.jpg)
អ្នកម្ដាយកូន២ វ័យ៣៩ឆ្នាំ ប្រ៊ីដនី ស្ពៀរ ទទូចសុំតុលាការបញ្ឈប់សិទ្ធិត្រួតត្រាពីអាណាព្យាបាលនាង។ AFP
ឡូសអេនជឺលេស៖ តារាចម្រៀងវ័យ ៣៩ ឆ្នាំ ប្រ៊ីដនី ស្ពៀរ (Britney Spears) បានទទូចឱ្យចៅក្រមនៅក្នុងសវនាការកាលពីថ្ងៃពុធ ដើម្បីបញ្ចប់ «ការគ្រប់គ្រងពីអាណាព្យាបាលដ៏ឃោរឃៅ» ដែលបានផ្តល់ឱ្យឪពុករបស់នាងមានសិទ្ធិគ្រប់គ្រងជីវិតឯកជនរបស់នាងក្នុងឆ្នាំ ២០០៨។
ក្នុងការបរិយាយរៀបរាប់រយៈពេល ២០ នាទី តាមរយៈវីដេអូឃ្លីប តារាចម្រៀងរូបនេះបាននិយាយថា៖ «ខ្ញុំចង់ ឲ្យ ជីវិតរបស់ខ្ញុំត្រឡប់មកវិញ។ វាមានរយៈពេល ១៣ ឆ្នាំហើយ ហើយវាល្មមគ្រប់គ្រាន់ហើយ»។
ហិរញ្ញវត្ថុ និងជីវិតផ្ទាល់ខ្លួនរបស់តារាស្រីវ័យជិត ៤០ ឆ្នាំរូបនេះ មួយភាគធំត្រូវបានគ្រប់គ្រងដោយលោក ចេមី ស្ពៀរ (Jamie Spears) ចាប់តាំងពីនាងទប់អារម្មណ៍លែងជាប់រួចសម្ដែងអាកប្បកិរិយាបាក់ទឹកចិត្តខ្លាំងជាសាធារណៈ កាលពីជាង ១ ទសវត្សរ៍មុន ដែលនាំឱ្យអ្នកគាំទ្រមួយចំនួនចាប់ផ្តើមយុទ្ធនាការ «ដោះលែង ប្រ៊ីដនី» (Free Britney) តាមអនឡាញក្នុងរយៈពេលប៉ុន្មានឆ្នាំថ្មីៗនេះ។
ក្នុងការរៀបរាប់មួយដែល ប្រ៊ីដនី អួលដើមកខ្លាំងនោះ នាងបាននិយាយថា តាមការរៀបចំដោយស្របច្បាប់នាងត្រូវបានរារាំងមិនឱ្យដកកងពន្យារកំណើតចេញពីស្បូន ទោះបីជានាងចង់ពពោះបានកូនថែមទៀតក៏ដោយ។
អ្នកម្តាយដែលមាន ២ នាក់រូបនេះបាននិយាយថា គំនាបពីអាណាព្យាបាលបានធ្វើឱ្យនាង «បាក់ស្បាត» និង «បាក់ទឹកចិត្ត» ជាខ្លាំង។
ក្រុមអ្នកគាំទ្រ ប្រ៊ីដនី ស្ពៀរ នៅក្រុងឡូសអេនជើលេស ធ្វើការទាមទារឱ្យអាណាព្យាបាលនាងដោះលែងនាងឱ្យមានសេរីភាព។ AFP
ប្រ៊ីដនី បាននិយាយថា៖ «ខ្ញុំមិនសប្បាយចិត្តទេ។ ខ្ញុំគេងអត់លក់។ ខ្ញុំខឹងខ្លាំងណាស់។ ខ្ញុំអារម្មណ៍ដូចឆ្កួត ហើយខ្ញុំយំរាល់ថ្ងៃ»។
តារាចម្រៀងដ៏ល្បីល្បាញខ្លាំងតាំងពីឆ្នាំ ១៩៩៨ រូបនេះបានបន្តថា៖ «ខ្ញុំជឿជាក់ថា ការការគ្រប់គ្រងនេះគឺជារំលោភបំពាន។ ខ្ញុំចង់បានការផ្លាស់ប្តូរ ខ្ញុំសមនឹងទទួលបានការផ្លាស់ប្តូរ» ។
តារាចម្រៀងរូបនេះកម្រនិយាយដោយផ្ទាល់អំពីអាណាព្យាបាលរបស់នាង ប៉ុន្តែមេធាវីរបស់នាងគឺលោក សាមៀល អ៊ីងហ្គេម (Samuel Ingham) បាននិយាយកាលពីខែមេសាថា ប្រ៊ីដនី ចង់និយាយទៅកាន់តុលាការដោយផ្ទាល់ជាហេតុធ្វើឱ្យមានសវនាការនៅថ្ងៃពុធ។
ប្រ៊ីដនី មានទំនាក់ទំនងល្អក់កករជាមួយឪពុកនាងជាយូរមកហើយ។
កាលពីឆ្នាំមុននាងបានដាក់ពាក្យសុំដករូបលោកចេញពីការគ្រប់គ្រងទ្រព្យសម្បត្តិរបស់នាង និងផ្តល់អំណាចតែមួយគត់លើស្ថាប័នហិរញ្ញវត្ថុ។ មេធាវីដែលចាត់តាំងដោយតុលាការបាននិយាយថា ប្រ៊ីដនី ខ្លាចឪពុករបស់នាងណាស់។
តារាចម្រៀង ប្រ៊ីដនី ស្ពៀរ នៅលើឆាកកាលពីឆ្នាំ ២០១៨ មុននឹងប្រកាសផ្អាកទទួលការសម្ដែងចាប់តាំងពីឆ្នាំ ២០១៩។ AFP
ហួសហេតុពេក
អ្នកគាំទ្រ ប្រ៊ីដនី បានព្យាយាមរុករកតម្រុយពីសុខទុក្ខរបស់នាងតាមបណ្តាញសង្គមរបស់នាងជាយូរមកហើយ ហើយពួកគេក៏បានដឹងថានាងប្រហែលជាចង់លប់ចោលការគ្រប់គ្រងរបស់អាណាព្យាបាល។
កំណត់ត្រាសម្ងាត់ដែលត្រូវបានចុះផ្សាយនៅថ្ងៃអង្គារដោយកាសែតញូវយ៉កថែមស៍ បាននិយាយពី ប្រ៊ីដនី ស្ពៀរ ថា ប្រព័ន្ធគ្រប់គ្រងដោយអាណាព្យាបាលមាន «ការគ្រប់គ្រងច្រើនពេក ពោលគឺច្រើនពេកហើយ!" ហើយថានាងត្រូវបានរារាំងមិនឱ្យធ្វើការសម្រេចចិត្តដោយខ្លួនឯងសូម្បីតែ តើអាចរាប់អាននរណាជាមិត្ត រឿងស្នេហា ការចំណាយ និងសូម្បីតែជម្រើសពណ៌ទូចង្ក្រានបាយក្នុងផ្ទះរបស់នាង។
ប្រ៊ីដនី ស្ពៀរ បានប្រាប់អ្នកស៊ើបអង្កេតករណីនេះថា នាងចង់ឱ្យការឃុំគ្រងពីអាណាព្យាបាលត្រូវបញ្ចប់ឱ្យបានឆាប់តាមដែលអាចធ្វើទៅបាន ហើយថានាងឈឺចាប់ណាស់ដោយសាររូបនាងត្រូវបានគេទាញយកប្រយោជន៍។
បន្ទាប់ពីការលែងលះរវាងនាង និងអតីតស្វាមី ខេវីន ហ្វើដឺឡាញ (Kevin Federline) ក្នុងឆ្នាំ ២០០៦ និងការបាត់បង់ការថែរក្សាកូនៗរបស់នាងនៅឆ្នាំបន្ទាប់ ប្រ៊ីដនី ស្ពៀរ មានក្លាយជាមុខសញ្ញាប្រមាញ់រូបថត។
ក្រុមអ្នកគាំទ្រ ប្រ៊ីដនី ស្ពៀរ នៅក្រុងឡូសអេនជើលេស ធ្វើការទាមទារឱ្យអាណាព្យាបាលនាងដោះលែងនាងឱ្យមានសេរីភាព។ AFP
ក្រោមការឃ្លាំមើលពីឪពុកនាង ប្រ៊ីដនី បានវិលត្រឡប់មកសម្តែងវិញ និងបានចេញចម្រៀង ៣ អាល់ប៊ុម រួមទាំងការបង្ហាញខ្លួននៅលើបណ្ដាកញ្ចក់ទូរទស្សន៍។
ប៉ុន្តែនៅខែមករាឆ្នាំ ២០១៩ នាងបានប្រកាសជាបន្ទាន់ថា នាងនឹងផ្អាកការសម្តែងរបស់នាងរហូតដល់មានការជូនដំណឹងជាថ្មី។
នាងបាននិយាយថាឪពុកនាង និងអ្នកផ្សំគំនិត តែងតែគំរាមនាងជារឿយៗ។
ប្រ៊ីដនី ស្ពៀរ បានទម្លាយថា៖ «ប្រសិនបើខ្ញុំមិនដូច្នោះទេ គឺធ្វើអ្វីដែលពួកគេប្រាប់ខ្ញុំ ធ្វើអ្វីដែលពួកគេប្រើខ្ញុំដូចទាសករឱ្យធ្វើ នោះពួកគេនឹងដាក់ទណ្ឌកម្មខ្ញុំ»។
ទស្សនិកជនចូលមកទទួលបទពិសោធនៅបន្ទប់ពិព័រណ៍ស្នាដៃចម្រៀង ប្រ៊ីដនី ស្ពៀរ Baby one more time។ AFP
តារាចម្រៀងរូបនេះក៏បានទម្លាយផងដែរថា គ្រូពេទ្យបានបង្ខំដាក់ថ្នាំឱ្យនាងមានអារម្មណ៍បាត់ម្ចាស់ការ ដូចស្រវឹងធីងធោង។ នាងមិនត្រូវបានគេអនុញ្ញាតឱ្យផ្លាស់ប្តូរសម្លៀកបំពាក់ជាឯកជន ឬបើកបររថយន្តផ្ទាល់ខ្លួនទេ។
មេធាវីរបស់ Jamie Spears និយាយថាគាត់បានបំពេញការងារបានយ៉ាងល្អក្នុងការគ្រប់គ្រងហិរញ្ញវត្ថុកូនស្រីរបស់គាត់។
ប៉ុន្តែចៅក្រមបានសម្រេចកាលពីខែកុម្ភៈថា ទាំងឪពុក និងអ្នកគ្រប់គ្រងទ្រព្យសម្បត្តិនាង Bessemer Trust នឹងត្រួតពិនិត្យហិរញ្ញវត្ថុរបស់តារាចម្រៀងរូបនេះដោយ បដិសេធសិទ្ធិសម្រេចផ្ដាច់មុខក្នុងការធ្វើវិនិយោគទុនរបស់លោក ចេមី ស្ពៀរ តែឯង។
នៅក្នុងសេចក្តីថ្លែងការណ៍មួយដែលបានអាននៅក្នុងតុលាការមេធាវីរបស់ឪពុកនាង បាននិយាយថា៖ «ពិតជាសោកស្តាយណាស់ដែលនាងមានការឈឺចាប់ខ្លាំង តែតាមពិតគាត់ពិតជាស្រឡាញ់កូនស្រីរបស់គាត់ខ្លាំងណាស់»៕ AFP/HR
តារាចម្រៀង ប្រ៊ីដនី ស្ពៀរ ចូលរួមកម្មវិធីសិល្បៈកាលពីឆ្នាំ ២០១៥។ AFP
