ភ្នំពេញ៖ ជាយុវជនបញ្ឈប់ការសិក្សា ដើម្បីយកពេលវេលាមកដោះស្រាយជីវភាព មឿន ចាន់ណា ដែលកាន់តែអភ័ព្វនឹងខ្សែជីវិតខ្លួនពិការដៃទាំងសងខាង បានជម្នះឧបសគ្គជីវិតបាត់បង់អវយវៈ និងបញ្ហាបាក់ទឹកចិត្តរហូតអាចរកការងារចិញ្ចឹមជីវិត និងបង្កើតបានគ្រួសារមួយដ៏កក់ក្ដៅ។
កម្លាំងចិត្តពីសំណាក់មនុស្សជុំវិញខ្លួន ជាពិសេសអ្នកជាទីស្រឡាញ់ បានធ្វើឱ្យលោក ចាន់ណា មិនត្រឹមតែពុះពារព្យុះជីវិតផ្ទាល់ខ្លួនប៉ុណ្ណោះទេ ថែមទាំងសង្វាតរកការងារបន្ថែម ព្រោះតែមិនអាចទប់ទល់ជាមួយតម្រូវការជុំទិសក្នុងអំឡុងពេលវិបត្តិកូវីដ។
ជាកូនច្បងនៅក្នុងចំណោមគ្រួសារជីវភាពខ្វះខាតដែលមានបងប្អូន ៣ នាក់ លោក ចាន់ណា ត្រូវចេញរកការងារជួយឪពុកម្ដាយ និងប្អូនតាំងពីនៅក្មេង។
បុរសវ័យ ២៧ ឆ្នាំរូបនេះ បានរៀបរាប់ប្រាប់ពីខ្សែជីវិតរបស់លោកប្រាប់ ភ្នំពេញ ប៉ុស្តិ៍ ថា៖ «ខ្ញុំរៀនបានត្រឹមថ្នាក់ទី៩ ប៉ុណ្ណោះ ដោយកត្តាជីវភាពខ្ញុំបានរកការងារធ្វើជំនួសវិញ ដោយកាលណោះធ្វើជាជាងផ្សារដែក។ ក្នុងឆ្នាំ ២០១៦ ខ្ញុំក៏ជួបគ្រោះថ្នាក់ឆក់ខ្សែភ្លើងក្នុងពេលធ្វើការ រហូតត្រូវបានពេទ្យប្រាប់ថា ត្រូវតែកាត់ដៃទាំង ២ ចោល ព្រោះវារលួយសរសៃអស់ហើយ»។
ការលើកទឹកចិត្តពីមនុស្សជុំវិញខ្លួន គួបផ្សំនឹងការឃើញឪពុកម្ដាយលំបាកតត្រុកធ្វើស្រែចម្ការ ចិញ្ចឹមគ្រួសារ និងសងបំណុលគេ បានជំរុញឱ្យយុវជន ចាន់ណា អាចក្រោកឈរបើកទំព័រជីវិតថ្មីក្រោយពីចំណាយពេលវេលាផ្សះរបួសផ្លូវកាយ និងចិត្តអស់រយៈពេលជិត ២ ឆ្នាំ។
ចាន់ណា បានពោលទាំងអួលដើមកថា៖ «ខ្ញុំដូចជាមានជីវិតថ្មីពេលដែលត្រូវក្រោកឡើងបាត់ដៃដែលធ្លាប់មាន។ យ៉ាងណាខ្ញុំអរគុណកម្លាំងចិត្តពីគ្រួសារ បងប្អូន អ្នកជិតខាង ដែលតែងតែលើកទឹកចិត្តឱ្យខ្ញុំតស៊ូព្យាយាមឡើងវិញ។ វាមិនមែនជាថ្ងៃបញ្ចប់អីបន្តិចទេ»។
លោកបន្តថា៖ «ខ្ញុំក៏ប្រាប់ឱ្យខ្លួនឯងរឹងមាំ។ ខ្ញុំក៏មានគ្រួសារ និងបងប្អូនដែលត្រូវមើលថែ។ ហើយខ្ញុំក៏ចង់ជួយសម្រាលដល់បន្ទុកឪពុកម្ដាយរបស់ខ្ញុំពីបំណុលដែលគាត់ជំពាក់គេផងដែរ»។
លោក ចាន់ណា ក៏បានទទួលធ្វើជាអ្នកលក់គ្រឿងក្រអូបតាមអនឡាញ បន្ទាប់មកជាអ្នកលក់ស្បែកជើង កាបូប និងសម្ភារផ្សេងៗវិញម្ដងក្នុងរយៈពេលជាង ២ ឆ្នាំចុងក្រោយមកនេះ។
ដោយអាជីវកម្មអនឡាញចំណូលគិតភាគរយពីក្រុមហ៊ុនក៏តានតឹង ផ្សំនឹងតម្រូវការក៏ច្រើនជាងចំណូល។ លោក ចាន់ណា ត្រូវរ៉ាប់រងចិញ្ចឹមភរិយា និងកូនទើបតែសម្រាលបាន ៧ ខែ ដែលត្រូវផ្ញើនៅឪពុកម្ដាយឯស្រុក។ នៅមានបន្ទុកថ្លៃផ្ទះជួល និងការជួយទំនុកបម្រុងអ្នកមានគុណ និងប្អូនទើបមានអាយុ ១០ ឆ្នាំទៀត។
ដោយមានបំណងចង់បង្កើនប្រភពចំណូលទប់នឹងការចំណាយ យុវជនមានស្រុកកំណើតនៅខេត្តកំពង់ធំរូបនេះបានអំពាវនាវរកការងារបន្ថែមនៅតាមបណ្ដាញសង្គមថា៖ «ជម្រាបសួរពុកម៉ែបងប្អូន! តើបងប្អូនមានត្រូវការជ្រើសរើសអ្នកដឹកជញ្ជូនទំនិញ Online ទេ? បើសិនជាមានឱ្យខ្ញុំសុំចូលធ្វើមួយផង ឬបងប្អូនណាដែលស្គាល់កន្លែងណាគេជ្រើសរើសអ្នកដឹកជញ្ជូនជួយប្រាប់ផង ពីព្រោះថាឥឡូវខ្ញុំត្រូវការលុយដើម្បីដោះស្រាយជីវភាពគ្រួសារ នឹងបង់ថ្លៃផ្ទះជួលគេ។ សូមពុកម៉ែបងប្អូនជួយស៊ែបន្ដម្នាក់មួយផង។ សូមអរគុណ»។
លោក ចាន់ណា ដែលអាចបើកម៉ូតូដឹកទំនិញឱ្យម៉ូយបាន បានបញ្ជាក់ពីការធ្វើដំណើររបស់លោកថា៖ «ដោយការងារអនឡាញ ពេលមានភ្ញៀវកុម្ម៉ង់ ពេលខ្លះខ្ញុំក៏ ដឹកជញ្ជូនឱ្យពួកគាត់។
ដំបូងៗពិបាកដែរ តែបើត្រូវរកដើម្បីក្រពះវាមិនពិបាកពេកទេ ខ្ញុំអាចជិះទៅធម្មតាដូចគេអ្នកមានកាយសម្បទាគ្រប់គ្រាន់ដែរ។ ថាទៅការងារអីក៏ខ្ញុំអាចបាន ឱ្យតែគេទទួលខ្ញុំធ្វើការ»។
មេគ្រួសារ ដែលមានការទទួលខុសត្រូវខ្ពស់រូបនេះ បានបន្ដថា តាមពិតពីមុនមកលោកក៏ធ្លាប់មានបងប្អូនសប្បុរសផ្ដល់ជំនួយច្រើនជាដើមទុនក្នុងការរកស៊ីនៅពេលលោកមកទីក្រុងភ្នំពេញដំបូងៗ ដោយឃើញពីភាពតស៊ូ និងឯករាជភាពរបស់លោកក្នុងការធ្វើការចិញ្ចឹមជីវិតដោយមិនលើកដៃសុំគេ។
លោកក៏រីករាយដែលកន្លងមកលោកមិនធ្លាប់មានអ្នករើសអើងស្អប់ខ្ពើមអីទេ មានតែអ្នកចង់ជួយ និងលើកទឹកចិត្តជនពិការឱ្យប្រឹងប្រែងតស៊ូ។
បុរសពិការតស៊ូធ្វើបង្គោលគ្រួសារដ៏រឹងមាំរូបនេះ ក៏បានបន្ថែមទៀតថា៖ «ខ្ញុំចង់អរគុណសប្បុរសជនទាំងឡាយដែលតែងតែជួយគាំទ្រ និងផ្ដល់ជាថវិកាសម្រាប់ខ្ញុំកន្លងមក»។
លោកលើកឡើងថា៖ «ខ្ញុំចង់ផ្ដាំទៅដល់បងប្អូនដែលពិការពីកំណើត ឬក៏ពិការដោយគ្រោះថ្នាក់ដោយហេតុណាមួយ សូមឱ្យពួកគាត់តស៊ូព្យាយាមក្រោកឈរជម្នះគ្រប់ឧបសគ្គ ត្រូវមានសង្ឃឹម និងដើម្បីភាពជោគជ័យទៅថ្ងៃអនាគត»។
ព័ត៌មានបន្ថែមពី ចាន់ណា មាននៅគេហទំព័រហ្វេសប៊ុក @Channaonlineship168 និងទំនាក់ទំនងបានតាមរយៈទូរស័ព្ទលេខ ០៩៧ ២០០ ២៤៣៥ និង ០៩៣ ៣២៣ ៦៧៤៕