ទីក្រុងឡុងដ៍៖ ការតាំងពិព័រណ៍ថតរូបដ៏ប្លែកមួយនៅទីក្រុងឡុងបានប្រែក្លាយការបំពុលបរិស្ថានទៅជារូបភាពសិល្បៈ ដើម្បីបង្កើនការយល់ដឹងអំពីបញ្ហាគុណភាពខ្យល់នៅរាជធានីអង់គ្លេស។
សិល្បករ និងអ្នកវិទ្យាសាស្ត្រ បានសហការគ្នាសម្រាប់ការតាំងពិព័រណ៍ក្រោមចំណងជើងថា What On Earth ដែលរំលេចនូវស្នាដៃសិល្បៈ ២៦ផ្ទាំងអំពីវិបត្តិបរិយាកាស។
ស្នាដៃតាំងពិព័រណ៍រួមមានរូបភាពសារធាតុអេតាណុលនៅលើក្រដាសខៀវស្រអាប់ ដែលមានពណ៌សលាយឡំនឹងពណ៌មហាសមុទ្រ ប៉ុន្តែតាមពិតវាបង្ហាញពីខ្យល់កខ្វក់ផ្ទុកមេរោគនៅទីក្រុងឡុង។
រូបភាពត្រូវបានផលិតដោយប្រើគម្រូខ្យល់ពីអ្នកវិទ្យាសាស្ត្រនៃសាលា Imperial College London ។
បន្ទាប់មកគម្រូខ្យល់ទាំងនោះត្រូវបានទាញយកទៅបោះពុម្ពដោយប្រើបច្ចេកទេស cyanotype ដែលជាវិធីសាស្ត្រប្រពៃណីក្នុងការផលិតរូបភាពពីពន្លឺ ក្នុងការបង្ហាញអង្គធាតុល្អិតនៃជាតិពុលលើក្រដាស។
អ្នកគ្រប់គ្រងពិព័រណ៍ អេឡិន ថេល័រ បាននិយាយថា៖ «ខ្ញុំសង្ឃឹមថាការបង្ហាញនេះអាចបង្ហាញពីរបៀបដែលធម្មជាតិអាចជាប្រធានបទនៃការថតរូបដោយប្រើការបំពុលខ្យល់ និងសំឡេង ដើម្បីចងក្រងឯកសារពីដំណើរការប្រែប្រួលនៃបរិស្ថានបរិស្ថានយើងរស់នៅ»។
ថ្វីត្បិតតែកម្រិតនៃការបំពុលបរិស្ថានបានធ្លាក់ចុះទូទាំងពិភពលោកកាលពីឆ្នាំមុននៅពេលដែលមនុស្សនាំគ្នានៅផ្ទះ អំឡុងពេលការបិទខ្ទប់ ការបំពុលបានកើនឡើងវិញដោយសារមនុស្សកាន់តែច្រើនលែងប្រើប្រាស់មធ្យោបាយធ្វើដំណើរសាធារណៈ។
ការបំពុលខ្យល់អាចបង្កើនហានិភ័យជំងឺសរសៃឈាមបេះដូង និងជំងឺផ្លូវដង្ហើមកាន់តែធ្ងន់ធ្ងរ ហើយវាក៏ត្រូវបានសង្ស័យថារួមចំណែកបង្កើនអត្រាជំងឺវង្វេងវង្វាន់នៅមជ្ឈិមវ័យផងដែរ។
អង្គការសុខភាពពិភពលោកប៉ាន់ប្រមាណថា ការខ្យល់កខ្វក់គឺជាដើមចមរួមចំណែកធ្វើឱ្យមនុស្សប្រមាណ ៧ លាននាក់ស្លាប់មុនអាយុនៅទូទាំងពិភពលោក៕ AFP/HR