ភ្នំពេញ៖ ក្រវិលកងរុំសរសៃលួសតូចឆ្មារ និងរំលេចនូវត្បូងប៉ុន្មានគ្រាប់ កំពុងទទួលការពេញនិយមខ្លាំងសម្រាប់នារីសម័យថ្មី រហូតដល់បង្ហាញវត្ដមាននៅលើក្របទស្សនាវដ្ដីល្បីលំដាប់ពិភពលោក Vogue ថែមទៀត។
ក្រវិលត្បូង វ៉លតុន ដែលបញ្ចេញឆោមសម្រស់លើតារាម៉ូដែលនៅលើក្របទស្សនាវដ្ដីល្បីៗឯនាយសមុទ្រ កើតចេញពីទឹកដៃរបស់ស្ដ្រីខ្មែរ ក្រោមគំនិតផ្ដួចផ្ដើម និងបង្ហាញបង្រៀនពីអ្នកឌីហ្សាញមូលពីក្រុងញូវយ៉ក។
រ៉ាជែល វ៉លសុន បានឱ្យដឹងដំណើរដើមទងនៃការបើកសិប្បកម្មជាងទងនៅកម្ពុជាថា៖ «ពេលនៅញូវយ៉ក ខ្ញុំគ្មានអារម្មណ៍បំពេញការងារជាអ្នកដើរម៉ូដនោះទេ។ វាហាក់ដូចជាពោរពេញទៅដោយភាពងងឹត និងឥតប្រយោជន៍។ ក្នុងពេលនោះ ខ្ញុំចង់យកជំនាញដែលមានក្នុងវិស័យហ្វេស្សិន និងជំនួញទៅធ្វើអ្វីជួយដល់អ្នកដទៃ»។
រ៉ាជែល ដែលរចនាគ្រឿងអលង្ការ ដូចជា ចិញ្ចៀន ក្រវិល ខ្សែដៃ និងខ្សែក បន្ថែមភាពទាក់ទាញជាមួយការរចនាអង្កាំជ័រពណ៌ស្រស់ឆើត រួមទាំងត្បូង និងគជ់ មានបំណងលើកកម្ពស់ជាងទងជាស្ដ្រីក្នុងការទ្រទ្រង់ខ្លួនឯង។
រ៉ាជែល បានប្រាប់ ភ្នំពេញ ប៉ុស្ដិ៍ ថា៖ «កម្ពុជាជាប្រទេសមានតម្រូវការ និងសម្បូរស្រ្តីមានបំណងជួយទ្រទ្រង់គ្រួសារ។ ខ្ញុំបានមកមើលស្ថានភាព ៣ សប្ដាហ៍ ជួបជាមួយក្មេងស្រីមួយចំនួន និងស្រាវជ្រាវពីតម្រូវការពួកគាត់។ ប៉ុន្មានខែបន្ទាប់ ខ្ញុំឈប់ពីការងារ និងផ្លាស់មករស់នៅទីនេះ»។
មកដល់ភ្នំពេញក្នុងឆ្នាំ ២០១៣ រ៉ាជែល បានជួបជាមួយស្រីម៉ៅ ដែលមុននេះជាម្ចាស់ហាងសាឡនមួយ។ ចំណូលចិត្តដូចគ្នាក្នុងការផ្ដល់អំណាចឱ្យស្រ្តី ក៏ដូចជាវិស័យហ្វេស្សិន និងការតស៊ូ មិនយូរប៉ុន្មានអ្នកទាំង ២ បានបង្កើត «ពេញលេញ» ឡើង។
«ពេញលេញ» ផ្ដល់ការបណ្តុះបណ្តាលជំនាញជាងទងដល់ស្ដ្រីខ្មែរ ព្រមទាំងបើកថ្នាក់ភាសាអង់គ្លេស និងកម្មវិធីផ្សេងៗទៀត ដើម្បីជួយដល់ស្ត្រីបន្ថែមឱ្យមានលទ្ធភាពទ្រទ្រង់ និងងើបឈរដោយខ្លួនឯងបាន។
រ៉ាជែល ស្រីម៉ៅ រួមទាំងបុគ្គលជាងទងបានសហការគ្នាច្នៃម៉ូដ និងឌីហ្សាញគ្រឿងអលង្ការតម្លៃចន្លោះពី ២២-២៤៩ ដុល្លារ ដោយខ្លួនឯង ដែលកើតចេញពីកម្លាំងចិត្ដ និងភាពស្រស់ស្អាតរបស់អ្នកបង្កើតជូនដល់អ្នកពាក់ទាំងឡាយ។
សិប្បកម្មជាងទង «ពេញលេញ» ទទួលការកុម្ម៉ង់ម៉ូដទៅតាមចំណូលចិត្ដអតិថិជន ដោយផ្ដោតសំខាន់លើគុណភាព ជាថ្នូរនឹងការវិនិយោគដល់សិប្បករផងដែរ។
អ្នករៀនច្នៃគ្រឿងអលង្ការខ្លួនឯង រ៉ាជែល ប្រាប់ពីគំនិតចេញម៉ូដថា៖ «យើងទទួលបានការបំផុសគំនិតពីគ្រប់កន្លែង មិត្តភក្តិ សិល្បករ ធម្មជាតិ និងពេលខ្លះតាមសុបិនទៀតផង។ យើងព្យាយាមគិតមុនទៅលើស្ទីល ឬពណ៌បែបណាអាចពេញនិយមទៅថ្ងៃមុខ។ យើងផ្ដោតលើភាពបុរាណ តែភ្ជាប់ភាពទាន់សម័យ»។
ទាំងនេះ បាននាំឱ្យ «ពេញលេញ» ត្រូវបានផ្សព្វផ្សាយនៅលើទស្សនាវដ្ដីល្បីល្បាញក្នុងពិភពលោក ដូចជា Vogue, People, The Huffington Post, the New York Post និង OK! ជាដើម។
រ៉ាជែល បានរំឭកពីបទពិសោធល្អៗ ដែលអតិថិជននិយាយពីការសាងអនុស្សាវរីយ៍មិនអាចបំភ្លេចបាន ពេលពួកគេបានជួបគ្នានៅកម្ពុជា។
រ៉ាជែល និយាយថា៖ «យើងទទួលបានសារពីស្វាមីភរិយា ដែលបានជួបគ្នានៅកម្ពុជា។ ពួកគេថា កន្លែងអនុស្សាវរីយ៍ដ៏ល្អមួយរបស់ពួកគេ គឺការមកទិញគ្រឿងអលង្ការនៅកម្ពុជាពីហាងនេះ»។
អ្នកស្រីបន្ដថា៖ «ថ្មីៗនេះគេបានសូមឱ្យយើងជួយធ្វើគ្រឿងអលង្ការមួយចំនួនសម្រាប់ពិធីជប់លៀងអាពាហ៍ពិពាហ៍របស់ពួកគេ។ យើងមានកិត្តិយសណាស់ដែលជាផ្នែកតូចមួយក្នុងក្ដីស្រឡាញ់របស់ពួកគេ»។
យ៉ាងណាមិញ អតីតតារាម៉ូដែលរូបនេះបានឱ្យដឹងថា ការតស៊ូជាមួយកូវីដ គឺពិតជារឿងមួយដ៏ពិបាក តែសុខភាព និងសុវត្ថិភាពរបស់សិប្បករគឺជារឿងចម្បង។ ជាលទ្ធផល គ្រឿងអលង្ការ «ពេញលេញ» ត្រូវបានប្ដូរទៅជាការលក់អនឡាញ ១០០ ភាគរយ។
ប៉ុន្ដែ រ៉ាជែល ក៏ចង់អរគុណដល់គ្រប់គ្នាដែលនៅតែបន្តគាំទ្រតាមរយៈប្រព័ន្ធផ្សព្វផ្សាយផ្សេងៗដូចជា Tiktok, Instagram, និង www.penhlenh.com ផងដែរ។
អ្នកស្រីបន្តថា៖ «គោលដៅរបស់យើង គឺចង់បន្តការលូតលាស់តាមអនឡាញដើម្បីឱ្យយើងអាចជួលបុគ្គលិកបន្ថែម។ យើងជឿជាក់ថា ដោយផ្តល់អាទិភាពដល់ការពង្រឹងសេដ្ឋកិច្ចរបស់ស្ត្រីយើងនឹងជះឥទ្ធិពលកាន់តែច្រើន និងបង្កើតសហគមន៍មួយប្រកបដោយនិរន្តរភាព»។
រ៉ាជែល បានបន្ថែមថា៖ «ឆ្នាំនេះយើងក៏ចាប់ផ្ដើមកម្មវិធីអាហារូបករណ៍ និងកំពុងផ្ដល់ឱ្យក្មេងស្រី ២ នាក់ ដើម្បីបន្តការសិក្សារបស់ពួកគេ។ យើងសង្ឃឹមថា កម្មវិធីនេះដើរបានល្អ ដើម្បីឱ្យយើងអាចជួយដល់ក្មេងស្រីដទៃទៀតដែរ»។
អ្នកស្រីបញ្ជាក់ទៀតថា៖ «បេសកកម្មយើង គឺផ្លាស់ប្ដូរផ្នត់គំនិតដែលថា បុរសជាមាស ស្រ្តីជាក្រដាសដែលងាយនឹងប្រឡាក់របស់ខ្មែរ និងបង្កើតចលនាឆ្ពោះទៅរកភាពស្មើគ្នានៅទូទាំងពិភពលោក»។
សម្រាប់ព័ត៌មានបន្ថែម «Penh Lenh» អាចទំនាក់ទំនងបានតាមកម្មវិធី Tiktok @penhlenhdesigns និងវេបសាយ www.penhlenh.com៕