ភ្នំពេញ៖ សម្បកក្រៅមិនសូវខុសពីនំប៉័ងសាំងវិចទូទៅ តែពេលនំប៉័ងជ្រុងនេះត្រូវបានចិតជាចំណិតតម្រៀបនៅលើចាន សាច់ផុសម៉ដ្តលាយកម្ទេចនំប៉័ងពណ៌លឿងស្រស់ គួរឱ្យចង់ទទួលទានជាមួយកាហ្វេ។
នំថ្មីប្លែកនេះ ជានំប៉័ងត្នោត ផលិតផលក្នុងស្រុករបស់លោក ប៊ុន វុធឌីកា ដែលមានលក់ក្នុងហាង Chrizt ben កំពុងអន្ទងចិត្តភ្ញៀវឱ្យចង់ស្គាល់ចង់ភ្លក្ស និងគាំទ្រផលិតផលខ្មែរ។
ត្នោតជាឈើពហុប្រយោជន៍តាំងពីចុងដល់គល់ តាំងពីការធ្វើជាជម្រក យានជំនិះផ្លូវទឹក សម្ភារប្រើប្រាស់សព្វសារពើ ភេសជ្ជៈ និងអាហារនំនែក។
រុក្ខជាតិអត្តសញ្ញាណកម្ពុជា និងសម្បូរដុះលូតលាស់នៅទឹកដីខេត្តកំពង់ស្ពឺ ត្រូវបានលោក ប៊ុន វុធឌីកា នាំយកផ្លែរបស់វាមកច្នៃជារូបមន្តនំប៉័ងដ៏ឈ្ងុយឆ្ងាញ់ត្រូវនឹងអ្នកមានចំណូលចិត្តនំត្នោតរួមទាំងលោកផង។
គំនិតនៃការច្នៃផ្លែត្នោតធ្វើជានំប៉័ងត្រូវបានម្ចាស់ហាង Chrizt ben រូបនេះឱ្យដឹងថា៖ «កាលខ្ញុំនៅក្មេង ខ្ញុំបានរស់នៅខេត្តកំពង់ស្ពឺ។ កាលនោះខ្ញុំចូលចិត្តញ៉ាំនំត្នោតលក់នៅអំពែភ្នំ។ តែប៉ុន្មានឆ្នាំមុន ខ្ញុំឃ្លានហើយទៅរកទិញលែងមាន»។
លោករៀបរាប់ថា៖ «ក្រោយមក ខ្ញុំបានតែគិតថា បើមានហាងមានជំនាញ មានម៉ាស៊ីនដុតត្រឹមត្រូវ ខ្ញុំនឹងបង្កើតនំប៉័ងត្នោតដោយខ្លួនឯង។ ខ្ញុំក៏ធ្លាប់ប្រាប់អ្នកធ្វើនំប៉័ងល្បីនៅស្រុកយើងដែរ តែគេថា ធ្វើមិនកើតពីព្រោះត្នោតមិនចូលជាមួយម្សៅទេ។ ពេលគ្មានអ្នកចាប់អារម្មណ៍ គ្មានអ្នកធ្វើ ខ្ញុំមានតែប្រឹងធ្វើឱ្យចេញខ្លួនឯង»។
ហាងនំប៉័ង Chrizt ben ក៏បានបើកដំណើរការនៅថ្ងៃទី ៦ ខែមេសា ឆ្នាំនេះ។ លុះពេលហាងចាប់ផ្ដើមដើរស្រួល លោកផ្ដើមសាកល្បងធ្វើនំប៉័ងត្នោត។
លោកបានសូមឱ្យមិត្តភក្តិរស់នៅកំពង់ស្ពឺជួយរកត្នោត ហើយមិត្តភក្តិក៏បានទាក់ទងបន្តឱ្យអ្នកភូមិដើរប្រមូល និងផ្ដល់ចំណូលឱ្យពួកគាត់ ១ ផ្លែ ១០០០-២០០០ រៀល ទៅតាមទំហំត្នោត។
សម្លាញ់លោកប្រាប់ថា អ្នកភូមិសប្បាយចិត្តដែលលោកប្រមូលទិញត្នោត ព្រោះកន្លងមកមិនដែលមានអ្នកទិញដូច្នេះទេ។
ក្រោយទទួលបានត្នោត ២០ ផ្លែ លោកសាកល្បងធ្វើនំប៉័ងត្រឹម ៤-៥ ផ្លែ។ នៅពេលអនុវត្តធ្វើនំតាមក្បួនអឺរ៉ុប រសជាតិបែរជាផ្អែមពេក។ លោកក៏បន្ថយជាតិស្ករនៅតែ ២០ ភាគរយ តែរសជាតិនៅតែមិនត្រូវ។ លោកក៏សាកសួរពីអ្នកជំនាញខាងផ្លែត្នោត ទើបដឹងថា មូលហេតុគឺដោយសារត្នោតទុកយូរ។ ដូច្នេះទើបលោកព្យាយាមយកត្នោត ដែលទុំពីដើម ដោយមិនយកត្នោតទុំធ្លាក់ជ្រុះនោះទេ។
ការចម្អិនសាកល្បងជាច្រើនលើកពេញ ១ អាទិត្យ រហូតទទួលបានលទ្ធផលជោគជ័យ ទើបលោកបានដាក់បញ្ចូលក្នុងបញ្ចីរាយនាមអាហារក្នុងហាងនៅទី ១៦ ខែឧសភា។
អ្នកលក់នំប៉័ងវ័យ ៤១ ឆ្នាំរូបនេះបានបន្ដថា៖ «នំប៉័ងត្នោត ៣០ ដើម យើងត្រូវការត្នោត ១៥-២០ ផ្លែ។ យើងមិនអាចស្តុកទុកត្នោតបានទេ។ យើងយកវាមកភ្លាម ត្រូវធ្វើភ្លាម។ មានន័យថា គេយកដល់ល្ងាចយើងផ្ដើមធ្វើល្ងាច»។
លោក វុធឌីកា បានបន្តថា៖ «យើងត្រូវបកផ្លែត្នោត និងឈូសវាយកទឹកយកសាច់ ហើយយើងយកវាមកលាយជាមួយម្សៅរួចត្រាំវាទុក។ ស្អែកព្រលឹមឡើង យើងចាប់ផ្ដើមវ៉ៃហើយលញ់វាដាក់ឱ្យឡើង ទើបយកទៅដុតតែម្ដង»។
លោកបានរៀបរាប់ពីលក្ខណៈ និងរសជាតិនៃនំប៉័ងត្នោតថា វាមានសណ្ឋានជានំប៉័ងសាំងវិចដោយអាចទុកបានយូរថ្ងៃ មិនរឹងដូចនំត្នោតខ្មែរទេ។ រសជាតិវា គឺដូចនំត្នោតខ្មែរ គឺពេលដាក់ក្នុងមាត់មានក្លិនត្នោត និងរសជាតិត្នោតក្នុងនោះ។ សម្រាប់តម្លៃមិនខុសនំប៉័ងធម្មតា។
អតិថិជនបានភ្លក្សនំត្នោត ច្រើនតែងសរសើរថាឆ្ងាញ់។
ម្ចាស់ហាងនំប៉័ងដែលឆ្លៀតរៀនជំនាញធ្វើនំពេលលោកទៅសិក្សានៅបរទេសរូបនេះ បន្តថា៖ «បើយើងធៀបចំនួននំដែលចេញក្នុង ១ ថ្ងៃ យើងតែងលក់អស់ៗ។ បើមាន ៣០ ដើម អស់ទាំង ៣០ ដើម។ យើងមិនធ្វើឱ្យលើសពីតម្រូវការទេ។ បើមានគេកុម៉្មង់ យើងធ្វើតាមហ្នឹង។ យើងផ្ដោតលើនំថ្មីៗសម្រាប់នំដែលសល់ យើងទុក ឬយើងចែកទៅអ្នកភូមិដែលអត់»។
យ៉ាងណាមិញ លោកទទួលស្គាល់ថា ចំណូលចិត្តមនុស្សផ្សេងគ្នាមិនមែនគ្រប់គ្នាសុទ្ធតែចូលចិត្តនំប៉័ងត្នោតទេ។ អ្នកខ្លះក៏មិនទាន់ស្គាល់ ហើយអ្នកខ្លះក៏មិនចូលចិត្តនំប៉័ង។ ដូចនេះលោកតែងតែធ្វើនំរសជាតិថ្មីៗ ដើម្បីទាក់ទាញអតិថិជន។
លោកអះអាងថា លោកជាមនុស្សចូលចិត្តជម្នះសម្ដីអ្នកដទៃ។ បើគេថា ធ្វើអីមិនកើត លោកនឹងប្រឹងប្រែងធ្វើឱ្យបាន។ លោកចង់ឱ្យប្រជាជនស្រឡាញ់ដើមត្នោត ជាអត្តសញ្ញាណជាតិមួយ និងទាញយកវាជាប្រយោជន៍ជានិរន្តរ៍ ដោយមានអ្វីជាសំអាងលើសពីត្រឹមតែការនិយាយហើរតាមខ្យល់។
លោក វុធឌីកា បញ្ជាក់ថា៖ «ខ្ញុំគិតក្នុងចិត្តថា ខ្ញុំធ្វើខ្លួនឯងឱ្យចេញសិនហើយចាំនិយាយតាមក្រោយ។ មួយទៀត អ្នកណាក៏អាចធ្វើបានឱ្យតែយើងមានគំនិត គិតផ្លូវត្រូវ ហើយផ្ដើមធ្វើក្នុងផ្លូវត្រូវទៅ វាចេញលទ្ធផលត្រូវហើយ»។
លោកនិយាយថា៖ «សម្រាប់ខ្ញុំជាអ្នកលក់នំប៉័ង ខ្ញុំមានតែសូមឱ្យអតិថិជនទាំងអស់ដែលចង់ដឹងថា នំប៉័ងត្នោតឆ្ងាញ់មិនឆ្ងាញ់ ឬសាច់នំប៉័ងទន់ល្មឿយយ៉ាងម៉េច ចូរកុម្ម៉ង់យកទៅសាក។ ភ្លក្សហើយចាំជឿ កុំទាន់អាលជឿអ្នកលក់ ឬអ្នកកាសែត។ យើងស្វាគមន៍គ្រប់មតិយោបល់»។
Chrizt ben មានទីតាំងនៅម្តុំសាលាសង្កាត់ក្រាំងធ្នង់ នៅផ្លូវ ២០១១ ផ្ទះលេខ ១២៧ Eo E1. ខណ្ឌសែនសុខ។ ចូលទៅកាន់ទំព័រហ្វេសប៊ុក Chrizt ben Bread and Cafe៕