.jpg)
សហស្ថាបនិកហ្វារ សិល្បករ ស្រី បណ្តូល ធ្លាប់ដាក់តាំងស្នាដៃរបស់លោកនៅបណ្ដាប្រទេសជាច្រើន។ រូបថត Vila Hiek
ភ្នំពេញ៖ រូបភាពរំលេចរូបព្រះពុទ្ធ ជ័យវរ្ម័នទី៧ ប្រាសាទខ្មែរ ប្រធានាធិបតីអាមេរិក ប្រធានាធិបតីចិន ផែនដីព័ទ្ធប្រាង្គប្រាសាទបុរាណ និងភពឯទៀតដោយប្រើពណ៌ស្រអាប់ជាស្នាដៃចុងក្រោយនៃសហស្ថាបនិកជាទីស្រឡាញ់នៃអង្គការហ្វារ លោកគ្រូ ស្រី បណ្តូល ដែលបានលាចាកលោកដោយសារជំងឺកូវីដ ១៩ យ៉ាងអាឡោះអាល័យបំផុត។
«ការងារនេះមិនទាន់ហើយទេ ចំណងជើងក៏ខ្ញុំមិនដឹងថា យ៉ាងណាដែរ។ ខ្ញុំគូរបែបប្រើការស្រមៃបញ្ចូលគំនិតក្នុងនោះ ហើយមែនទែនទៅ ខ្ញុំចង់គូរបន្ថែមរូបមច្ឆា ចេតិយនៅខាងក្រោមខាងស្ដាំដៃតែមិនទាន់មានពេលធ្វើវាឱ្យរួចរាល់»។ នេះជាសម្ដីរបស់សិល្បករ ស្រី បណ្ដូល គ្រាដែលលោកនៅមានដង្ហើម។
គំនូរបញ្ចូលវប្បធម៌ខ្មែរនឹងសិល្បៈសហសម័យបង្កប់នូវអាថ៌កំបាំង បំផុសការត្រិះរិះនេះត្រូវបានលោកធ្លាប់ពន្យល់ថា៖ «គំនិតខ្ញុំគឺធ្វើទាក់ទងនឹងពិភពលោកបច្ចុប្បន្ននេះដូចជា ចិន អាមេរិក ពួកគាត់កំពុងប្រកួតប្រជែងគ្នាទាំងផ្នែកអវកាស សេដ្ឋកិច្ច ហើយវាមានឥទ្ធិពលមកលើខ្មែរយើង។ ខ្ញុំក៏ទាញយកទ្រឹស្ដីព្រះពុទ្ធមួយថា កិច្ចការទាំងអស់នេះ គឺគ្មានន័យអ្វីទេ ព្រោះចុងក្រោយ មនុស្សនឹងត្រូវបានត្រឡប់ទៅជាដីវិញ»។
ជាអកុសល វេលាចុងក្រោយរបស់លោក បណ្ដូល នៅថ្ងៃទី ៤ ខែសីហា បានបន្សល់នូវភាពសោកសៅយ៉ាងខ្លាំងដល់សិស្សសហគមន៍ហ្វារ និងអ្នកដែលស្គាល់រូបលោក នៅពេលលោកបានទទួលមរណភាពដោយសារជំងឺកូវីដ ១៩ ក្នុងវ័យ ៤៩ ឆ្នាំ។
ស្នាដៃគំនូរពុំទាន់មានឈ្មោះដែលបន្សល់ទុកដោយលោក ស្រី បណ្ដូល។ រូបថត Phare
គំនូរតែងតែជាផ្នែកមួយដ៏មានឥទ្ធិពលនៅក្នុងជីវិតរបស់លោកគ្រូ បណ្ដូល។ ក្នុងវ័យជំទង់ លោកបានរៀនគូររូបនៅទសវត្សរ៍ឆ្នាំ ១៩៨០ ជាមួយអ្នកគ្រូជនជាតិបារាំងឯជំរំជនភៀសខ្លួននៅព្រំដែនថៃ ដែលមនុស្សរាប់ពាន់នាក់បានរត់គេចពីរបបប្រល័យពូជសាសន៍ខ្មែរក្រហម។
ជាវិចិត្រករ ១ រូប លោកចាប់ផ្ដើមការតាំងពិព័រណ៍តាំងពីឆ្នាំ ១៩៩៨ នៅវិចិត្រសាលរៃយំ រហូតដល់មានឈ្មោះបោះសំឡេង និងឱកាសតាំងបង្ហាញស្នាដៃនៅវិចិត្រសាលនៅអង់គ្លេស ហ្វីលីពីន ថៃ មីយ៉ាន់ម៉ា អូស្រ្តាលី សហរដ្ឋអាមេរិក និងបណ្ដាប្រទេសច្រើនទៀត។ លោកក៏បានបោះពុម្ពសៀវភៅ ២ ក្បាល ក្រោមចំណងជើងថា «ហ្មដំរី» និង «ក្រឡេកមើលអង្គរ»។
លោកគ្រូ បណ្តូល សកម្មនឹងកិច្ចការនៅហ្វាររហូតដល់ទីបញ្ចប់នៃជីវិតរបស់លោក។ លោកបានបង្រៀនសិល្បៈ ប្រវត្តិសាស្ត្រកម្ពុជា និងតែងប្រើចំណេះដឹងរបស់លោក ដើម្បីចែករំលែក និងប្រាកដថា ក្មេងជំនាន់ក្រោយនឹងមិនភ្លេចធាតុសំខាន់នៃសិល្បៈខ្មែរ។។ លោកតែងជំរុញសិស្សឱ្យគិតក្រៅប្រអប់ដោយការប្រើក្ដីស្រមើស្រមៃ។
លោក អូស្មាន់ ខាវ៉ាចា ជានាយកប្រតិបត្តិហ្វារថា៖ «លោកគ្រូ បណ្ដូល គឺជាវិចិត្រករច្នៃប្រឌិតម្នាក់។ សិល្បៈរបស់លោកមានគ្រប់ប្រភេទតាំងពីគំនូរដូច ទៅចម្លាក់មានប្រើប្រាស់ផ្សែង ក្រមួន និងខ្សែភ្លើង»។
លោកបានឱ្យដឹងទៀតថា៖ «យើងនឹងធ្វើអ្វីដែលយើងអាចធ្វើបាន ដើម្បីបន្តកេរដំណែល និងក្ដីស្រមៃរបស់គាត់។ យើងនឹងបន្ដអ្វីដែលគាត់ចាប់ផ្ដើម។ យើងនឹងយកជីវិតគាត់ជាការជំរុញទឹកចិត្តយើងឱ្យទៅមុខ»។
លោកក៏មានការងារទើបតែបញ្ចប់មួយផ្សេងទៀតដែលតំណាងឱ្យអប្សរា និងអ្នកនយោបាយ ដែលគ្រោងនឹងដាក់តាំងនៅខេត្តបាត់ដំបងនៅថ្ងៃទី ២៣ ខែ តុលា ឆ្នាំ ២០២១ បន្ទាប់មកបង្ហាញនៅឯវិចិត្រសាលសិល្បៈត្រជាក់ភ្នែកនៅភ្នំពេញ។
អ្នកនាង ម៉ហ្គេន ដារ៉ាស ជាអ្នកសម្របសម្រួលទំនាក់ទំនងនៅហ្វារបានឱ្យដឹងថា នឹងព្យាយាមធ្វើឱ្យស្នាដៃដែលនៅសេសសល់របស់លោកគ្រូ បណ្ដូល អាចបង្ហាញជូនសាធារណជន និងមនុស្សជំនាន់ថ្មីឱ្យយល់ និងរៀនពីសិល្បៈរបស់គាត់។
លោកបានធ្វើការយ៉ាងសកម្មនឹងកិច្ចការសិល្បៈ នៅហ្វាររហូតដល់ទីបញ្ចប់នៃជីវិតរបស់លោក។ រូបថត Phare
អ្នកនាងបានបរិយាយស្នាដៃរបស់លោក បណ្ដូល ថា៖ «រាល់ស្នាដៃគាត់យើងអាចឃើញការតាំងចិត្តមោះមុតទៅលើគំនិតថ្មីៗ។ គាត់បានប្រើសិល្បៈគំនិត និមិត្តសញ្ញា រឿងព្រេងនិទាន និងកំណាព្យ ដើម្បីបង្ហាញពីដំណើរជីវិតរបស់គាត់ និងរឿងរ៉ាវរបស់ប្រទេសកម្ពុជា ដែលឆ្លងកាត់អតីតកាលខ្មៅងងឹតទៅជាភាពស្រស់ស្អាតជាសកល និងមានអត្ថន័យ»។
លោកគ្រូ បណ្ដូល មានបំណងចង់ឃើញសាលាជំនាញសិល្បៈសូនរូបរីកចម្រើន និងលើកទឹកចិត្តមនុស្សជំនាន់ក្រោយឱ្យក្លាយជាសិល្បករផ្នែកនេះកាន់តែច្រើន។
ក្នុងកិច្ចសម្ភាសន៍ ១ លោក បណ្ដូល ធ្លាប់បានថ្លែងថា៖ «យើងចង់ផ្តល់ឱ្យសិស្សនូវជំនាញបច្ចេកទេសពេញលេញ ចំណេះដឹងមូលដ្ឋាន និងវប្បធម៌ដ៏រឹងមាំនៃសិល្បៈ និងសមត្ថភាពក្នុងការយល់ដឹង វិភាគ និងឆ្លើយតបទៅនឹងបញ្ហាប្រកបដោយវិជ្ជាជីវៈ និងភាពច្នៃប្រឌិត។ ខ្ញុំពិតជាសង្ឃឹមថា អនាគតដ៏ត្រចះត្រចង់នឹងមកដល់សម្រាប់មនុស្សជំនាន់ក្រោយ»។
ពេលការបិទខ្ទប់ត្រូវបានបញ្ចប់ និងភរិយារបស់លោកគ្រូ បណ្ដូល បានជាសះស្បើយពីជំងឺកូវីដ ហ្វារ គ្រោងនឹងរៀបចំពិធីគោរពវិញ្ញាណក្ខន្ធ និងមរតករបស់គាត់ឱ្យបានសមរម្យ។
សម្រាប់អ្នកដែលចង់ចូលរួមរំលែកទុក្ខដល់ក្រុមគ្រួសារសិល្បកររូបនេះ អាចចូលរួមបរិច្ចាគទៅភរិយារបស់លោក ស្រី បណ្ដូល តាមរយៈ ABA bank account: Ourn Chansophorn 002 191 255៕
