ភ្នំពេញ៖ ទោះបីជាវិស័យសិល្បៈហាក់នៅទ្រឹងដោយសារវិបត្តិកូវីដ ១៩ មែនក្តី តែមហាជនសង្កេតឃើញថា តារាចម្រៀងស្រីរូបស្រស់ សាច់សខ្ចីនៅផលិតកម្មសាន់ដេ កញ្ញា វីរៈ និច្ច កាន់តែមានភាពហ៊ឺហាខ្លាំងជាមួយការសម្ញែងនូវផ្ទះវីឡា និងរថយន្តទំនើប។
ពេលថ្មីៗនេះ ស្រាប់តែតារាចម្រៀងស្រីល្បី លំដាប់មធ្យមនៅទ្រនំសាន់ដេ ដែលអភិវឌ្ឍខ្លួនពីបេក្ខនារីស្រីស្អាតចំណាត់ថ្នាក់លេខ ២ ឆ្នាំ២០១៤ កញ្ញា វីរៈ និច្ច បង្ហោះបណ្តុំរូបភាពនៅនែបនិត្យជាមួយរថយន្តទំនើបម៉ាក Roll Royce ឈរបង្អួតរាងពីមុខផ្ទះវីឡាស្កឹមស្កៃ បង្ហើរសារយ៉ាងខ្លីថា៖ «Me or Car or house?»។
តារាចម្រៀងស្រីជាក្មួយតារាចម្រៀងប្រុសលោក ខាន់ ចេមស៍ ដែលជ្រកនៅទ្រនំសាន់ដេដូចគ្នា ស្រូបបានប្រជាប្រិយភាពខ្លាំងគួរសមពីអ្នកគាំទ្រ កាលពីមិនទាន់កើតវិបត្តិកូវីដ ខណៈកញ្ញាបានវិវឌ្ឍខ្លួនពីអាជីពតារាម៉ូដែល និងអតីតជាស្រីស្អាតលេខ ២ ឆ្នាំ ២០១៤។ កញ្ញា វីរៈ និច្ច បង្កើតភាពភ្ញាក់ផ្អើលដល់មហាជនជារឿយៗផងដែរ រយៈពេលជាង ១ ឆ្នាំ ចុងក្រោយនេះ គេឃើញថាវិស័យសិល្បៈហាក់មិនមានអ្វីលេចធ្លោទេ តែកញ្ញាបែរជាបង្ហាញភាពហ៊ឺហារបស់ខ្លួនខ្លាំងទៅវិញ ដូចជាផ្ទះវីឡា និងឡានទំនើបជាដើម គឺសុទ្ធតែមានតម្លៃរាប់សិបម៉ឺនដុល្លារឯណោះ។
កាលដើមឆ្នាំ ២០២០ តារាស្រីស្រស់ រាងខ្ពស់ស្រឡះ ជាអ្នកមានស្រុកកំណើតនៅឯខេត្តកំពង់ចាម ដែលក្តោបបាននូវភាពល្បីចាប់តាំងពីចាប់ដៃគូច្រៀងជាមួយ នាយ ចឺម កញ្ញា វីរៈ និច្ច ធ្លាប់បង្ហើបប្រាប់ពីគម្រោងការងាររកស៊ីផ្ទាល់ខ្លួនក្រៅសិល្បៈ ដែលចំណាយទុនប្រមាណ ១០ ម៉ឺនដុល្លារ។ កញ្ញាប្រាប់ថា៖ «ការពិតទៅ នាពេលអនាគតនាងខ្ញុំមានគម្រោងបង្កើតរបររកស៊ីផ្ទាល់ខ្លួន ដែលនាំយកនូវផលិតផលរក្សាសម្ផស្សល្បីៗ ពីបរទេសលក់ផ្តាច់មុខនៅស្រុកខ្មែរ តែមិនទាន់ដល់ពេលព្រោះខ្ញុំ ត្រូវការសិក្សាពីទីផ្សារសិន និងកំពុងតែសន្សំដើមទុន សម្រាប់ការងាររកស៊ីលើរបរនេះ»។
កញ្ញា វីរៈ និច្ច បន្តថា៖ «បច្ចុប្បន្ន ខ្ញុំធ្វើជាតំណាងចែកចាយធំមួយដែរ ឱ្យផលិតផលរបស់ពូខ្ញុំ [ខាន់ ចេមស៍] ជិតកន្លះឆ្នាំហើយ។ ខណៈពេលនេះក៏អាចជាឱកាសសិក្សាស្វែងយល់បន្ថែមទុកជាទុនគំនិត ដើម្បីឈានទៅរកការធ្វើអាជីវកម្មខ្លួនឯង នាពេលអនាគត។ ចំពោះដើមទុនវិញ ខ្ញុំគិតថា ក៏ត្រូវត្រៀមចន្លោះពី ៥ ទៅ ១០ ម៉ឺន ទើបអាចបង្កើតមុខរបរនេះ»។
ដោយឡែកចំពោះប្រភពប្រាក់ចំណូលដែលចំណាយលើការទិញផ្ទះវីឡា និងរថយន្តទំនើប ដែលទើបតែបានបង្ហាញក្នុងពេលថ្មីៗនេះ មិនត្រូវបានកញ្ញា វីរៈ និច្ច បង្ហើបឱ្យដឹងឡើយ ខណៈប្រព័ន្ធទូរស័ព្ទរបស់កញ្ញាមិនអាចទាក់ទងបាន។
ប៉ុន្តែបើតាមសកម្មភាពក្នុងបណ្តាញសង្គមហ្វេសប៊ុកវិញ គេឃើញថា កញ្ញា វីរៈ និច្ច ឧស្សាហ៍ចុះទៅតាមខេត្តជាមួយលោក ខាន់ ចេមស៍ ដែលជាពូរបស់នាង ជាមួយនឹងរបរថ្មី គឺជាភ្នាក់ងារពុះដីឡូត៍លក់៕