ភ្នំពេញ៖ សិល្បៈដំឡើង និងវីដេអូចំណងជើងព្រះគន្លង (២០១៦-២០១៧) របស់លោក ខ្វៃ សំណាង ដែលផ្ដោតលើសហគមន៍ជនជាតិដើមភាគតិចជង និងពិធីប្រពៃណីជំនឿសាសនារបស់ពួកគេ ត្រូវបាននាំយកទៅដាក់បង្ហាញនៅព្រឹត្តិការណ៍មហោស្រពសិល្បៈអន្តរជាតិ Helsinki Biennial ក្រុងហែលស៊ិនគី ប្រទេសហ្វាំងឡង់ រហូតដល់ថ្ងៃទី ២៦ ខែ កញ្ញា ឆ្នាំ ២០២១។
ព្រឹត្តិការណ៍មហោស្រពសិល្បៈអន្តរជាតិ The Helsinki Biennial: The Same Sea (សមុទ្រតែមួយ) ប្រមូលផ្ដុំដោយក្រុមសិល្បករសិល្បការិនីចំនួន ៤១ នាក់ ឬក្រុមមកពីជុំវិញពិភពលោកមកបង្ហាញស្នាដៃសិល្បៈសហសម័យនៅដែនកោះ វ៉ាលីសារី អតីតដែនដីយោធាបន្សល់នូវស្លាកស្នាមពីសង្គ្រាម។
មហោស្រពអន្តរជាតិនេះក៏មានការចូលរួមតាំងបង្ហាញស្នាដៃច្រើនទម្រង់មានទាំងរូបថត វីដេអូ និងចម្លាក់ ដែលកើតចេញពីការស្រាវជ្រាវ និងចំណាយពេលរស់នៅស្វែងយល់ពីសហគមន៍ជនជាតិដើមភាគតិចជងរយៈពេលជាង ១ ឆ្នាំ របស់សិល្បករ ខ្វៃ សំណាង។
កើតនៅឆ្នាំ ១៩៨២ នៅទឹកដីខេត្តស្វាយរៀង លោកបានបញ្ចប់ការសិក្សាផ្នែកគំនូរពីសាកលវិទ្យាល័យវិចិត្រសិល្បៈនៅរាជធានីភ្នំពេញ ជាទីដែលលោករស់នៅ និងធ្វើការរហូតដល់បច្ចុប្បន្ន។
សិល្បករពហុជំនាញសិល្បៈរូបនេះ និយមបង្កើតស្នាដៃពីពិធីវប្បធម៌ប្រពៃណី និមិត្តរូបជំនឿសាសនា ប្រវត្តិសាស្ត្រ អាណានិគមនិយម សកលភាវូបនីយកម្ម អេកូឡូស៊ី បរិស្ថាន និងមនុស្សធម៌។
ដោយឡែកនៅព្រឹត្តិការណ៍ពិព័រណ៍សិល្បៈឯដែនកោះវ៉ាលីសារី ប្រទេសហ្វាំងឡង់ ស្នាដៃកាលពីជាង ៤ ឆ្នាំមុនរបស់លោកមានចំណងជើងថា ព្រះគន្លង ជាប្រភេទសិល្បៈដំឡើងដែលច្របាច់បញ្ចូលរវាងស្នាដៃវីដេអូ ក្បាំងមុខធ្វើពីវល្លិ ឫស្សី លោហៈ និងរូបថត ដែលកើតចេញពីការសិក្សាស្វែងយល់ពីនិមិត្តរូប ជំនឿ វប្បធម៌ ប្រពៃណីជនជាតិដើមភាគតិចជង។
ក្នុងសំណេរលើវេបសាយរបស់លោក ខ្វៃ សំណាង បានបរិយាយថា៖ «ខ្ញុំជាសិល្បករប្រណិប័តន៍នូវសិល្បៈពហុទម្រង់ ដោយផ្ដោតលើការច្នៃប្រឌិតសោភណភាព និងយុត្តិធម៌សង្គម។ ខ្ញុំជាសិល្បករដែលត្រូវបានទទួលស្គាល់ពីជំនាញថតរូប ផលិតវីដេអូ ចម្លាក់ និងស្នាដៃដំឡើង»។
បច្ចេកទេសប្រើប្រាស់វល្លិជាក្បាំងមុខ តំណាងឱ្យក្រុមសភាវមិនមែនមនុស្ស ដែលជាទស្សនៈជំនឿពីចក្កវាឡនៃវប្បធម៌នេះ។
លោកក៏បានសហការជាមួយនាដកា របាំប្រពៃណីបុរាណ ង៉ែត រ៉ាឌី ក្នុងការបង្កើតកាយវិការរាំ ដែលតំណាងឱ្យទីតាងស័ក្ដិសិទ្ធិជាច្រើននៅជ្រលងភ្នំ។
យោងតាមវេបសាយ news.artnet.com ស្នាដៃសិល្បៈមួយចំនួនត្រូវបានដាក់តាំងនៅទីឥតដំបូល តែ ស្នាដៃរបស់លោក សំណាង រំលេចនៅក្នុងសាលងងឹត។
ព្រឹត្តិការណ៍មហោស្រពសិល្បៈអន្តរជាតិ Helsinki Biennial ស្វាគមន៍សាធារណជនដោយសេរី ប៉ុន្តែអ្នកចូលរួមត្រូវបង់ថ្លៃជិះនាវាមកកោះដោយខ្លួនឯង៕