ក្រុងញូវយ៉ក៖ ព្រះអង្គម្ចាស់ ហាររី នឹងព្រះរាជនិពន្ធជីវប្រវត្ដិពីជីវិតឯកជន និងប្រកបដោយភាពស្មោះត្រង់ ដែលលាតត្រដាងពី «កំហុសឆ្គង» និង «មេរៀន» ក្នុងឆាកជីវិតព្រះអង្គ។ នេះបើយោងតាមក្រុមហ៊ុន Penguin Random House បានឱ្យដឹងកាលពីថ្ងៃចន្ទ។
សេចក្ដីប្រកាសនេះត្រូវបានធ្វើឡើងចំពេលទំនាក់ទំនងរង្គោះរង្គើរវាងទ្រង់ និងរាជវង្ស អង់គ្លេស ពីហេតុការណ៍ដែលមហេសីទ្រង់ ព្រះនាង មេហ្គាន ចោទប្រកាន់ពីបទមាក់ងាយ និងរើសអើង ហើយការរើរាជតំណាក់ទៅកាន់សហរដ្ឋអាមេរិកដ៏គួរឱ្យភ្ញាក់ផ្អើលកាលពីឆ្នាំមុន។
យោងតាមបណ្ដាញផ្សព្វផ្សាយចក្រភពអង់គ្លេសបានបង្ហាញថា វានឹងក្លាយជាព្រឹត្ដិការណ៍ដំបូងបំផុតចំពោះរាជវង្សជាន់ខ្ពស់នៅចក្រភពអង់គ្លេស ព្រះរាជនិពន្ធសៀវភៅបែបនេះ។
ព្រះអង្គម្ចាស់ ហាររី បានឱ្យដឹងក្នុងសេចក្ដីថ្លែងការណ៍ចុះផ្សាយដោយរោងពុម្ព Penguin Random House បានឱ្យដឹងថា៖ «ខ្ញុំនឹងសរសេររឿងរ៉ាវទាំងនេះ មិនមែនក្នុងនាមជារាជវង្សមួយអង្គនោះទេ តែជាមនុស្សម្នាក់ដូចគេដូចឯង។ ខ្ញុំមានកិច្ចការច្រើនត្រូវធ្វើនារយៈពេលប៉ុន្មានឆ្នាំនេះ ហើយខ្ញុំរំពឹងថា ខ្ញុំនឹងរាយរាប់ប្រាប់ពីបញ្ហាផ្ទាល់ខ្លួន ទាំងពេលវេលាឡើងខ្ពស់ត្រដែត និងធ្លាក់ចុះ រួមទាំង កំហុសឆ្គង និងមេរៀនជីវិត។ ខ្ញុំចង់និយាយថា មិនថាយើងមកពីប្រភពណានោះទេ យើងមានចំណុចរួមជាច្រើនលើសពីការគិត»។
សៀវភៅនេះនឹងផ្ដោតលើកុមារភាពរបស់ទ្រង់ ព្រះជន្ម ១២ វស្សា ពេលព្រះមាតា ព្រះក្សត្រិយ ដាយអាណា បានសោយទីវង្គតក្នុងឧប្បត្ដិហេតុគ្រោះថ្នាក់ចរាចរណ៍ក្នុងទីក្រុងប៉ារីស ក៏ដូចជា ការចូលធ្វើជានាយទាហាន និងបេសកកម្មពីរលើកទៅកាន់ប្រទេសអាហ្វហ្គានីស្ថានផងដែរ។
យោងតាមក្រុមហ៊ុនបោះពុម្ព បានឱ្យដឹងថា៖ «រឿងរ៉ាវជីវិតរបស់ទ្រង់ក៏នឹងផ្ដោតលើភាពរីករាយ ដែលទ្រង់បានក្លាយជាព្រះបិតា និងព្រះស្វាមីមួយអង្គផងដែរ»។
ព្រះអង្គម្ចាស់ ហាររី ព្រះជន្ម ៣៦ វស្សា និងព្រះនាង មេហ្គាន ព្រះជន្ម ៣៩វស្សា បានផ្ដល់បទសម្ភាសជាមួយកម្មវិធីជជែករបស់អាមេរិកដែលរៀបចំឡើងដោយពិធីការិនី អូប្រា វីនហ្វ្រី ដែលជាវិបត្ដិយ៉ាងធ្ងន់ធ្ងរជាមួយរាជវង្សនៅអង់គ្លេស។
យោងតាមរបាយការណ៍នានា បានបង្ហាញថា សំណេរព្រាងដំបូងជិតរួចរាល់ និងគ្រោងសុំការអនុម័យនៅក្នុងខែតុលា។
ព្រះអង្គម្ចាស់ ហាររី នឹងព្រះរាជទានថវិកាពីការលក់សៀវភៅទៅអង្គការសប្បុរសធម៌៕ AFP/HR