ភ្នំពេញ៖ ដោយសំអាងលើទុននៃអាជីពការងារផ្តួចផ្តើមដំបូងជាតារាម៉ូដែល និងបទពិសោធការងារសង្គមសិល្បៈរយៈពេល ៦ ឆ្នាំ គួបផ្សំរូបសម្ផស្ស សមត្ថភាព ទេពកោសល្យ និងការត្រៀមខ្លួនទុកមុន ១ ឆ្នាំផងនោះ ទើបជំរុញឱ្យទឹកចិត្តស្រីស្អាតរាងតូចច្រឡឹង កញ្ញា ងិន រ៉ូហ្សា មានសុទិដ្ឋិនិយមខ្លាំងចំពោះលទ្ធផលប្រកួតដណ្តើមតំណែងកញ្ញាឯកចក្កវាឡកម្ពុជាឆ្នាំ ២០២១។
ជាបេក្ខភាពមួយរូប ដែលបានដាក់ពាក្យចូលរួមកម្មវិធីប្រកួតកញ្ញាឯកចក្កវាឡកម្ពុជាប្រចាំឆ្នាំ ២០២១ កម្ពស់ ១,៦៨ ម៉ែត្រ វ័យ ២២ ឆ្នាំ កើតនៅភ្នំពេញ កញ្ញា ងិន រ៉ូហ្សា បង្ហើបពីគោលជំហរ និងភាពជឿជាក់លើសមត្ថភាព និងទេពកោសល្យខ្លួនថា៖ «កម្មវិធីប្រកួតកញ្ញាឯកចក្កវាឡកម្ពុជាឆ្នាំ ២០២១ នាងខ្ញុំមានជំនឿចិត្តខ្លាំងលើខ្លួនឯងថា នឹងអាចទទួលបានលទ្ធផលល្អ ១០០ ភាគរយ ដោយសារនាងខ្ញុំបានត្រៀមខ្លួនឯងរួចជាស្រេចរយៈពេល ១ ឆ្នាំ សម្រាប់ការប្រកួតមួយនេះ»។
ទោះបីមានបទពិសោធជាតារាម៉ូដែល និងធ្លាប់ជាប់ចំណាត់ថ្នាក់ល្អក្នុងការប្រកួត Miss & Mister Cat of City 2016 ដោយកញ្ញា រ៉ូហ្សា ទទួលបានចំណាត់ថ្នាក់លេខ ១ ផ្នែក Miss Cat Walk 2016 បានប្រឡូកវិស័យសិល្បៈជាពិធីការិនីទូរទស្សន៍ចំនួន ៦ ឆ្នាំ និងបានបញ្ចប់ការសិក្សាផ្នែកទំនាក់ទំនងអន្តរជាតិនៅសាកលវិទ្យាល័យ មានចំណេះដឹងល្អផ្នែកភាសាបរទេសមែនក្តី ក៏ស្រីស្រស់រូបនេះ នៅរង់ចាំការវាយតម្លៃពីមហាជនលើសមត្ថភាព និងទេពកោសល្យខ្លួនបន្តនាពេលប្រកួត។
កញ្ញា ងិន រ៉ូហ្សា ដែលជាពិធីការិនីនៃកម្មវិធី Revlon Face 2 Face ឆ្នាំ ២០១៨ នៅប៉ុស្តិ៍ទូរទស្សន៍ CTN និងជាទូតសុច្ឆន្ទៈនៃផលិតផល Revlon កាលនោះ បានបញ្ជាក់ថា៖ «យ៉ាងណា ក៏ត្រូវរង់ចាំទុកឱ្យប្រិយមិត្តបងប្អូន ដែលនិយមតាមដានកម្មវិធីប្រកួត Miss Universe Cambodia និងវាយតម្លៃលើសមត្ថភាព និងទេពកោសល្យនាងខ្ញុំ នាពេលចាប់ផ្តើមប្រកួតកម្មវិធីតែម្តង»។
តារាម៉ូដែលរូបស្រស់ រ៉ូហ្សា ដែលមានរាងស្រលូនស្អាតវ័យ ២២ ឆ្នាំ អាចនិយាយបាន ៣ ភាសា គឺភាសាខ្មែរដែលជាភាសាកំណើត អង់គ្លេសអាចប្រើលក្ខណៈសកលបាន និងចេះភាសាថៃបន្តិចបន្តួចនោះ បានបង្ហាញអំពីឆន្ទៈដ៏មោះមុតក្នុងនាមជាស្រ្តីខ្មែរត្រូវចូលរួមការប្រកួតកញ្ញាឯកចក្កវាឡកម្ពុជាក្នុងឆ្នាំ ២០២១ នេះ។
កញ្ញាបន្ថែមថា៖ «មូលហេតុដែលនាងខ្ញុំចង់ដាក់ពាក្យប្រកួតដោយសារវេទិកានេះ វាល្អសម្រាប់ស្ត្រីខ្មែរទាំងអស់ អាចបង្ហាញសមត្ថភាព ទេពកោសល្យខ្លួន និងអាចឈានដល់ការសម្រេចក្តីសុបិនរបស់ខ្លួនឯងបាន។ មិនតែប៉ុណ្ណោះ វាក៏ជាឱកាសអាចចូលរួម ដើម្បីជួយដោះស្រាយនូវរឿងរ៉ាវ ឬបញ្ហានានាជាវិបត្តិក្នុងសង្គម ដែលកំពុងតែត្រូវការជំនួយនោះទៀតផង៕