.jpg)
បន្ទប់ AirBubble ជាកន្លែងក្មេងលេងច្នៃបង្កើតថ្មីដែលបំពាក់ប្រព័ន្ធបន្សុតខ្យល់បរិសុទ្ធតាមធម្មជាតិ។ AFP
ក្រុងវ៉ាសូវី៖ ចំពោះការឌីហ្សាញថ្មីនៅភាគកណ្ដាលក្រុងវ៉ាសូវី រុក្ខជាតិស្លែស៊ីបរិស្ថានកខ្វក់ និងកាបោនឌីអុកស៊ីត ដើម្បីបង្កើតជាខ្យល់អុកស៊ីសែនស្អាតក្នុងទីក្រុង ដែលត្រូវបានផ្ដល់ចំណាត់ថ្នាក់ទីក្រុងខ្យល់កខ្វក់បំផុតមួយនៅតំបន់អឺរ៉ុប។
លោក ម៉ាកូ ផូឡេតតូ សហស្ថាបនិកក្រុមហ៊ុនឌីហ្សាញ ecoLogicStudio ដែលប្រតិបត្ដិការគម្រោងនេះបាននិយាយថា៖ «នៅមានធនធានដ៏មានតម្លៃក្នុងការនាំយកប្រព័ន្ធជីវចម្រុះធម្មជាតិមកកាន់តែទីក្រុង»។
យោងតាមទិន្នន័យចេញផ្សាយដោយទីភ្នាក់ងារបរិស្ថានអឺរ៉ុប (EEA) កាលពីខែមុន បានឱ្យដឹងថា ទីក្រុងវ៉ាសូវី ស្ថិតក្នុងលំដាប់ថ្នាក់ទី ២៦៩ ចំពោះគុណភាពខ្យល់ក្នុងបញ្ជីទីក្រុងនៅអឺរ៉ុបទាំង ៣២៣។
កុមារនាំគ្នាលេងយ៉ាងសប្បាយក្នុងបន្ទប់បន្សុតខ្យល់បរិសុទ្ធនៃមជ្ឈមណ្ឌលវិទ្យាសាស្ដ្រកូពើនីស្យូស។ AFP
ពពុះខ្យល់បរិសុទ្ធត្រូវបានបំពាក់ជាមួយបំពង់កែវជាច្រើន ដែលផ្ទុកស្លែលាយទឹក ដែលមានសមត្ថភាពស្រូបខ្យល់កខ្វក់ពីផ្នែកខាងក្រោមបំពង់របស់វា។
សមាសធាតុបៃតងកម្ចាត់ម៉ូលីគុលកខ្វក់ និងកាបោនឌីអុកស៊ីត មុនពេលបញ្ចេញខ្យល់អុកស៊ីសែនចេញពីបំពង់បាយអូរ៉េអាទ័រ។
នៅពេលរសៀលនៃអាកាសធាតុស្រឡះល្អ កុមារនាំគ្នាហក់លេងក្នុងបរិយាកាសខ្យល់បរិសុទ្ធយ៉ាងសប្បាយរីករាយ ដោយពួកគេលោតលើបាល់ជ័រ និងតោងខ្សែយោលផងដែរ។
ពេលកំពុងលោត កុមារី អានីយ៉ា អាយុ ៨ឆ្នាំ បានស្រែកឡើងថា៖ «សប្បាយណាស់»។
កុមារលេងយ៉ាងសប្បាយនៅទីបន្សុតខ្យល់បរិសុទ្ធនៃមជ្ឈមណ្ឌលវិទ្យាសាស្ដ្រកូពើនីស្យូស។ AFP
ម្ដាយរបស់កុមារីរូបនេះ ម៉ាល់ហ្កូរហ្សាតា រ៉ូណា ក៏បានសាទរគំនូរគម្រោងស្ទួយបរិស្ថាននេះផងដែរ។
អ្នកគ្រូអង់គ្លេសអាយុ ៤២ ឆ្នាំ បានប្រាប់ AFP ថា៖ «ពិតជាឡូយ! ជាពិសេស នៅក្នុងទីក្រុងធំៗមែនទេ? ដោយសារយើងដឹងថា ការបំពុលបរិស្ថាន និងផ្សែងពុលមាននៅគ្រប់ទីកន្លែង។ យ៉ាងហោចណាស់ ពេលនេះ វាធ្វើឱ្យក្មេងៗមានឱកាសស្រូបខ្យល់បរិសុទ្ធបានខ្លះ»។
បន្ទប់ក្មេងលេងរាងមូលតូចមួយត្រូវបានរៀបចំឡើងនៅក្បែរមជ្ឈមណ្ឌលវិទ្យាសាស្ដ្រកូពើនីស្យូសលើដងទន្លេ ដោយបើកដំណើរការរហូតដល់ខែវិច្ឆិកា តែវាអាចស្ថិតនៅទីនោះអចិន្ដ្រៃយ៍ ហើយក៏នៅមានគម្រោងតម្លើងបន្ទប់ខ្យល់បរិសុទ្ធទាំងនេះនៅតាមបណ្ដាទីក្រុងផ្សេងៗទៀត៕ AFP/HR
បំពង់ស្លែលាយទឹកស្ថិតក្នុងបន្ទប់ AirBubble ដែលស្រូបសមាសធាតុកខ្វក់ និងបញ្ចេញអុកស៊ីសែន។ AFP
កុមារតូចលេងយ៉ាងសប្បាយក្នុងបន្ទប់បន្សុតខ្យល់បរិសុទ្ធនៃមជ្ឈមណ្ឌលវិទ្យាសាស្ដ្រកូពើនីស្យូស។ AFP
បន្ទប់ AirBubble ជាកន្លែងក្មេងលេងច្នៃបង្កើតថ្មីដែលបំពាក់ប្រព័ន្ធបន្សុតខ្យល់បរិសុទ្ធតាមធម្មជាតិ។ AFP
