.jpg)
ក្រុងប៉េកាំង៖ កំពូលតារាប៉ុបកូនកាត់ចិន-កាណាដា គ្រីស វូ ត្រូវបានឃុំខ្លួនពីបទសង្ស័យរំលោភសេពសន្ទវៈ។ នេះបើយោងតាមប៉ូលិសបានឱ្យដឹង។
លោក វូ ត្រូវបានចោទកាលពីសប្ដាហ៍មុនដោយនិស្សិតម្នាក់អាយុ ១៩ ឆ្នាំឈ្មោះ ឌូ ម៉ៃហ៊្សូ ពីបទរំលោភសេពសន្ទវៈអំឡុងសម្ព័ន្ធស្នេហាកាលពេលនាងអាយុ ១៧ ឆ្នាំ ដែលនាំឱ្យមានការផ្ដន្ទាទោសតារាចម្រៀងរូបនេះនៅលើបណ្ដាញសង្គមចិន និងនាំឱ្យយីហោប្រណីតៗជាច្រើនទម្លាក់ចោលកុងត្រាជាមួយលោក។
ប៉ូលិសក្រុងខណ្ឌឆាវយ៉ាង ក្រុងប៉េកាំង បានឱ្យដឹងក្នុងសេចក្ដីថ្លែងការណ៍លើ Weibo ដោយសំដៅឈ្មោះត្រកូល វូ តាមប្រពៃណីចិនថា៖ «លោក វូ យីហ្វាន អាយុ ៣០ ឆ្នាំ សញ្ជាតិកាណាដា ពេលនេះកំពុងត្រូវបានឃុំខ្លួនទៅតាមច្បាប់ថ្មីប្រចាំតំបន់ឆាវយ៉ាងនៃការិយាល័យសន្ដិសុខសាធារណៈក្រុងប៉េកាំងពីបទសង្ស័យរំលោភ»។
ក្រុមមន្ដ្រីបានឱ្យដឹងថា ពួកគេបានការស៊ើបអង្កេតក្រោយលោក វូ ជាកំពូលតារាល្បីម្នាក់ប្រចាំប្រទេសចិន ត្រូវបានរាយការណ៍ដោយអ្នកប្រើប្រាស់អ៊ីនធឺណិតពិបទ «បោកបញ្ឆោតយុវតីរួមភេទជាច្រើននាក់ដោយប្រើងារជាសង្សា»។
លោក វូ បានក្លាយជាតារាចម្រៀងល្បីក្នុងវិស័យចម្រៀងកូរ៉េ K-pop នៃក្រុម EXO មុនពេលចាកចេញទៅបង្កើតអាជីពជាតារាចម្រៀង ភាពយន្ដ ម៉ូដែល និងងារជាកំពូលតារាល្បីតែឯងចូលរួមកម្មវិធីផ្សេងៗដ៏ជោគជ័យ។
តារាដែលមានសញ្ជាតិកាណាដា និងបានរស់នៅរវាងទីក្រុង វេនខូវើរ និងហ្គ័ងហ៊្សូ បានបដិសេធរាល់ការចោទប្រកាន់ពីបទប្រទុសកេរ្ដិ៍ និងទទូចថា លោកជាជនស្លូតត្រង់។
លោកបានសរសេរកាលពីថ្ងៃទី ១៩ ខែកក្កដាថា៖ «ខ្ញុំបានជួបកញ្ញា ឌូ តែម្ដងគត់ពេលកម្មវិធីជួបជុំមិត្ដភក្ដិ។ ខ្ញុំមិនបានបង្អកស្រាដល់នាងទេ។ ខ្ញុំមិនដែលលោងលោមនារីៗរួមភេទឡើយ ឬទាក់ទងបញ្ហា «រំលោភក្នុងសម្ព័ន្ធភាពស្នេហា»។ ខ្ញុំមិនគេងជាមួយក្មេងស្រីក្រោមអាយុឡើយ»។
មេធាវីរបស់លោកដាក់ពាក្យប្ដឹងកញ្ញា ឌូ ពីបទបរិហាកេរ្ដិ៍ ហើយនិស្សិតស្រីរូបនេះ បាននិយាយថា កញ្ញាក៏បានចាត់វិធានការផ្លូវច្បាប់ប្រឆាំងលោក វូ វិញដែរ។ កញ្ញា ឌូ បានឱ្យដឹងថា កំពូលតារារូបនេះព្យាយាមឱ្យប្រាក់បំបិតមាត់ ៧៧ ១០០ដុល្លារ។
យីហោផលិតផលល្បីៗ ដូចជា Louis Vuitton, Bulgari, Bulgari, L''Oreal Men និង Porsche កាលពីសប្ដាហ៍មុនបានផ្អាកកិច្ចសហការជាមួយតារារូបនេះ ដោយាសរវិបត្ដិក្ដីក្ដាំង៕ AFP/HR
