​កម្មវិធី​បុណ្យ​ផ្កាយ​ឆ្នាំ​ ២០២១​ នឹង​ប្រារព្ធ​ធ្វើ​​តាម​អនឡាញ​​

ក្រុមរបាំរបស់ជប៉ុន កាលពីកម្មវិធីបុណ្យផ្កាយឆ្នាំ ២០១៩។ រូបថត សហការី

ភ្នំពេញ៖ ស្ថានទូតជប៉ុនប្រចាំប្រទេសកម្ពុជា រួមសហការជាមួយនឹងមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) និងមជ្ឈមណ្ឌលអាស៊ីនៃមូលនិធិជប៉ុន (JFAC) នឹងរៀបចំកម្មវិធីបុណ្យផ្កាយឆ្នាំ ២០២១ តាមអនឡាញ ចាប់ពីថ្ងៃទី ៩ ទៅដល់ថ្ងៃទី ១១ ខែ កក្កដា ឆ្នាំ ២០២១ ដែលជំនួសការរៀបចំនៅទីកន្លែងដូចរៀងរាល់ឆ្នាំ។

កម្មវិធីបុណ្យដែលរៀបចំឡើងតាំងពីឆ្នាំ ២០០៤ មកនោះ នៅក្នុងគោលបំណងបន្តជំរុញការផ្លាស់ប្តូរវប្បធម៌រវាងប្រទេសជប៉ុន និងកម្ពុជា។ ពិធីបុណ្យផ្កាយនេះ គឺជាកម្មវិធីបុណ្យប្រពៃណីជប៉ុន ដែលតែងតែប្រារព្ធនៅថ្ងៃទី ៧ ខែកក្កដា ជារៀងរាល់ឆ្នាំនៅប្រទេសជប៉ុន រំឭកដល់រឿងគូស្នេហ៍នៅឋានសួគ៌ ១ គូ គឺនារីតម្បាញ និងបុរសគង្វាលគោ។ បើតាមតំណាលរឿងគូស្នេហ៍ ១ គូនេះ ត្រូវបំបែកដោយទន្លេអាមាណុហ្កាវ៉ា ហើយអាចជួបគ្នាបានតែម្តងគត់ក្នុង ១ ឆ្នាំ គឺនៅថ្ងៃទី ៧ ខែកក្កដា។ ដូច្នេះក្នុងថ្ងៃនោះ ប្រជាជនជប៉ុននាំគ្នាសរសេរបំណងប្រាថ្នារបស់ខ្លួន ហើយចងព្យួរទៅនឹងមែកឫស្សី ដើម្បីបួងសួងឱ្យបានសម្រេចតាមអ្វីដែលខ្លួនប៉ងប្រាថ្នា។

បើតាមសេចក្តីជូនដំណឹងពីសា្ថនទូតជប៉ុនប្រចាំប្រទេសកម្ពុជា បានឱ្យដឹងថា៖ «ក្នុងអំឡុងពេលប្រារព្ធពិធីបុណ្យផ្កាយអនឡាញឆ្នាំ ២០២១ នេះ ក្នុងប្រទេសកម្ពុជា យើងនឹងធ្វើការតុបតែងដើមឫស្សីនៅស្ថានទូតជប៉ុន។ យើងខ្ញុំសូមអញ្ជើញសាធារណជនចូលរួមកម្មវិធីបុណ្យផ្កាយអនឡាញឆ្នាំ ២០២១ ដោយផ្ញើបំណងប្រាថ្នារបស់លោក លោកស្រី ចាប់ពីថ្ងៃទី ២៣ ខែមិថុនា ដល់ថ្ងៃទី ១ ខែ កក្កដា ឆ្នាំ ២០២១ មកកាន់យើងខ្ញុំ។ រាល់បំណងប្រាថ្នារបស់លោក លោកស្រីនឹងត្រូវព្យួរនៅលើមែកដើមឫស្សី នៃស្ថានទូតជប៉ុន ជាមួយនឹងគ្រឿងតុបតែងលម្អដទៃទៀត ហើយដើមឫស្សីនោះ នឹងត្រូវបានបង្ហាញក្នុងវីដេអូនៃកម្មវិធីបុណ្យផ្កាយអនឡាញនៅឆ្នាំ ២០២១ នេះ»។

ការសម្តែងរបាំគោះអង្រែរបស់ខ្មែរ នៅក្នុងកម្មវិធីបុណ្យផ្កាយកាលពីឆ្នាំ ២០១៩ កន្លងមក។ រូបថត សហការី

ប្រភពខាងលើបានបន្តឱ្យដឹងទៀតថា៖ «លោក លោកស្រី អាចផ្ញើបំណងប្រាថ្នារបស់លោក លោកស្រី ដោយសរសេរ ឈ្មោះផ្ទាល់ខ្លួន ឬរហស្សនាម (ឈ្មោះហៅក្រៅ) និងបំណងប្រាថ្នាលោក លោកស្រីជាភាសាខ្មែរ ឬភាសាជប៉ុន ឬភាសាអង់គ្លេស តាមតំណភ្ជាប់ខាងក្រោមនេះ https://forms.gle/pNBfQ2k4ithjAB816។ សម្រាប់ការសាកសួរព័ត៌មាន សូមទាក់ទងមកកាន់ផ្នែកវប្បធម៌ និងព័ត៌មាននៃស្ថានទូតជប៉ុនតាមទូរស័ព្ទ ០២៣ ២១៧ ១៦១ (លេខភ្ជាប់បន្ត ១១២១) ឬផ្ញើអ៊ីមែល info.jpn@pp.mofa.go.jp និងសម្រាប់ព័ត៌មានបន្ថែមស្តីពីពិធីបុណ្យនេះ សូមចូលទៅកាន់គេហទំព័រហ្វេសប៊ុកនៃពិធីបុណ្យផ្កាយអនឡាញ ២០២១៖ https://fb.me/e/4maLxGM5B។

គួររំឭកដែរថា កាលពីប្រារព្ធកម្មវិធីបុណ្យផ្កាយឆ្នាំ ២០១៩ មានកម្មវិធីជាច្រើនដូចជា កម្មវិធីសិក្ខាសាលា និងបទបង្ហាញទាក់ទងនឹងអានីមេខូសផ្លេ ការប្រកួតភាពយន្តខ្លី ការបញ្ចាំងខ្សែភាពយន្តជប៉ុន ថ្នាក់រៀនចម្អិនម្ហូបជប៉ុន សិល្បៈបត់ក្រដាស «អូរីហ្គាមី» រៀនសិល្បៈកាត់ក្រដាស «គីរីហ្គាមី» ការសរសេរអក្សរផ្ចង់ «ស្យូដូ» សាកល្បងស្លៀកពាក់ប្រពៃណី «ក្បិនខ្មែរ» និង «យូកាតាជប៉ុន» ការសាកល្បងស្លៀកសម្លៀកបំពាក់ និងលេងកីឡា «កេនដូ» និង «អ៊ីអៃដូ» ថ្នាក់រៀនបាញ់ធ្នូមរតកខ្មែរ ព្រមទាំងការតាំងពិព័រណ៍ផ្សេងៗទៀត ក្នុងពិធីបុណ្យផ្កាយមួយនេះ៕

កម្មវិធីបុណ្យផ្កាយឆ្នាំ ២០២១ នឹងប្រារព្ធធ្វើតាមអនឡាញ

ព័ត៌មានថ្មីៗ

វីដេអូ

កម្មវិធី​បុណ្យ​ផ្កាយ​ឆ្នាំ​ ២០២១​ នឹង​ប្រារព្ធ​ធ្វើ​​តាម​អនឡាញ​

ជីវិតកម្សាន្ត

ព័ត៌មានថ្មីៗ

វីដេអូ

កម្មវិធីបុណ្យផ្កាយឆ្នាំ ២០២១ នឹងប្រារព្ធធ្វើតាមអនឡាញ