ក្រុងប៊ែរឡាំង៖ ស្ដ្រីអាហ្វហ្គានីស្ថានម្នាក់បានផ្ដល់កំណើតកូនស្រីនៅលើយន្ដហោះទាហានអាមេរិក មិនយូរប៉ុន្មានក្រោយពីមកដល់យន្ដហោះភៀសខ្លួនទៅកាន់ប្រទេសអាល្លឺម៉ង់។ នេះបើយោងតាមកងទាហានអាកាសអាមេរិកបានឱ្យកាលពីថ្ងៃអាទិត្យ។
អំឡុងពេលហោះហើរពីមូលដ្ឋានកងទ័ពនៅមជ្ឈិមបូព៌ា ស្ដ្រីម្នាក់បានចូលបន្ទប់សម្រាក និងចាប់ផ្ដើមមានអារម្មណ៍មុនស្រួល។
បញ្ជាការកងទ័ពអកាសចល័តអាមេរិក បានសរសេរលើ Twitter ថា៖ «មេបញ្ជាការកងទ័ពអាកាសបានសម្រេចចិត្ដបញ្ជាឱ្យឡើងខ្ពស់ដើម្បីបង្កើនសម្ពាធខ្ពស់ក្នុងយន្ដហោះ ដែលជួយដល់ស្ថេរភាព និងសង្គ្រោះជីវិតម្ដាយ»។
ពេលចុះចតដល់មូលដ្ឋាន Ramstein ភ្លាម ក្រុមគ្រូពេទ្យកងទ័ពអាមេរិកបានជួយស្ដ្រីរូបនោះសម្រាលកូនក្នុងបន្ទប់ដាក់អីវ៉ាន់។ ទាំងម្ដាយ និងកូនបន្ទាប់មកត្រូវបានបញ្ជូនមន្ទីរពេទ្យជិតនោះ និងមានស្ថាភាពសុខភាពល្អ។
វីដេអូឃ្លីបបញ្ចេញដោយទាហានអាមេរិកបានបង្ហាញថា ម្ដាយដេកលើស្នែងសែងដែលសែងចេញពីយន្ដហោះដោយទាហានអាមេរិកនៅមូលដ្ឋានកងទ័ពភាគនីរតីប្រទេសអាល្លឺម៉ង់។
មួយសប្ដាហ៍ក្រោយ ក្រុមតាលីបង់បានកាន់កាប់ប្រទេសអាហ្វហ្គានីស្ថាន ប្រតិបត្ដិការជម្លៀសពីបណ្ដាប្រទេសនានានៅបន្ដក្រោមស្ថានភាពតឹងតែង ដែលហ៊ុំព័ទដោយភាពចលាចល និងជ្រួលច្របល់ពេញអាកាសយានដ្ឋានក្រុងកាប៊ុល។
តាំងពីថ្ងៃទី ១៤ ខែសីហា មនុស្សប្រមាណ ១៧ ០០០ នាក់ ត្រូវបានជម្លៀសដោយទាហានអាមេរិក រួមទាំង ពលរដ្ឋអាមេរិក ២ ៥០០ នាក់។ នេះបើយោងតាមរដ្ឋាភិបាលអាមេរិកបានឱ្យដឹងដូច្នេះ។
អាមេរិកបានទទួលភ្លើងខៀវពីអាល្លឺម៉ង់ក្នុងការទទួលជនភៀសខ្លួនមួយចំនួនទៅកាន់ប្រទេសអាល្លឺម៉ង់ដោយផ្ទាល់ ដែលមានជំរំចាំទទួលស្រេច។ មនុស្សប្រមាណ ១ ១៥០ នាក់ ដែលចុះនៅមូលដ្ឋាន Ramstein កាលពីថ្ងៃសៅរ៍ ដោយរំពឹងថា នឹងបានទៅដល់ទឹកដីអាមេរិកនៅប៉ុន្មានថ្ងៃខាងមុខ៕ AFP/HR