ក្រុងប៉ារីស៖ ជាអាហារឆ្ងាញ់របស់បារាំង ប៉ុន្តែវាតែងរងសម្ពាធជេរស្ដីពីសកម្មជនការពារសិទ្ធិសត្វ។ តើថ្លើមក្ងាន ឬថ្លើមទា ដែលបារាំងហៅថា ហ្វ័រក្រា បានផលិតចេញពីការបណ្ដុះកោសិកាដើមនៅមន្ទីរពិសោធន៍នោះ អាចទទួលបានការគាំទ្រលើតុអាហារដល់កម្រិតណា?
នោះជាគោលដៅសម្រាប់ក្រុមហ៊ុន Gourmey មានមូលដ្ឋាននៅក្រុងប៉ារីស និងជាការបណ្តាក់ទុនពីអឺរ៉ុប និងអាមេរិក ក្នុងថវិកា ១០ លានដុល្លារ ដើម្បីធ្វើឱ្យរូបមន្តធ្វើម្ហូបថ្លើមទាថ្លើមក្ងានរាងសំប៉ែតៗនេះ ចេញពីមន្ទីរពិសោធន៍ទៅកាន់ចានម្ហូប។
លោក នីកូឡាស ម៉ូន វ័រ គឺជាស្ថាបនិកម្នាក់ក្នុងចំណោម ៣ នាក់ របស់ក្រុមហ៊ុន Gourmey បាននិយាយថា៖ «វាជាផលិតផលដ៏ចម្រូងចម្រាស ហើយយើងពិតជាត្រូវការជម្រើសហ្វ័រក្រាថ្មីសន្លាង»។
រសជាតិដ៏ឆ្ងាញ់ជាប់ចិត្តរបស់វា ជាលទ្ធផលនៃការបញ្ច្រកអាហារតាមបំពង់រុកចូលកបក្សី ដែលការអនុវត្តនេះត្រូវគេចាត់ទុកថា ជាទង្វើសាហាវឃោរឃៅចំពោះសត្វ។
រដ្ឋកាលីហ្វ័រនីញ៉ាបានហាមប្រាមការលក់ហ្វ័រក្រាជាច្រើនឆ្នាំមកហើយ ខណៈញូវយ៉កគ្រោងនឹងដាក់អាហារនេះក្រៅច្បាប់នៅឆ្នាំក្រោម។
អង់គ្លេសហាមការផលិតហ្វ័រក្រា និងកំពុងតែថ្លឹងថ្លែងដាក់បម្រាមលក់ដូរវា ខណៈសភាអឺរ៉ុបកាលពីខែមុនបានស្នើលប់បំបាត់ការបញ្ច្រកចំណីទា និងក្ងាន ដើម្បីប្រមូលផលថ្លើមធំៗ។
ក្រុមហ៊ុន Gourmey បានចំណាយពេលជាង ២ ឆ្នាំ អភិវឌ្ឍថ្លើមបក្សី ដែលមានរសជាតិស្ទើរតែដូចគ្នាបេះបិទនឹងរបស់ធម្មជាតិ ដើម្បីផ្គត់ផ្គង់ផ្ទះបាយចុងភៅបារាំង និងអ្នកនិយមហ្វ័រក្រា។
ក្រោយពីសាកល្បងប្រមាណ ៦០០ ដង ក្រុមហ៊ុនដែលមានបុគ្គលិក ២០ នាក់ និងសហស្ថាបនិកលោក អង់តូនីន ដាវីដូហ្វ អ្នកជំនាញជីវកោសិកា និងវិចទ័រ សាយូស ជាអ្នកជីវមូលេគុល។
លោក សាយូស បានអះអាងថា៖ «បើនិយាយពីរសជាតិ សាច់ និងសណ្ឋានភិនភាគ វាដូចទៅនឹងហ្វ័រក្រាមែនទែន ៩០ ភាគរយឯណោះ។ អ្នកបានភ្លក្សវាស្ទើរមិនដឹងថា ជាហ្វ័រក្រាផលិតនៅមន្ទីរពិសោធន៍ទេ»។
ពួកគេបានប្រើបច្ចេកទេសដកយកកោសិកាពីស៊ុតទា រួចដាក់ក្នុងកែវចិញ្ចឹមអាលុយមីញ៉ូម ទុកឱ្យកោសិកានោះហែលក្នុងសូលុយស្យុងជីវជាតិក្នុងសីតុណ្ហភាព ៣៧ អង្សាសេ។
កោសិកាថ្លើមចាប់ផ្ដើមលូតលាស់ដោយប្រើពេល ២ ទៅ ៣ សប្ដាហ៍ មុននឹងប្រេងរុក្ខជាតិត្រូវបានបន្ថែម ដើម្បីឱ្យសណ្ឋានថ្លើមមានជាតិខ្លាញ់រលើប។
ប៉ុន្តែហ្វ័រក្រាដែលបណ្ដុះពីកោសិកាចាំបាច់ត្រូវការវិញ្ញាបនបត្រពីអាជ្ញាធរសុខាភិបាល ខណៈបច្ចុប្បន្នមានតែសិង្ហបុរីប៉ុណ្ណោះ ដែលអនុម័តឱ្យប្រើប្រាស់ផលិតផលសាច់មាន់ផលិតពីមន្ទីរពិសោធន៍៕ AFP/HR