ថ្ងៃទី ២៣ ខែ សីហា ឆ្នាំ ២០២១ ជាថ្ងៃខួបវ័យ ៨៨ ឆ្នាំ អតីតតារាចម្រៀងអធិរាជសំឡេងមាស ស៊ីន ស៊ីសាមុត។ រូប ហ្វេសប៊ុក
ភ្នំពេញ៖ នាពេលថ្មីៗនេះ មានការផលិតចម្រៀងឡើងវិញមួយបទ មានចំណងជើងថា «ស្នេហ៍បាត់សម្រស់» ជាការច្របាច់បញ្ចូលគ្នាឱ្យក្លាយជាបទចម្រៀងឆ្លើយឆ្លងរវាងចៅស្រី និងតា គឺសំឡេងកញ្ញា ស៊ីន សេដ្ឋសុជ្ឈតា និងសំឡេងលោកតា ស៊ីន ស៊ីសាមុត ដើម្បីចេញនៅចំថ្ងៃគម្រប់ខួប ៨៨ ឆ្នាំ អតីតតារាចម្រៀង អធិរាជសំឡេងមាស ស៊ីន ស៊ីសាមុត នៅថ្ងៃទី ២៣ សីហា ឆ្នាំ ២០២១ កន្លងមកនេះ។
ចម្រៀងមនោសញ្ចេតនា រៀបរាប់ពីសេចក្តីស្នេហា កំលោះក្រមុំ កាលពីសម័យមុន តាមរយៈបទ «ស្នេហ៍បាត់សម្រស់» https://www.facebook.com/watch/?v=557723298610406 ផលិតឡើងវិញ ជាប្រភេទចម្រៀង MV ហើយមានការសម្តែងដោយក្រុមសិល្បករ-សិល្បការិនី ជំនាន់ក្រោយក្រុមហ្វារពន្លឺសិល្បៈ។ បទចម្រៀងនេះធ្វើឡើងវិញថ្មី ដែលត្រូវបានផលិត និងកែសម្រួលដោយ Minor Act សហការជាមួយក្រុមហ្វារពន្លឺសិល្បៈ សម្រាប់ខ្សែភាពយន្ត «ចម្រៀងឥតព្រាងទុក» ដែលនឹងចាក់បញ្ចាំងពេលឆាប់ៗនេះ។
កញ្ញា ស៊ីន សេដ្ឋសុជ្ឈតា ចៅស្រីអធិរាជសំឡេងមាស ស៊ីន ស៊ីសាមុត។ ហ្វេសប៊ុក
បើតាមសេចក្តីប្រកាសព័ត៌មានពីផ្នែកព័ត៌មាននៃស្ថានទូតសហរដ្ឋអាមេរិកប្រចាំប្រទេសកម្ពុជា បានឱ្យដឹងថា៖ «ថ្ងៃទី ២៣ ខែសីហា ជាថ្ងៃគម្រប់ខួបទី ៨៨ ឆ្នាំ អធិរាជសំឡេងមាស ស៊ីន ស៊ីសាមុត។ ដើម្បីជាការអបអរសាទរជីវិតរបស់លោក ស៊ីន ស៊ីសាមុត យើងមានមោទនភាព សូមបង្ហាញការច្រៀងឡើងវិញ ដោយចៅស្រីលោកគឺកញ្ញា ស៊ីន សេដ្ឋសុជ្ឈតា នៃចម្រៀងដ៏ល្បីរបស់លោកមានចំណងជើងថា «ស្នេហ៍បាត់សម្រស់»។
ប្រភពដដែលបន្តថា៖ «វាជាចម្រៀងឆ្លើយឆ្លងមិនធ្លាប់មានមួយ រវាង លោក ស៊ីន ស៊ីសាមុត និង កញ្ញា ស៊ីន សេដ្ឋសុជ្ឈតា ដែលជាចៅស្រីបង្កើតរបស់គាត់។ ចម្រៀងធ្វើឡើងវិញថ្មីមួយនេះ ត្រូវបានផលិត និងកែសម្រួលដោយ Minor Act ក្នុងកិច្ចសហការជាមួយ Phare Ponleu Selpak សម្រាប់ខ្សែភាពយន្តរឿង «ចម្រៀងឥតព្រាងទុក» ដែលនឹងចាក់បញ្ចាំងក្នុងពេលឆាប់ៗនេះ និងជាចម្រៀងដែលមានតម្លៃជានិរន្តរ៍របស់លោក ស៊ីន ស៊ីសាមុត។ ការផលិតឡើងវិញនូវបទ «ស្នេហ៍បាត់សម្រស់» ទទួលបានការឧបត្ថម្ភថវិកាដោយផ្នែកកិច្ចការសាធារណៈរបស់ស្ថានទូតអាមេរិក»។
ចំណែកក្រុមហ្វារពន្លឺសិល្បៈក៏បានបង្ហោះសារតាមគេហទំព័រខ្លួនដែរថា៖ «ប្រសិនបើពេញ ១ ឆ្នាំនេះ អ្នកអាចមើលវីដេអូចម្រៀងបានតែ ១ បទនោះ វីដេអូចម្រៀងនោះ គួរតែជាបទចម្រៀងនេះ «ស្នេហ៍បាត់សម្រស់»! សប្តាហ៍នេះជាថ្ងៃគម្រប់ខួបទី ៨៨ ឆ្នាំ របស់លោក ស៊ីន ស៊ីសាមុត»។
ឯចៅស្រីលោក ស៊ីន ស៊ីសាមុត កញ្ញា ស៊ីន សេដ្ឋសុជ្ឈតា ក៏បានច្រៀងចម្រៀង ១ បទទៀត ដើម្បីអបអរសាទរ និងឧទ្ទិសថ្ងៃខួប ៨៨ ឆ្នាំ លោកតាខ្លួនដែរ។ កញ្ញាបានបរិយាយថា៖ «ស្ដាប់ទៅវារាងកំប្លែងបន្តិច តែបំណងប្រាថ្នាតែ ១ គត់ ក្នុងអាជីពជាសិល្បការិនី នាងខ្ញុំគឺបានបកស្រាយចម្រៀងផ្ទាល់ជាមួយលោកតា។ ក្នុងឱកាសខួបកំណើតគម្រប់ ៨៨ ឆ្នាំ របស់លោកតា នាងខ្ញុំបានលើកបទចម្រៀង ១ បទ បកស្រាយឡើងវិញដែរ គឺបទ «សំរោងចុងកាល់» រីករាយថ្ងៃកំណើតលោកតា!»៕
