ក្រុងគែរ៖ ក្រុមបុរាណវត្ថុវិទូ បានរកឃើញសំណល់នាវាចម្បាំងដ៏កម្រ និងបរិវេណរៀបចំបូជាសពក្រិក ក្នុងទីក្រុងលេចទឹកបុរាណ ដែលធ្លាប់ជាកំពង់ផែមេឌីទែរណេសំខាន់របស់អេហ្ស៊ីប។ នេះបើយោងតាមសម្ដីក្រុមមន្ដ្រី បានឱ្យដឹងកាលពីថ្ងៃចន្ទ។
ការរកឃើញនេះត្រូវបានធ្វើឡើងអំឡុងពេលកំណាយក្រោមផ្ទៃទឹកនៅ ថូនីស-ហេរ៉ាក្លេអុន ដែលធ្លាប់ជាទីក្រុងធំ ស្ថិតនៅជាយម្ខាងនៃទន្លេនីល ប្រសប់នឹងសមុទ្រមេឌីទែរណេ។
ទីក្រុងបុរាណ ថូនីស-ហេរ៉ាក្លេអុន ជាទីក្រុងកំពង់ផែធំបំផុតនៅអេហ្ស៊ីបរយៈពេលជាច្រើនសតវត្សរ៍រហូតដល់ស្ដេចអាឡេចសាន់ឌ័រ ឌឹ ហ្គ្រេដ រកឃើញទីក្រុងឆ្នេរ អាឡេចសាន់ឌ្រៀ ក្នុងឆ្នាំ ៣៣១ មុន គ.ស។
ទីក្រុងដែលត្រូវបានសាគរលេបត្របាក់ក្រោយជួបហេតុការណ៍គ្រោះរញ្ជួយដី និងរលកយក្សជាហូរហែ ត្រូវបានរកឃើញនៅក្នុងឆ្នាំ ២០០១។
យោងតាមការសិក្សាបឋម បានបង្ហាញថា បាតផ្ទៃរាបស្មើរជាមួយច្រវាធំៗ ដងក្ដោង និងក្ដោង នាវាប្រវែង ២៥ ម៉ែត្រមួយគ្រឿងរមែងត្រូវបានប្រើសម្រាប់នាំផ្លូវនៅជ្រោយទន្លេនីល។
យោងតាម ហ្វ្រេង ហ្គូឌីយ៉ូ មកពីវិទ្យាស្ថានអឺរ៉ុបសម្រាប់បុរាណវត្ថុក្រោមបាតសមុទ្រ (IEASM) ដែលដឹកនាំការបេសកកម្មនេះ បានឱ្យដឹងថា៖ «លទ្ធផលនៃការរកឃើញនាវាល្បឿនលឿនក្នុងសម័យនោះពិតជារឿងដ៏កម្របំផុត»។
អ្នកបុរាណវត្ថុបាតសមុទ្រ ក៏បានរកឃើញបរិវេណរៀបចំបុណ្យសពដែលមានវត្ដមានអភិជនក្រិកក្នុងតំបន់អំឡុងចុងសម័យកាលអេហ្ស៊ីបបុរាណ។
សំណល់នៃសំណង់បុរាណទាំងនេះត្រូវបានរកឃើញ «ក្នុងស្ថានភាពល្អស្អាត» នៅបាតសមុទ្រ។
ក្រសួង បានឱ្យដឹងថា លទ្ធផលនៃការរកឃើញចុងក្រោយបំផុតបានបញ្ជាក់ពី «ភាពរុងរឿងនៃសំណង់បុរាណក្នុងទីក្រុង ដែលបច្ចុប្បន្នស្ថិតនៅក្រោមផ្ទៃទឹកសមុទ្រមេឌីទែរណេ»៕ AFP/HR