.jpg)
មេផេនដា ហ័នហ័ន និងអាឈ្មោល យ័ន ជឺ ក្នុងបន្ទប់រួមកាលពីខែមីនា។ រូបថត AFP
ក្រុងប៉ារីស៖ សួនសត្វបូវ៉ាល់ នៅភាគកណ្តាលប្រទេសបារាំង បានឱ្យដឹងកាលពីថ្ងៃអង្គារថា សត្វខ្លាឃ្មុំផេនដាញីឈ្មោះ ហ័នហ័ន ហាន់ហួន ដែលចិនបានបញ្ជូនពីក្រុងប៉េកាំងតាំងពីឆ្នាំ ២០១២ ឱ្យទៅបារាំងខ្ចីរក្សាទុក ពេលនេះវាបានពពោះលើកទី២ ហើយនៅទឹកដីអឺរ៉ុបមួយនេះ។
អ្នកនាំពាក្យម្នាក់បានប្រាប់ទីភ្នាក់ងារព័ត៌មាន AFP ថា៖ «ការថតអេកូសាស្ត្រប៉ុន្មានម៉ោងមុនបានបញ្ជាក់ពីវត្តមាន អំប្រ៊ីយ៉ុងខ្លាឃ្មុំផេនដា។ ការកើតកូនរបស់មេផេនដាអាចធ្វើឡើងនៅចុងខែនេះ ឬដើមខែសីហា»។
ការបន្តពូជរបស់ខ្លាឃ្មុំផេនដាដែលចិញ្ចឹមដោយមនុស្ស និងការបន្តពូជពួកវានៅក្នុងព្រៃ គឺមានការលំបាកខ្លាំងណាស់ ដោយសារខ្លាឃ្មុំផេនដាញីមានចំណង់ដោយឈ្មោលតែម្តងគត់ក្នុង ១ ឆ្នាំ ហើយឱកាសដ៏ខ្លីសម្រាប់អាឈ្មោលនោះ គឺតែ ៤៨ ម៉ោង។
មេផេនដា ហ័នហ័ន និងអាឈ្មោលឈ្មោះ យ័ន ជឺ គឺជាតារាល្បីប្រចាំសួនសត្វបូវ៉ាល់ ហើយដំណឹងវាមានកូនទី២ ធ្វើឱ្យមន្ត្រីសួនសត្វរំភើបចិត្តយ៉ាងខ្លាំង ក្រោយពីពួកគេបានព្យាយាមដាក់ឱ្យដោយគ្នា ៨ ដង ក្នុងខែមីនា។
ដើម្បីធានាថា វាច្បាស់ជាអាចបង្កកំណើតដោយពេទ្យសត្វក៏អនុវត្តជំនួយបង្កកំណើតសិប្បនិម្មិត ដោយប្រើវិធីបញ្ចូលមេជីវិតថែមទៀត។
បច្ចេកទេសត្រូវបានប្រើលើ ហួនហួន សម្រាប់កំណើតកូនដំបូងឈ្មោះ យាន ម៉េង នៅឆ្នាំ ២០១៧ ដែលជាខ្លាឃ្មុំផេនដាដំបូងកើតនៅបារាំង។
ឥឡូវ ខ្លាឃ្មុំ យាន ម៉េង ធំ ហើយឆ្នាំនេះវានឹងត្រូវបញ្ជូនទៅចិន ដែលមានខ្លាឃ្មុំផេនដាប្រមាណ ២ ០០០ ក្បាលរស់នៅក្នុងព្រៃ ហើយ ៥០០ ក្បាលទៀត ត្រូវបានចិញ្ចឹម។ ការបង្កកំណើត និងពពោះរបស់ខ្លាឃ្មុំផេនដាចន្លោះពី ៣ ទៅ ៥ ខែ៕ AFP/HR
