ភ្នំពេញ៖ ការប្រកួតជ្រើសរើសសា្នដៃតែងនិពន្ធរឿងខ្លី ពានរង្វាន់អក្សរសិល្ប៍ស្លឹករឹតលើកទី២ ឆ្នាំ ២០២១ ចាប់ផ្តើមទទួលស្នាដៃបេក្ខជនចូលរួមប្រកួតហើយ ក្រោមប្រធានបទ «ជីវិតរស់នៅប្រចាំថ្ងៃរបស់ប្រជាជនកម្ពុជា ក្នុងរបបកម្ពុជាប្រជាធិបតេយ្យ ប៉ុល ពត» ដែលសមាគមអ្នកនិពន្ធខ្មែរ សហការរៀបចំជាមួយមជ្ឈមណ្ឌលឯកសារកម្ពុជា។
បើតាមសេចក្តីជូនដំណឹងពីគេហទំព័រផ្លូវការសមាគមអ្នកនិពន្ធខ្មែរ កាលពីចុងសប្តាហ៍កន្លងមកនេះបានឱ្យដឹងថា៖ «សូមប្រគេន និងជម្រាបជូនដំណឹងដល់សាធារណជនមេត្តាជ្រាបថា មជ្ឈមណ្ឌលឯកសារកម្ពុជា ដោយមានការគាំទ្របច្ចេកទេសពីសមាគមអ្នកនិពន្ធខ្មែរ បានរៀបចំការប្រកួតជ្រើសរើសស្នាដៃតែងនិពន្ធ «ពានរង្វាន់អក្សរសិល្ប៍ស្លឹករឹត» លើកទី២ ឆ្នាំ ២០២១ ក្រោមប្រធានបទ «ជីវិតរស់នៅប្រចាំថ្ងៃរបស់ប្រជាជនកម្ពុជា ក្នុងរបបកម្ពុជាប្រជាធិបតេយ្យ ប៉ុល ពត» ក្នុងគោលបំណងរួមចំណែកលើកស្ទួយពីតម្លៃអក្សរសាស្ត្រជាតិខ្មែរ និងថែរក្សាប្រវត្តិសាស្ត្រ នៃជីវិតរស់នៅរបស់ប្រជាជនខ្មែរក្នុងរបបកម្ពុជាប្រជាធិបតេយ្យ ប៉ុល ពត តាមរយៈស្នាដៃនិពន្ធ»។
ប្រភពខាងលើបានបន្តថា៖ «សិស្ស និស្សិត គ្រូបង្រៀន អ្នកនិពន្ធ អ្នកសិក្សាស្រាវជ្រាវ និងអ្នករស់រានមានជីវិតពីរបបខ្មែរក្រហម អាចចូលរួមក្នុងការប្រកួតជ្រើសរើសស្នាដៃ តែងនិពន្ធនេះ ដោយអនុវត្តតាមលក្ខខណ្ឌនៃការប្រកួតជ្រើសរើស ដូចជាទី១- ខ្លឹមសាររឿងត្រូវតែជាស្នាដៃនិពន្ធថ្មី «អំពីជីវិតរស់នៅប្រចាំថ្ងៃរបស់ប្រជាជនកម្ពុជា ឆ្លងកាត់របបកម្ពុជាប្រជាធិបតេយ្យ ប៉ុល ពត» ដកស្រង់ចេញពីរឿងរ៉ាវពិតរបស់អ្នករស់រានមានជីវិត ពីរបបខ្មែរក្រហម និងមិនប្រតិដ្ឋសាច់រឿង។ ទី២- ស្នាដៃសាច់រឿង មានចំនួនទំព័រចាប់ពី ១២០ ដល់ ២០០ ទំព័រ សម្រាប់អត្ថបទវាយកុំព្យូទ័រ ឬចាប់ពី ២០០ ដល់ ២៥០ ទំព័រ សម្រាប់អត្ថបទសរសេរ ដោយដៃនៅលើក្រដាស A4។ ទី៣- ប្រើប្រាស់ពុម្ពអក្សរខ្មែរ «Khmer OS Siemreap» ទំហំ ១២ មិនដាក់ក្បាល ឬជើងទំព័រ។
ទី៤- លួចចម្លងស្នាដៃរបស់អ្នកដទៃ ឬធ្លាប់ទទួលបានជយលាភីរួចហើយ នឹងមិនត្រូវបានជ្រើសរើសទេ។ ទី៥- សាច់រឿងត្រូវមានខ្លឹមសារ និងប្រភពច្បាស់លាស់ដោយភ្ជាប់ឯកសារយោងមកជាមួយផង»។
ស្នាដៃសំណេរសាច់រឿងទាំងអស់ នឹងត្រូវពិនិត្យមុនពេលដែលស្នាដៃទាំងនេះ ត្រូវរៀបរៀងបោះពុម្ពផ្សាយ ចងក្រងជាសៀវភៅ ឬផលិតជាភាពយន្ត។ ស្នាដៃទទួលជយលាភីចាប់ពីលេខ ១ ដល់ ៥ នឹងទទួលបានរង្វាន់ជាថវិកា វិញ្ញាបនបត្រ និងពានកិត្តិយស ហើយស្នាដៃពីលេខ ៦ ដល់ ១០ នឹងទទួលបានរង្វាន់លើកទឹកចិត្ត។
សាធារណជនមានបំណងចូលរួមប្រកួតប្រជែងជ្រើសរើសស្នាដៃតែងនិពន្ធ ត្រូវបានលើកទឹកចិត្តឱ្យចាប់ផ្តើមធ្វើកិច្ចការនេះ ដោយខ្លួនឯង រួចផ្ញើស្នាដៃខ្លួនមកកាន់មជ្ឈមណ្ឌលឯកសារកម្ពុជា ឬសមាគមអ្នកនិពន្ធខ្មែរ ចាប់ពីថ្ងៃជូនដំណឹងរហូតដល់ថ្ងៃទី ៣១ ខែ មីនា ឆ្នាំ ២០២២ ឬតាមអាសយដ្ឋាននៃមជ្ឈមណ្ឌលឯកសារកម្ពុជា ផ្ទះលេខ ៦៦ វិថីព្រះសីហនុ សង្កាត់ទន្លេបាសាក់ ខណ្ឌចំការមន រាជធានីភ្នំពេញ (ក្បែរវិមានឯករាជ្យ) តាមរយៈសារអេឡិចត្រូនិក truthbunthorn.s@dccam.org ឬទាក់ទងទូរស័ព្ទលេខ ០១២ ៩៩៦ ៧៥០។ ទីស្នាក់ការសមាគមអ្នកនិពន្ធខ្មែរ ស្ថិតក្នុងបរិវេណវត្តបទុមវតី រាជធានីភ្នំពេញ តាមរយៈសារអេឡិចត្រូនិក៖ Khmerwriterkwa@gmail.com ឬតាមទូរស័ព្ទលេខ ០៨៩ ៨៥៦ ៧៦៤, ០៧៨ ៧៨៨ ៩៩០៕