.jpg)
គង់ ចាន់ស្រីមុំ បង្ហោះរូប និងសារបន្សល់ទ្រព្យទុកឱ្យកូន។ អ្នកនាង គង់ ចាន់ស្រីមុំ និងស្វាមី លោក គឹម សីហា។ រូបថត សហការី
ភ្នំពេញ៖ ស្ងាត់ៗ! ប្តីប្រពន្ធដែលផ្តើមអាជីពជាអ្នកសិល្បៈ និងក្រោយពីរៀបការក៏បង្កើតអាជីវកម្មក្រៅសិល្បៈដុះដាលដូចផ្សិតអ្នកនាង គង់ ចាន់ស្រីមុំ និងស្វាមីលោក គឹម សីហា បង្ហើបពីទ្រព្យធនពួកគេរកបានរួមគ្នា សល់សម្រាប់ទុកជាកេរមរតកឱ្យកូនស្រីដំបូង ទើបវ័យ ៣ ឆ្នាំ។
ទោះបីជាគេឃើញប្តីប្រពន្ធអ្នកសិល្បៈ ១ គូនេះ ដែលបច្ចុប្បន្នជាម្ចាស់អាជីវកម្មនៃក្រុមហ៊ុនលក់ផលិតផលរក្សាសម្ផស្ស និងបើកហាងអាហារសុខភាព យីហោជាឈ្មោះកូនស្រីថា «MOMO» បានបង្ហោះសារបែបត្អូញត្អែរមែនក្តី តែមិនមានន័យថា ពួកគេមានជីវភាពខ្សត់ដូចជាវាចានោះឡើយ។
តារាសម្តែងស្រីធ្លាប់មានឈ្មោះបោះសំឡេងជាតារាស្រីសិចស៊ី សាច់ខ្ចី អ្នកនាង គង់ ចាន់ស្រីមុំ បច្ចុប្បន្នមានវ័យ ៣២ ឆ្នាំ បានបង្ហើរសារ នាពេលខ្លួន និងស្វាមី រួមទាំងកូនស្រីសំណព្វចិត្តវ័យ ៣ ឆ្នាំ ឈ្មោះ គឹម សីហ៍មរកត ហៅ MOMO បានទៅមើលដីដែលទិញ ១ កន្លែង តាមហ្វេសប៊ុក និងអ៊ីនស្តាក្រាមថា៖ «ហ៊ឹម! រកស៊ីយូរហើយ គ្មានសល់លុយអីសោះ សល់តែក្រដាសប្លង់ ៦ កន្លែង អង្គុយឱបទុកឱ្យកូនតែប៉ុណ្ណោះ។ តែប៉ុណ្ណឹងគ្រួសារតូចយើងមានសុខហើយ។ ពួកយើងនឹងបន្តកាន់ដៃគ្នាទៅឱ្យដល់គោលដៅ ដែលអូនបានប្រាថ្នា។ អរគុណ ប្តីដែលផ្តល់សុភមង្គលដល់កូន និងគ្រួសារ»។
ទោះបីជាមិនអាចសុំការបញ្ជាក់លម្អិតថា ប្លង់ផ្ទះ និងដី ៦ កន្លែងនោះ ស្ថិតនៅក្នុងទីក្រុងភ្នំពេញទាំងអស់ ឬមាននៅតាមខេត្តផ្សេងទៀតពីប្តីប្រពន្ធអ្នកសិល្បៈ ដែលស្រាក់ដៃគ្នាបើកអាជីវកម្ម ក្រោយពីរៀបការបាន ៦ ឆ្នាំ មកហើយនោះក្តី ព្រោះទូរស័ព្ទមិនអាចទាក់ទងបានក៏គេសង្កេតឃើញគ្រួសារតូចនេះតែងបង្ហាញពីភាពហ៊ឺហា ស៊ីវិល័យ និងធ្វើដំណើរក្រៅប្រទេសជាញឹកញាប់មិនខ្វះប្រាក់ឡើយ។
គួរបញ្ជាក់ថា តារាស្រីរូបស្រស់ អ្នកនាងគង់ ចាន់ស្រីមុំ បានធ្វើការវះកាត់សម្រាលកូនស្រីដំបូងរបស់ខ្លួនដោយជោគជ័យ នៅព្រឹកថ្ងៃទី ៧ ខែ កក្កដា ឆ្នាំ ២០១៨ ពោលគឺបន្ទាប់ពីថ្ងៃខួបកំណើតរបស់នាង ដែលប្រព្រឹត្តទៅយ៉ាងសប្បាយអស់ដៃជាមួយសាច់ញាតិ ព្រមទាំងមិត្តភក្តិជិតស្និទ្ធ កាលពីរាត្រីថ្ងៃទី ៦ ខែ កក្កដា ឆ្នាំដដែល ឯមន្ទីរពេទ្យ Chetra Polyclinic & Julie Maternity។
បើតាមវីដេអូឃ្លីបខ្លីមួយ ដែលបង្ហាញពីមុខមាត់កូនស្រីជាទីស្រឡាញ់របស់ខ្លួននោះ លោក គឹម សីហា ជាប្តី និងជាប៉ា បានបញ្ជាក់ថា កូនស្រីដែលទើបតែសម្រាលនៅថ្ងៃពិសេស គឺថ្ងៃទី ៧ ខែ ៧ នាវេលាម៉ោង ៧ ព្រឹក ត្រូវបានដាក់ឈ្មោះថា គឹម សីហ៍មរកត ហៅថា «ម៉ូម៉ូ»។
ចំណងស្នេហ៍ជិត ១ ទសវត្សរ៍ រវាងលោក គឹម សីហា និង គង់ ចាន់ស្រីមុំ ឈានដល់ដំណាក់កាលក្រាបផ្ទឹមតាមទំនៀមទម្លាប់ខ្មែរ រៀបការកាលពីថ្ងៃទី ១៤ ខែ មីនា ឆ្នាំ ២០១៦ នៅសណ្ឋាគារលំដាប់ផ្កាយ សូហ្វីតែលភ្នំពេញភូគីត្រា ខណៈពេលដែលការចំណាយលើពិធីមង្គលការនោះ មិនបូកបញ្ចូលនឹងតម្លៃចិញ្ចៀនពេជ្រអស់ជាង ១០ ម៉ឺនដុល្លារ។
ក្រោយពីរៀបការរួចមក អ្នកទាំង ២ ក៏បានរួមគ្នាបោះទុនបើកមុខជំនួញជាច្រើន ដូចជាបើកហាងលក់សម្លៀកបំពាក់នាំចូលទឹកអប់ម៉ាកផ្ទាល់ខ្លួន និងបើកដំណើរការភោជនីយដ្ឋានជាដើម៕
