ក្រុងរ៉ូម៖ ផលិតករ ក្លូអ៊ី ចាវ ដែលរឿង «Nomadland» បានគ្រងដំណែងភាពយន្ដល្អបំផុតសម្រាប់ពានរង្វាន់ Academy Awards នាឆ្នាំនេះ នឹងធ្វើជាគណកម្មការមួយរូបនៃមហោស្រពភាពយន្ដក្រុងវេនិកខាងមុខ។ នេះបើយោងតាមក្រុមអ្នករៀបចំកម្មវិធីបានឱ្យដឹងកាលពីថ្ងៃពុធ។
មហោស្រពភាពយន្ដអន្ដរជាតិប្រចាំឆ្នាំ ដែលគ្រោងរៀបចំឡើងនៅ លើដែនកោះ លីដូ ចាប់ពីថ្ងៃទី ១ ដល់ ១១ ខែវិច្ឆិកា នឹងមានសមាសភាពគណកម្មការ ដូចជា ប្រធានលោក បុង ជូនហូ ផលិតករភាពយន្ដកូរ៉េខាងត្បូង ដែលរឿង «ប៉ារ៉ាស៊ីត» របស់លោកបានឈ្នះភាពយន្ដឆ្នើមបំផុតក្នុងឆ្នាំ ២០១៩។
អ្នកនាង ចាវ ដែលកើតនៅត្រកូលគ្រួសារអ្នកទ្រព្យស្ដុកនៅប្រទេសចិន តែរស់នៅ និងធ្វើការនៅសហរដ្ឋអាមេរិក បានគ្រងដំណែលកំពូលសម្រាប់ពានរង្វាន់ក្រុងវេនិកឆ្នាំមុន ពេលភាពយន្ដ «Nomadland» បានឈ្នះ «តោមាស» ជាភាពយន្ដល្អបំផុត មុនពេលបន្ដឈ្នះពានធំៗនៅព្រឹត្ដិការណ៍អូស្ការ ឆ្នាំនេះ រួមទាំង ពានផលិតករឆ្នើម និងរូបភាពល្អផ្ដាច់ផងដែរ។
សមាសភាពគណកម្មការ ៦រូប រួមទាំង ផលិតករ សាវេរីយ៉ូ កូស្ដានហ្សូ មកពីអ៊ីតាលី និង អាឡេចសាន់ឌ័រ ណានូ មកពីរ៉ូមានី តារាភាពយន្ដ និងតារាចម្រៀងអង់គ្លេស ស៊ីនធីយ៉ា អេរីវូ តារាភាពយន្ដកូនកាត់បារាំង-ប៊ែលហ្ស៊ិក វីរហ្គីនី អេហ្វីរ៉ា និងតារាភាពយន្ដកាណាដា សារ៉ា ហ្គាដុន។
មហោស្រពភាពយន្ដក្រុងវេនិក គឺជាព្រឹត្ដិការណ៍ចំណាស់បំផុត និងល្បីល្បាញបំផុតក្នុងលោក ប្រជែងនឹងមហោស្រពភាពយន្ដក្រុងកាន និងប៊ែរឡាំងថែមទៀត៕ AFP/HR