្យប៉ះពាល់ដល់សមត្ថភាពគ្រប់គ្រងសាច់ដុំ ការធ្វើចលនា និយាយ ទទួលទាន និងដកដង្ហើម។
ប៉ុន្ដែបច្ចេកវិទ្យាបានជួយឱ្យលោក ហ្គាល់ឡាត ដែលមានវ័យខ្ទង់ ៤០ ឆ្នាំមានលទ្ធភាពឡើងវិញ។
ភរិយាឈ្មោះ វ៉ាហ៊ីបា បាននិយាយថា៖ «ខ្ញុំបានទទួលបង ផូន ដែលខ្ញុំធ្លាប់ស្គាល់មកវិញ ហើយថែមទាំងខ្លាំងជាងមុនទៀត»។
លោក ផូន ខ្លួនឯង ក៏ត្រូវដកដង្ហើមតាមសួតសិប្បនិម្មិតដែរ តែរស់នៅផ្ទះក្នុងតំបន់ Tarn នៅភាគនីរតីប្រទេសបារាំង ជាមួយភរិយា និងកូនស្រីពីរនាក់។
ការវិលមកកាន់ពិភពតន្ដ្រីជាលើកដំបូងគឺជាអាល់ប៊ុមឆ្នាំ ២០១៩ «Kate & Me» ដែលឧទ្ទីលដល់និមិត្ដរូបតន្ដ្រី Kate Bush និងរួមទាំងអាល់ប៊ុម «It''s Me Cathy» និងបទចម្រៀងផលិតឡើងវិញ «Wuthering Heights» ផងដែរ៕ AFP/HR